Londololainga Byawamisha bya Yehoba

1. Ki ka kitulengela kulondolola byawamisha bya Yehoba?

¹ “Bukata, ne bulume, ne lukumo, ne lushinjilo, ne buneme, byo byenu anweba Yehoba; mambo byonse biji mwiulu ne biji pano pa ntanda byo byenu.” (1 Moba. 29:11) Nga butemwe ne lusanchilo lwetu kwi Yehoba lwitulengela kuba ka? Lwitulengela ‘kulondolola byanji byawamisha, yenka aye witwichile byo twaji mu mfishi, twikale mu kyeya kyanji kya kukumya.’ (1 Pe. 2:9) Kechi twakonsha kuleka kubula bantu pa mambo a Lesa wetu mukatampe ne! Tukekala na mashuko akatampe bingi a kulondolola bya byawamisha bya Yehoba mu bañondo ba March, April ne May.

2. Ñanyi mukwekele wiikajila wanengezhiwa kuyukanyikisha Kivuluko, kabiji bañanyi bakonsha kwingilako?

² Mukwekele Wiikajila wa Kuyukanyikisha Kivuluko: Pa Kimo, April 2, tukamwesha byawamisha bya Yehoba kupichila mu kuvuluka Kijiilo kya Nkambo kya Mabanga. Kukekala kusampanya mwaya ntanda bipepala biikajila bya kwichilapo bantu ku kino kijiilo kyanema kutendeka pa 17 March kufika pa 2 April. Bonse batundaikwa kukengilako na ngovu. Kino kikekala kimye kyawama bingi ku bakatataka kutendeka kusapwila mambo awama umvwe baitabizhiwa. Umvwe muji na bo mufunjisha Baibolo nangwa baana bakonsha kuba bulongo, bulai bakulumpe mu kipwilo.

3. Twakonsha kwamba’mba ka pa kwita bantu ku Kivuluko?

³ Uno mukwekele ukekala nabiji yewa wajingako kimye kya kupwila kwa nkambi kwa “Kupokololwa Kujitu Pepi!” Bipwilo bakebitumina bipepala byavula bya kwichilapo bantu kuba’mba musapwishi yense akekale na makope 8. Kange mukavuzhe bya kwamba ne, mwakonsha kwambatu’mba: “Tubena kwimwita namba mukeye ku kivuluko kyanema kibena kwiya kyubiwa pa mwaka pa mwaka. Tukemutambwila bingi. Byambo byaamba pa kino kivuluko biji pa uno pepala.” Pano bino, umvwe mwina nzubo uji na mepuzho, akumbulai. Kibaba kiji mu bya kulumbulula kyaamba pa Kijiilo kya Nkambo kya Mabanga mu buku wa Baibolo Ufunjisha kutendeka pa peja 206 kyakonsha kwimukwasha kulumbulwila muntu kivuluko byo kiji. Ku mpelo ya milungu, tukashanga magazini akatataka pamo na bipepala biikajila bya kwichilapo bantu. Nembai mazhina a bonse bamwesha lusekelo kabiji ne kunengezha kukabwelako.

4. Nga bipepala biikajila bya kwichilapo bantu ku Kivuluko bikapanwanga byepi?

⁴ Umvwe kyakonsheka, mwafwainwa anweba bene kupana uno pepala wiikajila ku mwina nzubo. Nembai mazubo po mwabula kutana bantu kabiji ne kukabwelako kimye kikwabo. Bipwilo bikashala na mulumba wa bino bipepala bya kwichilapo bantu, bakonsha kwibisha pa mazubo po babula kutana bantu umvwe kwashala mulungu umo juba ja Kivuluko saka jikyangye kufika. Monai kuba’mba bantu bo mubwelako, bo mufunjisha Baibolo, balongo benu, bakwenu mo mwingijila, bakinkalankulo ne bantutu bakwabo nabo mwibapako uno pepala.

5. Mambo ka o twafwainwa kutendekelako lonka luno kwinengezha kukengilako bupainiya bwa kukwasha?

⁵ Bupainiya bwa Kukwasha: Nanchi mwakonsha kulondololako pakatampe byawamisha bya Yehoba kupichila mu kwingilako bupainiya bwa kukwasha mu March, April ne May nyi? Kuba bino kukakebewanga kupimpulako mutanchi wa mingilo yenu ya juba ne juba. (Efi. 5:15-17) Mwakonsha kuketekela’mba kwingilako pakatampe mu mwingilo wa Yehoba kukemuletela lusekelo ne mapesho a Yehoba. (Mana. 10:22) Kimye kya Kivuluko byo kyafwenya kala pepi, kino kyo kimye kya kutendeka kwinengezha.—Mana. 21:5.

