Sapwilainga Nekwibabujisha

¹ Byoajinga “ntangi wabo ne mukulumpe wabo,” Yesu wafunjishe baana banji babwanga mwingilo mukatampe yebatendekele kwingila palutwe. (Isa. 55:4; Luka 10:1-12; Byu. 1:8) Mutumwa Petelo walumbulwile mwingilo yeebapele Yesu amba: “Ye witulayile’mba, mukebasapwile bantu, ne kunshimuna’mba, ye mwine ye atongola Lesa’mba akekale wa kwibachibila mambo bomi ne bafu.” (Byu. 10:42) Nanchi bika byavwangwamo mukusapwila nekwibabujisha bantu?

² Twakonsha kufunjilako byavula ku mutumwa Paulo byoasapwijilenga. Kimye kyoapwijile pamo nabakulumpe mukipwilo kya ku Efisesa, wibavulwileko’mba: ‘Nabujile kuchina kwimubula nangwa kimotu kimuwamina, kasa nemufunjisha patoka, ne ku nzubo ku nzubo, kasa nebabujisha Bayudea ne Bangiliki, lulapilo lwa kwalulukila kwi Lesa, ne lwitabilo lwa kumwitabila Nkambo yetu Yesu Kilishitu.’ Nangwa kyakuba Paulo watalañenenga namakatazho, waingijilenga bingi nangovu kusapwila mambo awama kubantu bavula. Kechi watondelwe kushilañanatu bukine bonka nabantu bamutelekelengane, bino wibabujilenga byonse “monse mwasakila Lesa.” Pakuba’mba obe kino, wibikilengako mwine nekwipana. Waambile nejikwabo’mba: “Amiwa kechi natako muchima ku mweo wami nobe kyo kintu kyanema kwi amiwa ne, poso mpwishe kikonkwanyi kyami, ne mwingilo ye natambwile kwi Nkambo Yesu, wa kusapwila mambo awama a bupe bwa Lesa.”—Byu. 20:20, 21, 24, 27.

³ Twakonsha kulonda byepi byaubile Paulo lelo jino? (1 Ko. 11:1) Twafwainwa kuba kino mukukeba bantu bafwainwa kumvwa nangwa kyakuba tubena kupita mumakatazho apusana-pusana, mukwingila nangovu mukusolomoka mitundu yabantu bonse nemilaka namambo awama, nekwibikako kukwasha bantu bamwesha lusekelo lwakukeba kufunda bukine. (Mat. 10:12, 13) Kino kikebewa kimye, ngovu nekutemwa bantu.

⁴ Mwakonsha Kwingilako Bupainiya Bwakukwashanyi? Ñondo wa March ne April bakonsha kwikala bañondo bawama kwianweba kwingijilamo bupainiya bwakukwasha. Byokyatundaikilepo mwaka wapwa pakumona basapwishi bavula byobebikileko kwingila bupainiya bwakukwasha!

⁵ Nyenga umo wamyaka yakusemwa 80 wakolwa-kolwanga, watundaikilwe bingi nabukwasho bwamukwashishe jibumba ja Yehoba. Wanembele’mba: “Buno bukwasho bwandengejile naikala jibiji namulanguluko yenajinga nanji pakimye kyalepa wakwingila bupainiya bwakukwasha, kabiji nalangulukile namba nafwainwa kwingilako jibiji.” Wibikijile kikonkwanyi kyakuba’mba kanatu nkengileko bupainiya bwakukwasha mu March. Waambile’mba: “Patanshi naikele panshi nekulanguluka byonakonsha kwinengezha. Nesambile namwanami wamukazhi mambo nayukile namba wakonsheshe kunkwashako. Nakuminye bingi pakumona’mba naye wanembesha bupainiya bwakukwasha.” Muyeuno ñondo, awe nyenga wakikulumpe waingijile maawala 52 mumwingilo. Waambile nejikwabo’mba: “Bimye byavula nalombelenga kwi Yehoba kunkosesha umvwe ngovu keimpwe. Pakupwa kwañondo, najinga bingi walusekelo, kabiji nsanchila bingi Yehoba bimye byavula pakunkwasha. Nafwainwa kutemwa bingi kwesekako nejikwabo.” Kuyuka lusekelo loajinga nalo kwakonsha kukosesha nebasapwishi bakwabo bakeba kwingilako bupainiya bwakukwasha nangwa kyakuba bakolwa-kolwa.

