‘Sapwilai Mambo a Lesa’
1 Umvwe mwatambwila kintu kimo kyawama bingi, nanchi kechi mumwesha lusanchilo mubyubilo byenu nenyi? Ee byobyomuba! Pamambo abuwame nekifyele Yehoba kyoaji nakyo kubantu, monai byaubile mutumwa Paulo. Waambile’mba: “Sante ekale kwi Lesa na mambo a kya bupe kyanji kyabulwa ne mwa kwikitelela”! Nga buno “bupe” bulumbululaka? Bulumbulula “bupe bwa Lesa bwavujisha” boetupa. Kimwesho kikatampe kyabuno bupe kyajinga Mwananji yenkawa umo waishile nakwitukuula kubundengamambo bwetu.—2 Ko. 9:14, 15; Yoa. 3:16.
2 Nanchi Paulo wasanchilengatu pakanwanyi? Ine kechi ibyone! Wamwesheshe lusanchilo lwanji lwakine kine mumashinda avula. Watesheshe bingi muchima kubutuntulu bwakumupashi bwabena Kilishitu bakwabo kabiji wakebeshe kwingila papelela ngovu yanji kwibakwasha kutana mfweto mulusa lwa Lesa. Pamambo abano, Paulo waambile’mba: “Byo twimutemwisha, twaswishishe kwimupa kechi mambo awama a Lesa onka ne, ne myeo yetu pamo, mambo mwaalukile ke muji batemwe betu.” (1 Tesa. 2:8) Kununga pakukwasha boba bajinga mukipwilo kulamawizha lupulukilo lwabo, Paulo waingijile nangovu yanji kusapwila mambo awama, kwenda miseke yalepa panshi nepamema kuya nakukeba “batongwejilwe bumi bwa myaka.” (Byu. 13:48) Lusanchilo lwamwesheshe Paulo pabyonse Yehoba byoamubijile lwamutundaikile ‘kusapwila mambo a Lesa.’—Kolo. 1:25.
3 Nanchi lusanchilo lotuji nalo lwabintu byonse bitubila Yehoba kuba lwitutundaika kukwasha kumupashi aba botuji nabo mukipwilo nenyi? (Nga. 6:10) Kabiji nanchi kechi tutundaikwa kwingila nangovu mumwingilo wakusapwila mambo awama a Bufumu munyaunda yetu yonsenenyi?—Mat. 24:14.
4 Kimye Kyakumwesheshamo Lusanchilo: Pamwaka pamwaka Kivuluko kyalufu lwa Yesu kitupa jishuko jikatampe jakumwesheshamo lusanchilo pabintu Yehoba ne Yesu byobetubila. Kino kechi kekipwilotu nangwa kivuluko kyakuvulukatu kintu kyaubiwene. Yesu waambile’mba: ‘Kasa muba bibye mu kundanguluka amiwa.’ (Lu. 22:19) Kivuluko kyalufu lwa Kilishitu kekimye kyakuvulukilamo Yesu byoaji. Kekimye kyakumulangulukilamo’mba mumi kabiji ubena kwingila, uji mulukumo kabiji bamupa bukalama namambo abyubilo byanji byakishinka nekwipana kwanji. Kabiji kino nakyo kyokimye kyakumwesha lukokelo kubumutwe bwa Kilishitu mambo yeutangijila mingilo mukipwilo kyabwina Kilishitu. (Kolo. 1:17-20) Bantu ba Lesa bonse bafwainwa kutanwako kukivuluko kyalufu lwa Kilishitu. Uno mwaka kikekalako panyuma yakuzhika juba pa Kina, March 28, 2002.
5 Namambo akwibikishako nakwita bantu Kivuluko sakakikyangye kubiwa, mwaka wapwa twafikile bantu 514,277 muno mu Zambia. Ngauno mwaka tukafika banga? Kijitu inge ‘tukengijishe na ngovu ne kwibikako atwe bene,’ kukwasha bantu bavula kuba’mba bakatanweko.—1 Timo. 4:10, NW.
