Kikonkwanyi Kyanema kya Mwaka wa Mwingilo Ubena Kwiya

1. Kikonkwanyi ka kyo twakonsha kwibikila mu mwaka wa mwingilo ubena kwiya?

¹ Umvwe tubena kukeba kukomenako ku mupashi, twafwainwa kwibikila bikonkwanyi. Bikonkwanyi ka byo mwibikila mu mwaka wa mwingilo ubena kwiya? Kikonkwanyi kyawamisha ke kya kwingilako bupainiya bwa kukwasha pa ñondo umo nangwa bavula. Byo kiji kuba’mba uno mwingilo wawama kimye kyonse ukebewa kunengezhezha jimo mutanchi, kino kyo kimye kya kutendekelako jimo kuba bino. Mambo ka o twafwainwa kwibikila kikonkwanyi kya kwingilako bupainiya bwa kukwasha?

2. Mambo ka o twafwainwa kwibikila kikonkwanyi kya kwingilako bupainiya bwa kukwasha?

² Ene Mambo a Kwingilako Bupainiya bwa Kukwasha: Kwingilako bupainiya bwa kukwasha kwitulengela ‘kukijishamo ne kukijishamotu’ mu kumutokesha Shetu wa mwiulu pa muchima kupichila mu kwingilako kimye kyabaya mu mwingilo. (1 Tesa. 4:1) Umvwe ketulanguluke pa bintu byonse bitubila Yehoba, michima yetu itundaikwa bingi kwamba ku bantu pe aye. (Sala. 34:1, 2) Yehoba umona kabiji usanchila bingi kwipana kwetu ko twipana kuba’mba twingilengako pakatampe mu mwingilo. (Hebe. 6:10) Kituletela bingi lusekelo pa kuyuka’mba tubena kutokesha Yehoba pa muchima kupichila mu kwingila na ngovu.—1 Moba. 29:9.

3, 4. Tumwenamo byepi mu kwingilako bupainiya bwa kukwasha?

³ Javula, umvwe muntu ubena kwibikishako pa kuba kintu, po po ayuka bya kuba nakyo bulongo ne kwikala na lusekelo lwa kwikyuba. Kwingilako kimye kyabaya mu mwingilo kukemulengela kukasuluka pa kwamba ku mwina nzubo. Mukayuka bya kwamba bulongo pa kutendeka mwisambo ne pa kwingijisha Baibolo. Umvwe saka mwisamba kimye kyonse pa bintu byo mwaitabilamo, lwitabilo lwenu po po lukosa bingi. Bavula babujilenga kufunjisha mafunjisho a Baibolo, luno babena kufunjishapo lufunjisho lumo na mambo a kwingilako bupainiya bwa kukwasha.

⁴ Kabiji kwingilako bupainiya bwa kukwasha kwakonsha kulengela muntu kubula kutola ku mupashi. Mulongo umo waingijilepo bupainiya bwa kimye kyonse kunyuma kwe, awo wamwene kuba’mba wanemekelenga bingi mwingilo wa ku mubiji, wafuukwilepo kwingilako bupainiya bwa kukwasha pa ñondo umo. Waambile’mba: “Nakuminye bingi byo nakoseshiwe ku mupashi pa kwingilakotu ñondo umo! Nafuukwilepo kutwajijila kwingilangako bupainiya bwa kukwasha, abo bwandengejile kutendeka jikwabo mwingilo wa bupainiya bwa kimye kyonse.”

5. Twakonsha kushinda byepi muchima wa kwiumvwa kukepelwa bulume?

⁵ Shindai Mikiika: Bamo bakonsha kubula kunembeshako bupainiya bwa kukwasha na mambo a kuba beumvwa’mba kechi baji na bulume bwa kusapwila ne. Umvwe kino kyo kibena kwimulengela kukankazhama kwingilako, Yehoba wakonsha kwimukwasha byonka byo akwashishe Yelemiya. (Yele. 1:6-10) Nangwa kya kuba Mosesa wajinga ‘wanema pa kanwa, kabiji wanema pa lujimi,’ Yehoba wamwingijishe kufikizha nkebelo Yanji. (Lupu. 4:10-12) Umvwe kemwiumvwe kukepelwa bulume, mulombai Yehoba kuba’mba emukoseshe.

6. Mwakonsha kwingilako byepi bupainiya bwa kukwasha nangwa kya kuba mubelabela nangwa kupayankana?

⁶ Nanchi mukankazhama kunembeshako bupainiya bwa kukwasha na mambo a kubelabela nangwa kupayankana nyi? Umvwe mubelabela, kwingilako papelela bulume bwenu kwakonsha kwimukwasha bingi. Umvwe mwapayankana na mingilo ikwabo, mwakonsha kushapo mingilo yenu imo yo mwamona amba kechi yanemeshatu ne, kuba’mba mukeingile mu ñondo mukwabo. Bamo baji pa makito, bekalako na kimye kya kwingilako bupainiya bwa kukwasha kupichila kwingijishapo juba jimo nangwa abiji pa moba abo a kukokoloka.—Kolo. 4:5.

