Ambainga Mingilo ya Yehoba ya Kukumya
1. Ñanyi mingilo imo ya kukumya anweba kikatakata yo musanchila?
1 Ka paji nangwa umo wakonsha kwesakana na Lesa wetu mukatampe, Yehoba ne! Davida wanembele’mba: “Anweba Yehoba Lesa wami, mingilo ya kukumya yo mwingila yo yavula, ne milanguluko yenu yo mwitulanguluka nayo pamo. Ka paji nangwa umo wa kwimutanchikilayo bulongo ne.” (Sala. 40:5) Mingilo ya Yehoba ya kukumya yavwangamo ne kulengwa kwa ntanda, Bufumu bwa bu Mesiasa, byubilo bya kifyele ku bantu banji, ne mwingilo wa kusapwila mwaya ntanda yonse. (Sala. 17:7, 8; 139:14; Da. 2:44; Mat. 24:14) Butemwe bo twamutemwa Yehoba ne lusanchilo lwetu pa bintu byonse byo auba lwitutundaika kwamba ku bakwetu pe aye. (Sala. 145:5-7) Mu March, April, ne May, tukekala na kimye kya kubilamo bino pakatampe.
2. Nga atweba bunke tumwenamo byepi mfweto mu bupainiya bwa kukwasha?
2 Kwikala Painiya wa Kukwasha: Nanchi mwakonsha kunengezha mutanchi wenu kuba’mba mukengileko maawala 50 mu mwingilo pa ñondo umo nangwa kukilapo mu bano bañondo ba mwingilo wiikajila nyi? Kikekala kyanema bingi lupimpu luji lonse lo mukoba mu mingilo yenu ya kimye kyonse. (Efi. 5:16) Bavula batana’mba kwingilako bupainiya bwa kukwasha kwibakwasha bingi kuwamishako mwingilo wabo. Kimye kyobafika pa kibelo kya muntu bekala bakasuluka ne kwingijisha bulongo Baibolo. Kutaya kimye kyabaya mu mwingilo kwibalengela kutwajijila na kukwasha boba bobatana bakeba kufunda bukine, kabiji bamo babulanga kufunjisha lufunjisho lwa Baibolo batendeka kufunjisha lufunjisho lumo kimye kyo babena kwingila bupainiya bwa kukwasha. Byo kiji kuba’mba mu bupainiya bwa kukwasha mwavwangwa ne kwingila na ngovu kukwasha bakwetu, ke mwingilo umo uleta bingi lusekelo.—Byubilo 20:35.
3. Bamo bakonsheshe byepi kwingila bupainiya bwa kukwasha nangwa kyakuba bwikalo bwabo bwakatezhe?
3 Kange mufikene kwamba’mba anweba bwikalo bwenu kuba bwimwitabizha kwingilako bupainiya bwa kukwasha ne. Mukulumpe mu kipwilo umo waingijile bupainiya bwa kukwasha mwaka wapwa wajinga na baana babiji kabiji waingilanga ne nkito ya kimye kyonse. Nga uno mulongo wajinga na bya kuba byavula waingijile byepi? Byoengila mukachi ka mulungu, wanengezhezhe kwingilanga kimye kyabaya mu mwingilo pa kibelushi ne pa mulungu, kutendeka na busapwishi bwa mu mukwakwa na kimye kya 7:00 hrs pa Kibelushi. Bakwabo bavula mu kipwilo bajinga na bwikalo nabiji buno nabo baingijileko bupainiya, kabiji bekwashishe ne kwitundaika bene na bene. Mu kipwilo kikwabo, nyenga umo wa myaka ya kusemwa 99 wafuukwile kwingila bupainiya mu May panyuma ya kumubula ku mwananji wamukazhi amba bakengijile pamo. Bakwabo mu kipwilo bamukwashishe bingi uno nyenga kuya ku nzubo ne nzubo ne ku mafunjisho a Baibolo saka baya na kumwendesha mu kakinga kanji. Kabiji wasapwilanga ne busapwishi bwa pa lamya, bwa mu mukwakwa, ne bwa kunemba makalata. Washiinwa amba uno mwingilo kechi waingijiwe mu bulume bwanji ne, ke bukwasho bwa Yehoba.—Isa. 40:29-31.