6 Kununga pakutanwa ku Kijiilo kya Nkambo, twayai twingile nangovu mwingilo wamubujimi. Kwakubula nangwa kuzhinaukatune, balongo nebanyenga bavula bakengilako mwingilo wabupainiya bwakukwasha pañondo umo nangwa kukilapo. Pamwaka pamwaka mumyaka yapitapo itanu, twajinga naavaleji yabantu 17,488 baingijileko bupainiya bwakukwasha mukimye kya Kivuluko, kutatula March kufika mu May. Nanchi mwakonsha kunengezha mingilo yenu bulongo kuba’mba mukekaleko nakimye kyakwingilako bupainiya bwakukwasha uno mwakanyi? Jikekala jishinda jawama jakumwesheshamo lusanchilo lwenu lwakishinka kubupe bwa Lesa bwakitapisho kya Kilishitu. Mukamona bibusa bya Yehoba, byonka byamwene bano baji panshipo.
7 Nyenga umo wingila kimye kyonse nkito yakumubiji wanembele byoaingijileko bupainiya muñondo wa March mwaka wapwa amba: “Mwingilo Wetu wa Bufumu wa February 2001 watundaikile bonse bajinga nakimye kuba’mba bengileko bupainiya bwakukwasha mukimye kya Kivuluko kyajingako. Pakuba ñondo wa March byoaji na Bibelushi bitanu, kino kyaswañene namutanchi wami yenatanchikile kubilamo bintu. O, mwane nanembeshe nekunembesha.” Byoatatwile kwingila muuno ñondo, wibikijile kikonkwanyi kyakutatula lufunjisho lwa Baibolo lwapanzubo. Abya uno nyenga watatwilenyi? Ee, kimye aingijile maawala 52 mubusapwishi muyewa ñondo. Wapezhezheko kwamba’mbaka? Waambile’mba “muji mfweto yawama bingi umvwe twaingijisha nangovu.”
8 Nga kisemi nakyo kimwenamo ñanyi mfweto umvwe kebengijile pamo bupainiya? Kisemi kimo kyabantu bana baingijileko bupainiya mu April mwaka wapwa kyataine kuba’mba yeñondo yebakabula kulubamo. Bainabo baambile’mba: “Byokyasangajikilengapo pajuba nepajuba mambo twakwatankene pamo mumwingilo! Kimye kyakuja kajo kamulajilo kyawaminenga mambo twisambilenga pamingilo yotwaingijile kimye kyamute.” Mwana wamulume waambile’mba: “Neyowele bingi kwingila na Batata mwingilo wamubujimi mukachi kamulungu mobengijila nkito yakumubiji.” Bashabo banungilepo’mba: “Byonji mutwe wakisemi, naumvwine bingi bulongo kuyuka’mba tubena kwingijila pamo muuno mwingilo wanema mukimye kyetu.” Nanchi nenuwa mwakonsha kwingijila pamo nakisemi kyenu kyonsenyi? Ikalai bonse pamo mukisemi mwisambe nekumona umvwe kyakonsheka kisemi kyonse kwingilako bupainiya bwakukwasha mukino kimye kya Kivuluko.
9 Nanchi Twakonsha Kulenga March Kwikala Ñondo Wawamishanyi? Kuntatwilo ya 2000, mu Mwingilo Wetu wa Bufumu mwajinga jipuzho jakuba’mba: “Nanchi Twakonsha Kulenga April 2000 Kwikala Ñondo Wawamishanyi?” Mukumbu wajinga’mbaka? Bibelengelo byavula byabaijileko. Bapainiya bakukwasha bajinga 10,083 muñondotu umo kukila pabañondo bonse. Kunungapo maawala, kutambika magazini, mafunjisho a Baibolo, nekubwelako byavujijileko. Nanchi mubena kuvuluka lusekelo lwajinga nakipwilo kyenu pamwingilo wakumupashi waingijiwe muyewa ñondo wiikajilanyi? Abya twakonsha kwingila byonka byotwaingijile nangwa kukilapo uno mwaka? Umvwe bonse twaingijila pamo, ñondo wa March 2002 ukekala “Ñondo Wawamisha.” Mamboka March?