7. Mambo ka o kyanemena kulomba kimye kyonse pa kwingilako bupainiya bwa kukwasha?

⁷ Bya Kuba pa Kwingilako: Lombainga kuba’mba mwikale na kizaku kya kwingilako uno mwingilo wa bupainiya bwa kukwasha. Mulombai Yehoba kwimukwasha kuba’mba mwingilengako pakatampe mu mwingilo. (Loma 12:11, 12) Yehoba wakonsha kwimukwasha kufuukulapo bulongo pa mambo a kupimpulako mutanchi wenu wa bintu. (Yako. 1:5) Umvwe mumvwa mukose wa kwingilako, lombai Yehoba kwimukwasha kuba’mba mwikale na lusekelo mu mwingilo wa kusapwila.—Luka 10:1, 17.

8. Nga kulondela biji mu Byambo bya Mana 15:22 kwakonsha kwimukwasha byepi kwingilako bupainiya bwa kukwasha?

⁸ Isambai pa kikonkwanyi kya kwingilako bupainiya bwa kukwasha mu bukisemi. (Mana. 15:22) Kimye kimo umo wa mu kisemi wakonsha kwingilako bupainiya bwa kukwasha na mambo a bukwasho bwa bakwabo ba mu nzubo. Isambai na bakwenu ba mu kipwilo pa mambo a mulanguluko wenu wa kwingilako bupainiya, kikatakata boba bajipo mu bwikalo bo mujimo. Kino kyakonsha kwimutundaika bingi kwikala na kizaku kya kwingilako bupainiya bwa kukwasha.

9. Bañondo ka bo mwakonsha kusalapo kwingijilamo bupainiya bwa kukwasha?

⁹ Byo mubena kupitulukamo pa bikekala mwingilo wenu wa mu bujimi mu mwaka wa mwingilo ubena kwiya, kimye ka kyo mwalangulukapo kwingilako bupainiya bwa kukwasha? Umvwe mwingila nkito nangwa muya ku sukulu, mwakonsha kufuukulapo kwingilako mu bañondo baji na moba a kukokoloka nangwa baji na Bibelushi bitanu nangwa moba a Mulungu atanu. Kya kumwenako bañondo ba September, December, March ne August baji na moba a Bibelushi ne a Mulungu atanu. Ñondo wa May uji na moba a Bibelushi atanu ne wa June uji na moba a Mulungu atanu. Umvwe mubelabela, mwakonsha kwingilako mu bañondo baji na mwela wawama. Mwakonsha kufuukulapo kwingilako bupainiya mu ñondo ukafwakashishamo mukulumpe wa kijiiji pa kipwilo kyenu. Umvwe wafwakesha kipwilo kyenu, mukekala na jishuko jikwabo ja kutanwako ku kipungu kitanshi kya kupwila pamo kwa bapainiya ba kimye kyonse. Byo kiji kuba’mba Kivuluko mu mwaka ubena kwiya kikobiwa pa 22 March, bañondo ba March, April ne May bawama bingi kwingijilamo bupainiya bwa kukwasha. Umvwe mwasala ñondo nangwa bañondo bo mukeba kwingijilamo bupainiya bwa kukwasha, tendekelaiko jimo kunemba mutanchi ukemukwasha kufikizha maawala akebewa.

10. Mwakonsha kuba byepi umvwe kechi kimupelela kwingilako bupainiya bwa kukwasha ne?

¹⁰ Nangwatu umvwe kya kuba mwiumvwa’mba kechi mwakonsha kwingilako bupainiya bwa kukwasha mu mwaka wa mwingilo ubena kwiya ne, mwakonsha kutwajijilatu na muchima wa bupainiya. Twajijilai kwingila na ngovu mu mwingilo ne kuketekela’mba mumutokesha bingi Yehoba pa muchima byo mwibikishako kumwingijila na mweo wenu yense mu mwingilo wanji. (Nga. 6:4) Kwashaingako ne kutundaika boba bakonsha kwingilako bupainiya bwa kukwasha. Apo kampe mwakonsha kupimpulako mutanchi wenu kuba’mba mwingileko mu mwingilo pa juba jikwabo ja mulungu na boba babena kwingilako bupainiya.

11. Mambo ka o twafwainwa kuyukila bulongo bimye byo tubena kwikalamo?

¹¹ Bantu ba Yehoba bayuka bingi bimye byo tubena kwikalamo. Kuji mwingilo wafwainwa kwingijiwa ko kuba’mba, kusapwila mambo awama. Bumi bwa bantu buji mu kizumba kabiji ne kimye bekikepesha kala. (1 Ko. 7:29-31) Butemwe bwetu bwa kutemwa Lesa ne bakwetu buketulengela kwingila bingi na ngovu mu mwingilo. Umvwe twibikishako ne kwikala na mutanchi wawama, twakonsha kwingilako bupainiya bwa kukwasha nangwatu pa ñondo umo mu mwaka wa mwingilo ubena kwiya. Kino ke kikonkwanyi kyanema bingi.