4. Ñanyi bishinka byo twafwainwa kulangulukapo kimye kyo tubena kunengezha mutanchi wa kwingila bupainiya bwa kukwasha?
4 Esekai kunemba mutanchi kwesakana na bwikalo bwenu. Mitanchi ya kumwenako iji mu uno Mwingilo Wetu wa Bufumu yakonsha kwimukwasha. Nanchi mwingila kimye kyonse nangwa kuya ku sukulu nyi? Kikatakata mutanchi wa kwingila pa kibelushi ne pa mulungu wakonsha kwimuwamina bingi. Umvwe muji na makatazho a butuntulu bwa mubiji kabiji kuba mwaingila kimye kyabaya mu mwingilo ne, kyakonsha kuwama bingi inge mwanengezha mutanchi wakuba ke mwingilekotu kakimye kacheche pa juba pa juba. Bulaiko bakwenu amba mwakebesha kwingila bupainiya bwa kukwasha. Apo kampe ne abo bakonsha kulangulukapo’mba bakengileko.
5. Bikonkwanyi ka bakyanyike byo bafwainwa kwibikila mu March, April, ne May?
5 Mashinda Akonsha Kwingijisha Bakyanyike: Yehoba usangalala bingi umvwe bakyanyike ke bambe pa mambo a mingilo yanji ya kukumya. (Sala. 71:17; Mat. 21:16) Umvwe wimwanyike kabiji wabatizwa, kampe wakonsha kwingilako bupainiya bwa kukwasha pa ñondo ye mwashinka. Umvwe kechi wakonsha kwingila bupainiya bwa kukwasha ne, abya wakonsha kwibikila bikonkwanyi bya kubaisha ne kuwamishako mwingilo wobe mu bano bañondo nyi? Umvwe wayanga mu mwingilo na bansemi yobe bino ukyangye kwikala musapwishi wabatizwa, kino kyo kimye kyakonsha kukuwamina kuba’mba weseke kwendapo waitabizhiwa. Kechi wafwainwa kuba ke wiumvwe amba patanshi ukikale sendwe mu kukumbula mikumbu ya mepuzho a mu Baibolo nangwa amba wafwainwa kuyuka bintu byonka bakulumpe babatizwa byo bayuka ne. Nanchi umvwa mafunjisho apela a mu Baibolo nyi? Abya ulondela byubilo byawama byanembwa mu Baibolo nyi? Ukeba kuyukanyikwa amba wi Kamonyi wa kwa Yehoba nyi? Kyawama nanchi isambe na bansemi yobe pa kino. Bakonsha kunengezha kukesamba na bakulumpe mu kipwilo pamo ne obewa kumona umvwe wafwainwa kwitabizhiwa.—Monai buku wa Abateyanishiwa, mapeja 98-9.
6. Twakonsha kukwasha byepi bantu bafunda Baibolo kwikala basapwishi ba mambo awama?
6 Kukwasha Bakwetu Nabo Basapwilenga: Bantu babena kufunda Baibolo boba bulongo nabo bakonsha kwitabizhiwa kwikala basapwishi mu kwingijila pamo ne atweba mu bañondo babena kwiya ba mwingilo wiikajila. Umvwe muji na ye mufunjisha Baibolo ubena kuyilako palutwe, ambilai mukulumpe wa lufunjisho lwa buku nangwa mukulumpe utangijila mwingilo emukwasheko. Umo wa mwi abo wakonsha kwikala pamo ne anweba kimye kya lufunjisho na kumona inge awo muntu ubena kuba bulongo. Umvwe wauba bulongo kabiji wakebesha kwikala musapwishi, mukulumpe utangijila wafwainwa kubuula bakulumpe mu kipwilo babiji kumonañana ne anweba pamo na ye mufunjisha. (Monai Kyamba kya usopa kya, November 15, 1988, peja 17.) Umvwe uno muntu waitabizhiwa, tatulaiko kumufunjisha mwingilo ponkapotu.