10 Kuji bishinka bibiji byalengela’mba March ekale ñondo wamwingilo wiikajila. Kitanshi, Kivuluko kikekalako pepi nampelo ya March. Kino kitupako kimye kyakwichilamo bantu bavula kwiya nakutanwako. Kyabubiji, Uno mwaka ñondo wa March uji nabibelushi bitanu, akyo kyapana jishuko kuboba bengila nkito yakumubiji nebaana basukulu kwingilako mwingilo wabupainiya bwakukwasha. Mamboka akubujila kwikala panshi lonka luno nekutanchika mingilo yenu bulongo, kwingijisha Kalenda iji mukino kyamukachi? Mwingilo wabupainiya wakonsha kupela bingi kukila nebamo byobalanguluka. Kyakumwenako, umvwe mwatanchika maawala 8 akwingila mubujimi pakibelushi kimo kimo mubibelushi byonse bitanu, kilumbulula kuba’mba mukanungapotu maawala 10 mumoba ashalako muñondo pakuba’mba mufikizhe maawala akebewa 50.
11 Bakulumpe mukipwilo bafwainwa kuba byepi pakuba’mba bakwashe bonse mukipwilo ‘kusapwila mambo a Lesa’? Bafwainwa kwambanga byambo byakutundaika pakwamba majashi nepakwisambatu. Batangijila Lufunjisho lwa Buku pa Kipwilo nebankwasho babo bafwainwa kwisamba naumo umo yebaji nanji jibumba jimo nekumukwasha. Tubyambo tucheche twakwibakosesha nangwa kupanapo mashinda amo mwakwingijila byobyonka bikebewa kwamba nabo. (Mana. 25:11) Bavula bakamona kuba’mba inge bafumyapo mingilo imo pamutanchi wabo, bakonsha kumonapo kimye kyakwingijilamo mwingilo wabupainiya bwakukwasha. Mubipwilo byavula, bakulumpe mukipwilo nebankwasho pamo nebakazhi babo bekala bakumwenako mukwingijila pamo bupainiya bwakukwasha mukimye kya Kivuluko. Kino kitundaika basapwishi bavula nabo kwinungako. Namambo akubela-bela nebintutu bikwabo, basapwishi bamo bakankalwa kwingilako bupainiya, bino bafwainwa kutundaikwa kumwesha lusanchilo lwabo kwingilako uno mwingilo pamo nakipwilo papelela ngovu yabo.
12 Umvwe bakulumpe mukipwilo banengezha bulongo, mwingilo uya palutwe. Kupwila kwakuya mumwingilo wamubujimi kwafwainwa kubiwanga pakimye kyafwainwa mumulungu yense. Umvwe kyakonsheka, mukulumpe utangijila mwingilo wamubujimi ukatongwela jimo balongo bafikapo kutangijila kupwila konse kwakwinengezha kuya mumwingilo. Kikebewa kunengezha bulongo pakuba’mba kupwila konse kuvwangakotu nekimye kyomubena kwabanya basapwishi mobasakwingijila, nyaunda momusakuya nakusapwila nelulombelo kechi byakilaila pamaminiti 10 kufika ku 15 ne. (Monai mu Kabokoshi Kamepuzho mu Mwingilo Wetu wa Bufumu September 2001.) Mwafwainwa kulumbulwila bulongo kipwilo mutanchi wamwingilo byoaji muyewo ñondo nekumulamika pakipabi kyamabulañano.
13 Mwakonsha kunengezha nyaunda yabaya yakusapwilamo. Mukulumpe utangijila mwingilo wamubujimi wafwainwa kumonañana namulongo utala pamanyaunda kuba’mba banengezhe kukasapwila mumanyaunda mobabula kusapwila javula. Mwafwainwa kuyuka pamazubo pomwabula kutana bantu, kusapwila mumikwakwa nemumashitolo, nebusapwishi bwamabanga. Umvwe kyakonsheka, mwakonsha kubula basapwishi bamo byakusapwila busapwishi bwapalamya
14 Bakwashai Bengile Nejikwabo: Abya kujipo bamo munyaunda yakipwilo kyenu bakoka kuya nakusapwila mambo awamanyi? Bantu bauno mutundu ke bantu bakiji mukipwilo, onkao mambo bafwainwa kukwashiwa. (Sala. 119:176) Pakuba mpelo yaino ntanda byokeifwenye pepi nentanda ipya nayo byoiji pepi, twafwainwa kutwajijila kukwasha bakoka. (Loma 13:11, 12) Kukila pamyaka itanu yapitapo, bantu kukila pa 14,500 pamwaka pamwaka bakwashiwa kutendeka kwingila jibiji. Twafwainwa kuba byepi pakuba’mba tukwashe bantu bavula kutwajijila jibiji nabutemwe neluketekelo lobajinga nalo kimye batatwile mwingilo wabo?—Hebe. 3:12-14.
