Nanchi Mukeba Kuba Byavula Nyi?
1 Yesu wapashañenye Bufumu ku kintu kyakila mu kunema. (Mat. 13:44-46) Mwingilo wa kusapwila mambo awama a Bufumu naye ke kintu kyakila mu kunema. Uno mwingilo ye ye twafwainwa kutangizhako mu bwikalo bwetu, nangwa kya kuba pa kumwingila kikebewa kwikana. (Mat. 6:19-21) Nanchi mubena kukeba kuba byavula mu mwingilo wa Bufumu nyi?
2 Langulukai pa Bino Bintu Byanema: Twafwainwa kubapo bintu bimo byanema pa kuba’mba tube byavula mu mwingilo: (1) twafwainwa kubika bintu bya Bufumu palutwe mu bwikalo bwetu (Mat. 6:33); (2) kwikala na luketekelo ne kukinka manungo mwi Yehoba (2 Ko. 4:1, 7); (3) kulomba bukwasho kwi Lesa mu milombelo yakishinka na mukoyo (Luka 11:8-10); (4) kusunga ne kuba bintu byo tulomba mu milombelo yetu.—Yako. 2:14, 17.
3 Mashinda Mwakubila Byavula mu Mwingilo Wetu: Atweba bonse twafwainwa kwibikila kikonkwanyi kya kwingilako mwingilo pa ñondo pa ñondo. Abya mwakilangulukapo kala jishuko ja kusapwila busapwishi bwakushukilwa, kweseka na ngovu kulumbulula bulongo byambo kuba’mba byumvwanyikenga, kunengezha bulongo pa kubwela ku bakeba kufunda bukine ne kukebesha kufunjisha mafunjisho a Baibolo apa nzubo abena kuya palutwe nyi? Nanchi mwakonsha kwingila bupainiya bwa kukwasha, bupainiya bwa kimye kyonse nangwa kuya na kwingijila kuji kukajilwa kukatampe? Umvwe mwi mulongo wabatizwa nanchi mubena kukanamina kwikala nkwasho nangwa mukulumpe mu kipwilo nyi? (1 Timo. 3:1, 10) Abya mwakonsha kunungako mwingilo wenu kuya na kwingijila pa Betele nangwa kuya na kufunda Sukulu ya Lufunjisho lwa Mwingilo?—Luka 10:2.
4 Mulongo umo waingilanga nkito ya ku mubiji kabiji watemenwe bingi kukaya watundaikilwe kutatula bupainiya bwa kimye kyonse. Watatwile bupainiya bwa kukwasha kabiji wakepesheko mingilo ya kuba mu bwikalo bwanji pa kuba’mba atatule mwingilo wa kimye kyonse. Kulutwe na lwendo, waile ne ku Sukulu ya Lufunjisho lwa Mwingilo, ya mukwashishe kufunda mwingilo wa bukulumpe bwa kijiiji ye abena kwingila luno. Wasangalala bingi mambo wakokejile byo bamukoseshe, kabiji uji na lusekelo bingi pa mulanguluko wanji wa kukeba kuba byavula mu mwingilo wa Bufumu.
5 Yehoba ukwasha bantu bepana abo bene kumwingijila. (Isa. 6:8) Kange mutabankane na bintu byakonsha kwimukankesha kunungako mwingilo wenu wafwainwa kwimuletela lusekelo lukatampe ne.