7. Basapwishi babula kutanwa ku kupwila kimye kyonse ne bakoka bakonsha kukwashiwa byepi?
7 Bakulumpe ba lufunjisho lwa buku bafwainwa kutesha muchima ku yense wa mu jibumba jabo wakoka nangwa ubula kutanwa ku kupwila kimye kyonse. Babulai amba mwakeba kwingila nabo mu mwingilo. Umvwe bakoka pa kimye kyabaya, kyawama bakulumpe mu kipwilo babiji patanshi ku kisamba nabo ne kumona umvwe bafwainwa kwitabizhiwa. (Monai Mwingilo Wetu wa Bufumu wa November 2000 Kabokoshi ka Mepuzho.) Bano bantu umvwe bamona kizaku kiji na kipwilo mu bano bañondo ba mwingilo wiikajila kyakonsha kwibalengela kwikala na lusekelo lwa kwingilanga kimye kyonse mu mwingilo.
8, 9. Bakulumpe mu kipwilo bafwainwa kuba byepi pa kuba’mba batundaikañane kwingila mwingilo wiikajila?
8 Nengezhezhai Jimo Lonka Luno Kuba’mba Mukengileko Pabaya: Bakulumpe mu kipwilo, tatulaiko lonka luno kutundaika kipwilo kuba’mba bakengileko bupainiya bwa kukwasha. Mwakonsha kwingila mwingilo wabaya bingi umvwe anweba bene mwatundaikañana ne kwikala bakumwenako bawama. (1 Pe. 5:3) Nga kunyuma kwe, kipwilo kyajinga na bapainiya bakukwasha banga? Abya uno mwaka bakonsha kuvujilako nyi? Bakulumpe ba lufunjisho lwa buku ne bankwasho babo bafwainwa kumonapo mashinda amo a kukwashishamo baji mu jibumba jabo kuba’mba banungulwilemo mwingilo wabo. Bakulumpe batangijila mwingilo bakonsha kunengezha mutanchi mukwabo wa kuya mu mwingilo wa mu bujimi. Bujilai jimo kipwilo pa lunengezho lwaubiwa. Monai’mba mwatongola basapwishi bafikapo kutangijila mwingilo ne kumona’mba kupwila kwa kuya mu mwingilo kwatatula ne kupwa mu kimye kyatongolwa. (Monai Mwingilo Wetu wa Bufumu wa September 2001 Kabokoshi ka Mepuzho.) Kabiji mukulumpe utangijila mwingilo wafwainwa kunengezha ne mpunzha yabaya ya kwingijilamo, magazini ne mabuku avula.
9 Mwaka wapwa bakulumpe ba mu kipwilo kimo batendekele kutundaikañana saka kwakishala kimye kyabaya kufika ku bañondo ba march, April ne May kuba’mba bakengileko bupainiya bwa kukwasha, kino kyalengejile bavula kunembesha. Banengezhezhe kupwila kukwabo kwa kuya mu mwingilo—kupwila kumo kwa kuya mu busapwishi bwa mu mukwakwa kwaubiwanga pa 5:30 hrs, ne kukwabo pa 15:00 hrs ku boba bakombokelenga kufuma ku sukulu, ne kupwila kukwabo pa 18:00 hrs ku boba bakombokelenga kufuma ku nkito. Kunungapo, kupwila kukwabo kusatu kwa kuya mu mwingilo wa mu bujimi kwanengezhiwe pa Kibelushi. Bantu 66 bobanembeshe bupainiya bwa kukwasha mu April!
10. Bisemi byafwainwa kunengezha byepi kuba’mba bibaisheko mwingilo wabyo?
10 Kimye kya lufunjisho lwenu lwa kisemi lwalondelapo, nga mambo ka ne kwibikila bikonkwanyi bya mu bañondo babena kwiya ne? Umvwe mwakwatankena pamo ne kunengezha bulongo, bamo nangwatu bonse mu kisemi bakonsha kwingilako bupainiya bwa kukwasha. Umvwe kino kyashupa, ibikilai bikonkwanyi bya kubaishako mwingilo kupichila mu kunungako bimye byo mwingijilamo nangwa kuyanga na kusapwila pa bimyetu bikwabo. Kibikai kino mululombelo pamo na kisemi kyenu kyonse. Ketekelai kuba’mba Yehoba ukemupesha pa kwibikishako kwenu.—1 Yoa. 3:22.