15 Jibumba jabakulumpe mukipwilo besambe byobakonsha kukwasha bakoka pamyaka icheche yapitapo. (Mat. 18:12-14) Munembeshi apituluke Mubikachi Byamingilo ya Basapwishi Mukipwilo nekumona bakoka. Lunengezho lwakufwakasha nakukwasha bano bantu palwendo lwa bukafunga lwafwainwa kwikalako. Kimo kimye mukulumpe mukipwilo wakonsha kukeba kufwakeshapo musapwishi umo kampe mambo akuba beyukile kala kabiji besambanga pamo nayewo muntu, nangwapo kampe kutuma basapwishi bakwabo kuya nakukamukwasha. Kampe abo basapwishi bobafunjishanga yewo muntu ubakoke kabiji pakino kimye kwandapo waswa kukwashiwa jibiji. Twaketekela namba, bavula bamuboba bakokele bakatundaikwa kutatula jibiji kusapwila mambo a Lesa. Umvwe baitabizhiwa, kyawama kutatula kyonka kimye kya Kivuluko!—Monai mu Kabokoshi Kamepuzho kajimu Mwingilo Wetu wa Bufumu wa November 2000 pakuba’mba muyukileko byavula.
16 Nanchi Bakwabo Nabo Bafikapo Kusapwilanyi? Yehoba watwajijila kupesha bantu banji kupichila mukuleta ‘bya buneme bya ba mumikoka yonse.’ (Hagai. 2:7) Pamwaka pamwaka bantu bavula bekala basapwishi babula kubatizwa. Bobañanyi bano? Baana ba Bakamonyi bakwa Yehoba kubikakotu neboba bafunda Baibolo babena kuya palutwe. Tuyuka byepi’mba bafikapo kwikala basapwishi bamambo awama?
17 Baana ba Bakamonyi Bakwa Yehoba: Pamyaka yavula baana babacheche baya pamo nabansemi yabo mubusapwishi bwakunzubo nenzubo, nangwa kyakuba bakyangye kwikala basapwishi babula kubatizwa. Ñondo wa March yewafwainwa kwibatundaikilamo kutatula. Mwakonsha kuyuka byepi’mba mwanenu wafikapo? Buku wa Abateyanishiwa ku Kupwilikisha Ubutumikishi Bwesu papeja 100 walumbulula’mba mwakonsha kuyuka “umvwe mwana mwine uji nabyubilo byawama kabiji wakonsha kwilumbulwila luketekelo loanji nalo lwa mambo awama kubakwabo, uji nenakizaku kyakusapwila kufuma panshi yamuchima wanji.” Umvwe mwamona’mba mwanenu wafikapo kwikala musapwishi, bulaipo mukulumpe umo wamu Kometi ya Mwingilo mu Kipwilo.
18 Bafunda Baibolo Bafikapo: Panyuma yakuba ufunda Baibolo wafunda maana nekutatula kutanwanga kukupwila, kimo kimye wakonsha kukeba kwikala musapwishi wamambo awama a Bufumu. Umvwe yenu mubena kufunjisha yewo muntu, akilangulukai paano mepuzho: Nanchi awo muntu ubena kuya palutwe, kwesakana namyaka yanji yakusemwa nepapelela bulume bwanjinyi? Watatula kubulako bakwabo lwitabilo lwanji kumbaji? Abya wavwala “bumuntu bupya” nyi? (Kolo. 3:10) Nanchi wafikizha mizhilo ikebewa kumuntu kwikala musapwishi wabula kubatizwa, iji pamapeja 97-9 mubuku wa Abateyanishiwa nyi? Umvwe ibyo, monañanai nabamu Kometi ya Mwingilo mu Kipwilo kuba’mba batongole bakulumpe mukipwilo babiji bamonañane nenu pamo neyemufunjisha Baibolo. Umvwe wafwainwa kwikala musapwishi, bano bakulumpe mukipwilo babiji bakamubula kutatula kuya mumwingilo wakusapwila.