⁶ Mulongo umo yebapangile nkito kwakubula kuketekelane, washukijile kino kimye kwingijilamo bupainiya bwakukwasha. Mukachi kañondo yeaingijilengamo bupainiya bwakukwasha, waikele nakizaku kikatampe kyakukeba kwingila mwingilo wabusapwishi, byokyaubilenga’mba ñondo apwenga, watendeka nelufunjisho lwa Baibolo. Byoalangulukile mwingilo yeaingijile, waambile’mba: “Uno ñondo byoawaminepo!” Byoajingapo nalusekelo pakumutangijila kwi Yehoba nekumukwasha! Ee, Yehoba wamupesheshe mulongo namambo akwingila koaingijile nangovu mumwingilo, kabiji neanweba ukemubila kintutu kimo.—Mala. 3:10.

⁷ Basapwishi bavula kechi kibapelela kwingila bupainiya bwakukwashane. Bino nangwa byonkabyo, balongo nebanyenga nangwa kyakuba bengila nkito yakumubiji, kusunga bisemi kubikapotu nemakatazho obapitamo, bengilako uno mwingilo. Kusapwila kwavwangamo kulambula kimye kyetu nengovu, bino mfweto ifumamo yabaya bingi.—Mana. 10:22.

⁸ March ne April kyokimye kyawama bingi kwingijilamo bupainiya bwakukwasha. Mu March muji bibelushi bitanu. Kusapwila mubino bibelushi nekimye kyamabanga kyakonsha kwibapelela aba bengila nkito babula kumonapo kimye kyakwingilako bupainiya bwakukwasha. Kabiji mwakonsha nekushukilwa maholide aji muñondo wa April. Aba baya kusukulu bakonsha kwingila kimye kyobashinka sukulu kabiji baya kunkito bakonsha kwingila kimye kyabo kyakukokoloka nekufikizha maawala 50. Nga mamboka nekumwena kuiye mitanchi yakumwenako iji muuno mutwe yabyomwakonsha kutanchika kikonkwanyi kyenu kyakwingila maawala 50 muñondo wa March nangwa April? Isambaipo pamutanchi nabalongo benu bamukisemi nebasapwishi bakwenu; kwisamba nabo bino kwakonsha kutundaika bamo kwingilako nenu mumwingilo. Umvwe kechi mukakonsha kwingilako bupainiya bwakukwashane, ibikilai kikonkwanyi kuba’mba mukengileko pamo naboba bakengila bupainiya mubano bañondo. Nengezhezhai jimo pakuba’mba mukasapwile pabaya muñondo wa March ne April.

⁹ Mweshai Lusanchilo ku Kivuluko: Pamwaka pamwaka umvwe ketunangijile ku Kivuluko, lusanchilo lwa bukuzhi lutundaika bantu bavula [“kumonapo kimye, NW”] kyakwingilako mwingilo wabupainiya bwakukwasha. (Efi. 5:15, 16) Mwaka wapwa mu Zambia, bapainiya bakukwasha bajinga 6,462 mu March, mu April bajinga 7,551. Avaleji yabantu baingijile pabano bañondo umo umo yajinga 7,006. Ino avaleji yabaya bingi kukila ne avaleji yabantu 2,313 baingijilenga bupainiya mubañondo bamwaka wamwingilo wapwa. Mukino kimye kyakunangijila ku Kivuluko kejishuko jikwabo jakumwesheshamo lusanchilo lwabukuzhi bwakitapisho kyakwa Kilishitu kupichila mukwingila nangovu mumwingilo wamubujimi.