11. (a) Ñanyi mingilo yawama kitapisho kya kwa Kilishitu yo kyaingijile? (b) Ñanyi kimye ne mpunzha kukekela Kivuluko koko kwenu?
11 Mwingilo Mukatampe wa Lesa wa Kukumya: Butemwe bukatampe Yehoba boamwesha ke bupe bwa Mwananji kwikala mfuto ya mambo etu. (1 Yoa. 4:9, 10) Kitapisho kya mfuto kyo kitendekesho kya kufuta bantu ku bundengamambo ne lufu. (Loma 3:23, 24) Mashi a kwa Yesu aichikile amwesheshe bukine bwa lulayañano lupya, kulengela bantu bambulwakoloka kutambulwa kwikala baana ba Lesa ne kwikala na luketekelo lwa kulama mu Bufumu bwa mwiulu. (Yele. 31:31-34; Mako 14:24) Kyakilamo kunema ke kya kuba’mba, bwikalo bwa lukokelo bonse bwaoloka bwa kwa Yesu bwatumbijikile jizhina ja Yehoba. (Mpitu. 32:4; Mana. 27:11) Pa Mulungu, April 4, panyuma ya kuzhika juba, kukekala Kivuluko kya kuvuluka lufu lwa kwa Kilishitu mwaya ntanda yonse.
12. Kutanwa ku Kijiilo kya Nkambo kya Mabanga kwakonsha kukwasha byepi boba baji na lusekelo lwa kukeba kufunda bukine?
12 Kuvuluka Kijiilo kya Nkambo kya Mabanga kutumbijika mingilo ikatampe ya Yehoba ya kukumya. Jashi jitulengela kumvwisha ne kwitulengela kwikala na lusanchilo kwi Yehoba pa byo aubile pa kupana mukuzhi. Aba baji na lusekelo lwa kukeba kufunda bukine baji mu luonde bakamona mingilo ikwabo ya Lesa ya kukumya. Bakamona kukwatankana ne butemwe Yehoba boafunjisha bantu banji kuba’mba bebumweshenga. (Efi. 4:16, 22-24; Yako. 3:17, 18) Umvwe muntu watanwa ku kino kivuluko kyanema, kyakonsha kumulengela walangulukapo bulongo, onkao mambo twakeba namba bantu bavula bakatanweko.—2 Ko. 5:14, 15.
13, 14. Bañanyi botwakonsha kwita ku Kivuluko, kabiji tukebeta byepi?
13 Kwitako Bakwetu Nabo Bakatanweko: Tendekaiko lonka luno kunemba mutanchi wa mazhina a bantu bomuketako. Pa mutanchi wenu pafwainwa kwikala ne ba mu kisemi kyenu babula kwitabila, bakinkalankulo, bayukane ba kunkito nangwa ku sukulu, bo mwafunjishanga Baibolo kala nangwa bo mukifunjisha, ne bonse bomubwelako. Bakulumpe ba lufunjisho lwa buku bafwainwa kumona’mba pa mutanchi wabo babikapo ne basapwishi bakoka.
14 Mwatundaikwa kwitako bantu bavula kwesakana na ponka pomwakonsha kupelela. Juba ja April 4 byo jikanangijilanga pepi, vululaiko boba bonse baji pa mutanchi wenu, mwakonsha kwibendela nangwa kwibatuminatu lamya.
