Kwingilako Pakatampe mu Mwingilo Wetu
1 Mutumwa Paulo watundaikile bena Kilishitu ‘kukijishamo ne kukijishamotu’ kwenda mu jishinda ja Lesa. (1 Tesa. 4:1) Nga kino kilumbulula ka kwi atweba? Kilumbulula’mba twafwainwa kutwajijila kumonangapo mashinda a kwingijilamo pakatampe mingilo ya ku mupashi ne kwibikishako kimye kyonse ‘kupwisha bulongo mingilo yetu.’—2 Timo. 4:5.
2 Kintu Kilengela: Kizaku kya kukeba kwingijila Mulenga wetu kyo kitulengela kwingilako pakatampe mu mwingilo. Tukeba kukomenako ku mupashi ne kumonapo mashinda a kwingijilamo bulongo mwingilo wetu. Kwikala na mutanchi ne na mulanguluko wawama kuketukwasha kufikizha bikonkwanyi byetu bya ku mupashi.—Sala. 1:1, 2; Fili. 4:6; Hebe. 10:24, 25.
3 Pa kuba’mba twingilengako pakatampe mu mwingilo, kikebewa kwikala na muchima wa kwipana. Twakonsha kwikala na uno muchima kupichila mu kulomba ne kulanguluka langulukapo pa kya kumwenako kyawama kya kwa Yesu. (Mat. 20:28) Yesu wamwenangamo bingi lusekelo mu kwingijila bantu mu mwingilo wanji yense. (Byubilo 20:35) Twakonsha kumulonda kupichila mu kumwesha lusekelo ku bantu kabiji ne mu kwikala benengezha kimye kyonse kwingilako mu mwingilo wetu.—Isa. 6:8.
4 Mwingilo wa Bansemi: Bansemi bakonsha kutundaika baana babo saka bakiji bacheche kwikala na kizaku kya kwingijila bakwabo ne kwingilako pakatampe mu mwingilo wetu. Bakyanyike bamona kubambakana kwa ba mu kisemi ne byo bebikishako kwingilako pakatampe mu mwingilo. Mulongo umo watundaikilwe bingi byo akijinga mwanyike kwingilako pakatampe na mambo a kwingijila pamo na bankambo yanji ba balume mingilo ya kipwilo. Kupichila mu kumona lusekelo lwabo ne byo babambakene, kyamulengejile kumonapo mashinda a kwingijilamo balongo banji. Pano luno ke nkwasho mu kipwilo.
5 Kubena Kukebewa Balongo: “Umvwe muntu wakeba mwingilo wa bukulumpe . . . ubena kusaka mwingilo wawama.” (1 Timo. 3:1) Bino byambo bitundaika balongo kukanamina mashuko akwabo a mingilo ingijiwa mu jibumba ja Yehoba. Pa kwingilako ino mingilo kechi kikebewatu’mba kana muntu waikala sendwe ne. Mulongo ubena kukanamina ino mingilo, wafwainwa kukitangizhako Bufumu ne kwikala wa mukoyo mu mwingilo. (Mat. 6:33; 2 Timo. 4:5) Wafwainwa kwibikishako kwikala wa kumwenako wawama ku bakwabo.
6 Ntanda Yonse: Yehoba ubena kupelawizha mwingilo wa kukonkanya bantu. (Isa. 60:22) Aba bonse babena kulondela kya kumwenako kya kwa Yesu, bafwainwa kwingilangako pakatampe mu mwingilo wabo. Sawakya wa ntanda yonse wa mwaka wa mwingilo wa 2006, umwesha’mba bantu 248,327 babatizwe. Kino kibena kulumbulula’mba bantu bakatataka kukila pa 680 babatizwenga pa juba pa juba. Mwane lekai atweba bonse tumonengapo mashinda a kwingijilamo pakatampe mu mwingilo.