¹⁰ Ñondo wa April 16 byoabena kufwenya ke kwipi, langulukainga Kivuluko byokilumbulula kwianweba. Langulukainga pabintu byamumwekejile Kilishitu nekumufikizha kulufu, nepamilanguluko yoalangulukilenga kyabaya. Langulukai nepalusekelo lwamutujilwe Yesu kulutwe nebyolwamukwashishe kuchinchika lumanamo lwakumanama kyatama mujoja jishinda. Languluka-langulukai pakifulo kyoajipo luno kya Bumutwe wakipwilo byoabena kutangijila mwingilo wabusapwishi nekulenga baana babwanga. (1 Ko. 11:3; Hebe. 12:2; Lum. 14:14-16) Kepo mumweshe lusanchilo lwenu pabyonse bimubila Kilishitu kupichila mukwingila mwingilo wabusapwishi ponka pomwakonsha kupelela.

¹¹ Tundaikai Basapwishi Kwingila Uno Mwingilo: Bakulumpe mukipwilo nebankwasho baji bingi najishuko jakutundaika basapwishi mukwingila mwingilo wabupainiya bwakukwasha. Bekala bingi nakimye kyawama kukwashishamo basapwishi kwingilako pakatampe muuno mwingilo kimye kyobengila nabo mumwingilo wamubujimi, nekimye kyobaya palwendo lwabukafunga. Twayai atweba bonse tulangulukepo nalulombelo pauno mwingilo, nemujino jishinda tukakoseshanga kwibikako kwetu kwakusapwila bantu.

¹² Bakulumpe bonse mukipwilo nebankwasho byobakengijilanga pamo mulunengezho lwa kipwilo lwakwingijisha muñondo wa March ne April, mukulumpe utangijila mwingilo wamubujimi kikatakata yewafwainwa kumonanga bibena kwenda mwingilo wabusapwishi. Wafwainwa kunengezha mapunzha pakupwila kwakuya mumwingilo wamubujimi, moba, nekimye kyafwainwa kwiya basapwishi bavula nekubijika kino javula pa Kupwila kwa Mwingilo. Kyakonsha kunengezhewa kupwila pabimye byapusana-pusana mukachi kajuba, pakuba’mba bonse mukipwilo bekaleko nakimye kyakwingila mumashinda apusana-pusana abusapwishi. Akye kyavwangamo kusapwila mumanyaunda abusulu, mumikwakwa, kunzubo ne nzubo, kubwelako nekusapwila pafoni. Kabiji kikwabo wafwainwa kunengezha mabuku, magazini, nemanyaunda akwingijilamo mubano bañondo.

¹³ Buku wa Kuyuka yeukatambikwanga mu March namulanguluko wakutatula mafunjisho a Baibolo. Mashinda awama akutambikilamo buku wa Kuyuka aji mukyamukachi kyamu Mwingilo Wetu wa Bufumu wa January 2002. Mu April tukatambikanga magazini a Kyamba kya Usopa ne Loleni! Esekeshai kwingijisha mashinda aji pa “Byakwamba Pakutambika Magazini.” Bonse bafwainwa kunengezha bulongo kuba’mba bakabujishe bantu.

¹⁴ Byokitusangajikapo kwingila nalutangijilo lwa Mutwe wakipwilo, aye Yesu Kilishitu mumwingilo wetu wakusapwila mambo awama kubantu! Ñondo wa March ne April byoabena kufwenya kepepi, twayai twibikeko nejikwabo kulenga bano bañondo kwikala bawamisha byotubena kukokela mukambizho wakwa Kilishitu wakusapwila nekwibabujisha bantu mambo awama.

[Kitenguluzha pa peja 4]

Mitanchi Yapusana-pusana Yakwingijilamo Bupainiya Bwakukwasha mu Ñondo wa March ne April 2003

Juba Maawala

Pakimo 1 2 — — 2 —

Pakibiji 1 — 3 — — —

Pakisatu 1 2 — 5 — —

Pakina 1 — 3 — — —

Pakitanu 1 2 — — — —

Pakibelushi 5 4 3 5 6 7

Pamulungu 2 2 3 2 2 3

March 56 56 54 55 50 50

April 50 50 51 53 — —

Abya pajipo mutanchi wakonsha kwingila bulongo kwianweba nyi?