15. Twakonsha kumwesha byepi muchima wa kutambwila benyi pa juba ja Kivuluko?
15 Pa Kivuluko: Esekeshai na ngovu yenu yonse kufika bukiji juba ja Kivuluko. Mweshai muchima wa kusekelela benyi ne kwibemuna. (Loma 12:13) Yenu muji na mutembo wabaya wa kumona bantu bomwaichile. Balekai beumvwe bakasuluka, kabiji bulaiko ne bakwenu mu kipwilo nabo bebayuke. Kampe mwakonsha ne kwikela pamo kipikipi. Kabiji umvwe paji wabula Baibolo nangwa lwimbo, ingijishai bonse yenkao wenu nangwa bengijishe pamo na bakwenu. Panyuma ya kivuluko, inengezhai kukumbula mepuzho onse o bakonsha kwipuzha. Umvwe bamo kyo kimye kyabo kitanshi kutanwako, bepuzhai umvwe bakonsha kutemwa kufunda byavula pa Byambo bya Lesa ne nkebelo yanji. Babulai mutendeke kwibafunjisha lufunjisho lwa Baibolo lwa pa nzubo.
16. Kika kyafwainwa kubiwa kukwasha boba batainwe ku Kivuluko pa kuba’mba bakomenga ku mupashi?
16 Twajijilai Kukwasha Boba Batainweko: Milungu ya panyuma ya Kivuluko, aba batainweko bakonsha kutemwa kwibakwasha. Kino kyavwangamo ne boba batanwanga kimye kyonse ku kupwila pano luno batanwakotu jimo jimo. Bakulumpe mu kipwilo bafwainwa kumona’mba bano bantu kechi bebalubako ne. Bafwainwa kukebesha kuyuka bishinka byalengejile kubula kutwajijila kukoma ku mupashi ne kwibajimunako bayuke ano moba o tujimo byoaji. (1 Pe. 4:7) Bakwashai bonse bamone buwame buji mu kulondela lujimuno lwa mu Binembelo lwa kupwila pamo kimye kyonse na bantu ba Lesa.—Hebe. 10:24, 25.
17. Mambo ka o twafwainwa kutwajijila kwamba pa mingilo ya Yehoba ya kukumya?
17 Mingilo ya Yehoba yakilamo ku kumisha kya kuba’mba kechi twakonsha ne kwiiyuka yonse ne nangwa kyakuba twikale byepi myaka ne myaka. (Yoba 42:2, 3; Sapwi. 3:11) Onkao mambo, kechi tukakajilwapo kintu nangwa kimo kya kukankalwa kumutotelapo ne. Mu kino kimye kya kunangijila ku Kivuluko twakonsha kumwesha lusanchilo lwetu pa mingilo ya Yehoba ya kukumya kupichila mu kwingila na ngovu kubaishako mwingilo wetu.
[Caption on page 5]
Nanchi Mwakonsha Kwingilako Bupainiya bwa Kukwasha Kupichila mu Kwingijisha Mutanchi Umo pa Iye Nyi?
March Mul Kim* Kib* Kis* Kin Kit Kib Kibelengelo
pa Ñondo
Pa juba pa Juba 2 1 1 1 1 1 5 51
Moba Abiji 0 5 0 5 0 0 0 50
Kibelushi ne
Mulungu Kwapwa 5 0 0 0 0 0 8 52
Kibelushi ne Mulungu
ne Moba Abiji
Mukachi ka Mulungu 2 0 0 2 0 2 6 50
April Mul Kim Kib Kis Kin* Kit* Sa Kibelengelo
pa Ñondo
Pa Juba pa Juba 2 1 1 1 1 1 5 50
Moba Abiji 0 0 0 0 5 5 0 50
Kibelushi ne
Mulungu Kwapwa 5 0 0 0 0 0 8 52
Kibelushi ne Mulungu
ne Moba Abiji
Mukachi ka Mulungu 2 0 0 2 0 2 6 50
May Mul* Kim* Kib Kis Kin Kit Kib* Kibelengelo
pa Ñondo
Pa Juba pa Juba 2 1 1 1 1 1 4 51
Moba Abiji 0 5 0 0 0 0 5 50
Kibelushi ne
Mulungu Kwapwa 3 0 0 0 0 0 7 50
Kibelushi ne Mulungu
ne Moba Abiji
Mukachi ka Mulungu 2 0 0 2 0 2 5 51
* Jitanu pa Ñondo