Nanchi Mwakoselamo Nyi?
1 “Kechi nji na lusekelo lwakila lo luno, lwa kumvwa’mba, bana bami babenakwenda mu bukine, ne.” (3 Yoa. 4) Kukoselamo kwa bana ba ku mupashi ba kwa Yoano, kwamuletejile lusekelo lukatampe. Shetu wa mwiulu byo kimutokeshapo pa muchima pa kumona bantu bavula babena kwaluka ke bana banji “babenakwenda mu bukine”!—Mana. 23:15, 16; 27:11.
2 Nangwa kya kuba’mba bantu ba kwa Lesa babena kutwajijila kwikala babambakana mu mwingilo wa Bwina Kilishitu, bamo bakoka. Nangwa kya kuba’mba, bano bantu bajinga babambakana kimye kyo bafunjile bukine, mu kupitapo kwa myaka, batatwile kwingila kya na mukose-mukose nangwa jimo jimotu mu mwingilo wa kulenga bana ba bwanga.
3 Kya kine kuba’mba bamo baleka kwingila na ngovu na mambo a makatazho o bapitamo mu myaka yabo ya bukote. Nangwa byonkabyo, bafwainwa kusanchilwa na mambo a kukoselamo kwabo mu uno mwingilo. Ne luno bakingila kwesakana na bulume bwabo. Onkao mambo yense wipana kwi Lesa wafwainwa kwiipuzhanga’mba: ‘Nanchi abya natesha muchima ku bya ku mubiji mu bumi bwami kya kuba’mba bya Bufumu nebingilakotu jimo jimo nyi? Nanchi ‘mbena kukosakanako nyi, inyi na uba “kyambazhi”?’ (Lum. 3:15, 16; Lu. 13:24) Lekai atweba bonse tumone byo tubena kwingila, kwikibika mu lulombelo ne kuwamishako mo tubena kubula kuba bulongo, kabiji ne kulabijila Yehoba byo etulaya kuba’mba “lukumo, ne buneme, ne mutende bikekala ku bonse boba byawama.”—Lo. 2:10.
4 Byo Twakonsha Kukoselamo: Kika kya kwashishe Yesu kukoselamo? Paulo walondolwele kuba’mba: “Ye wakosejilemo mu kumanama [pa kichi kya lumanamo, NW] mambo a lusekelo lwa mutujilwe kulutwe, ne kutako muchima ku bumvu ne, kabiji pano waikala konka ku kilujo kya jitanda ja Lesa.” (Hebe. 12:1-3) Lusekelo lwatujilwe palutwe ya kwa Yesu lwanemene bingi kukila meseko oapichilengamo a pa ka kimye kacheche. Kulabijila lusekelo lwatulwa pa lutwe yetu lwakonsha kwitukwasha kukoselamo. (Lum. 21:4, 7; 22:12) Umvwe saka tutala kwi Yehoba ne kuketekela bulume bwanji kwitukosesha mu jisambijilo ja pa bunke, kutanwa ku kupwila kimye kyonse ne kukelwa mu lulombelo, tukakonsha kukoselamo mu uno mwingilo ye etupa kwingila.
5 Yehoba usekela pa kumona bantu banji bakishinka babena kukoselamo. Onkao mambo twayai tunungeko lusekelo lwanji byo tubena kutwajijila “kwenda mu bukine.”