19 Nga mu April ne May? Bano nabo bakekala bañondo beikajila bakwingijilamo mwingilo wamubujimi. Bavula baingilako bupainiya mu March bakonsha kwingilako nemu April ne May. Mu April ne May, tukatambikanga magazini a Kyamba kya Usopa ne Loleni! mumwingilo. Byoakwashapo boba beatanga! Ano magazini aingila mwingilo wabaya bingi mukongezha kibelengelo kyabasapwishi mwaya ntanda yonse. Tukengila bingi nangovu mu April ne May kutambika magazini kubantu bavula. Inengezhai lonkaluno kuba’mba mukengileko.
20 Kwesakana nabyomwinengezha kukengila nangovu mwingilo wabusapwishi, abya mukakeba kunungako magazini akwabo akongezha paomutambwila mukipwilonyi? Mumwaka yense wamwingilo, tutambika Kyamba kya Usopa ne Loleni! Kibelushi nekibelushi, mambo jo Juba jotushajikilamo Magazini. Nangwa byonkabyo, bavula byobakengilanga mwingilo wabupainiya bwakukwasha kabiji nebyotukatambikanga magazini pabañondo bonse babiji, kyawama kunungako magazini akwabo akongezha paoda yenu yamagazini omutambwila mukipwilo. Umvwe mukeba kunungako, bulai bukiji-bukiji wamwingilo utala pamagazini mukipwilo kyomujimo. Kabiji wamwingilo utala pamabuku naye wafwainwa kumona’mba matalakiti a Nanchi Mukeba Kuyuka Byavula pa Mambo a Baibolo Nyi? poaji avula akuba bonse bakekale nao.
21 Bavula basanchila bingi byambo bitanyiwa mu Mwingilo Wetu wa Bufumu biji pamutwe wakuba’mba “Byakwamba Pakutambika Magazini.” Nanchi mwashukilwa ino ñambilo nekwiifunda kuba’mba mutambikilengamo magazini nyi? Abya kuba mwasalululapo kimye kimo kyomufunjilamo lufunjisho lwa Baibolo lwa kisemi kufunjilamo ino ñambilo yakutambikilamo magazini nenyi?
22 Ingilai Nangovu Mukino Kimye kya Kivuluko: Byonka byasanchile Paulo, twayai netuwa tusanchile Yehoba pamambo a “kya bupe kyanji kyabulwa ne mwa kwikitelela” kupichila mukwingila nangovu mingilo yakumupashi yanengezhiwa kwingijiwa mukino kimye kya Kivuluko. Kino kyavwangamo (1) kukatanwako kukipwilo kyanema kyauno mwaka nangwa’mba Kijiilo kya Nkambo pa Kina, March 28, 2002; (2) kukwasha bakoka kwikala jibiji na ‘butemwe [bobajinga nabo] patanshi’ (Lum. 2:4; Lo. 12:11); (3) Kukwasha baana betu nebonse botufunjisha Baibolo abo bafikapo kwikala basapwishi babula kubatizwa; ne (4) kwingila mwingilo wabusapwishi papelela ngovu yetu, nekwingilako bupainiya bwakukwasha mu March nebañondo bakwabo.—2 Timo. 4:5.
23 Tubena kulomba namba atweba bonse tukengile nangovu kusapwila mambo awama a Bufumu mukino kimye kya Kivuluko. Mujino jishinda tukamwesha lusanchilo lukatampe pabintu byonse Yehoba byoetubila.
[Kitenguluzha pa peja 6]
Mutanchi wa Muntu Mwine Wamumwingilo wa Mubujimi wa March 2002
Pa Mulungu Pa Kimo Pa Kibiji Pa Kisatu Pa Kina Pa Kitanu Pa Kibelushi
1 2
Juba ja Magazini
3 4 5 6 7 8 9
Juba ja Magazini
10 11 12 13 14 15 16
Juba ja Magazini
17 18 19 20 21 22 23
Juba ja Magazini
24 25 26 27 28 29 30
MEMORIAL Juba ja Magazini
AFTER
31 SUNDOWN
Nanchi mwakonsha kutanchika mutanchi wakwingijilamo maawala 50 mumwingilo wabupainiya bwakukwasha mu March nyi?