6. Twakonsha kufunjilako ka ku byaubile nyenga umo wa myaka ya kusemwa 90 waingijileko bupainiya bwa kukwasha mwaka wapwa?

⁶ Nyenga umo wakikulumpe wa myaka ya kusemwa 90 waingijileko mwingilo wa bupainiya bwa kukwasha mwaka wapwa. Waambile’mba: “Nangwa kya kuba natemwa bingi kujima mapoka kabiji nakebelenga kutendeka kubyala, nalangulukile’mba nafwainwa kuyuka mingilo yanema. Na mulanguluko wa kukeba kubika bintu bya Bufumu palutwe, nafuukwilepo kwingilako mwingilo wa bupainiya bwa kukwasha mu March.” Nanchi wamwenejilemo na mambo a mwingilo wanji nyi? Waambile’mba: “Napwanañene bingi na kipwilo kabiji kino kyandengela kufwenyesha kwipi ne Yehoba.” Nanchi twakonsha kuyuka mingilo yanema ne kubapo lupimpu lwaubilepo uno nyenga byonka byo kibena kukebewa nyi?

7. Nanchi kyashupa kwingilako bupainiya bwa kukwasha nyi?

⁷ Kufikizha maawala 50 akebewa ku bapainiya ba kukwasha kechi kyakonsha kukatazha kwesakana na byo mwakonsha kulanguluka ne. Langulukaipo na lulombelo pa mingilo yenu yo muba moba onse, lengai mutanchi ne kumunemba pa mutanchi wenu wa mingilo ya ku mupashi. Yenu mwayuka bwikalo bwenu byo buji. Inge kya kuba mubela bela kabiji mwakepelwa bulume, kampe mwakonsha kwingilangako mu mwingilo maawala abiji pa juba pa juba. Umvwe mwingila nkito ya ku mubiji nangwa muya ku sukulu, mwakonsha kwingila bupainiya bwa kukwasha kupichila mu kuya mu mwingilo kimye kya mabanga nangwa ku mpelo ya milungu.

8. Ki ka kyalengejile bamulume ne mukazhi bamo kwingilako bupainiya bwa kukwasha?

⁸ Bavula bengijila pamo bupainiya bwa kukwasha na bisemi byabo. Mu myaka ya kunyuma kwe, bamulume ne mukazhi bamo bazhinaukilenga kunembesha bupainiya bwa kukwasha na mambo kulanguluka’mba bwikalo bwabo kechi bwibaswishishe ne. Baubilepo byepi? “Twalombele kwi Yehoba namba etukwashe kwingijila pamo kintu kyo twakebeshe pa kimye kyabaya.” Kupichila mu kunengezha bulongo bakonsheshe kufikizha kikonkwanyi kyabo. Banungilepo kwamba’mba: “Kyawamine bingi. Twamwenejilemo bintu byawama bingi. Mulanguluko wetu ke wa kuba’mba, ne anweba esekai. Umvwe atweba twikyubile, ko kuba’mba ne anweba mwakonsha kwikyuba.”

9. Bi ka byo mwakonsha kuba kimye kya lufunjisho lwa kisemi lukalondelapo kuba’mba mwinengezhe kwingilako mwingilo wiikajila mu bañondo babena kwiya?

⁹ Kimye kyo mukekala na lufunjisho lwa kisemi lukalondelapo, mwakonsha kwabanyapo kimye kya kwisambapo pa byo mwakonsha kwingilako pakatampe mu bañondo babena kwiya. Nangwa kya kuba kisemi kyenu kyonse kechi kyakonsha kwingilako bupainiya bwa kukwasha ne, kampe umo wakonsha kwingilako kupichila mu kumukwasha ne kumutundaika ku bakwabo ba mu kisemi. Umvwe kechi kyakonsheka ne, ba mu kisemi kyenu bakonsha kwingilangako kimye kyabaya mu mwingilo kimye kya bano bañondo beikajila.

10. Mambo ka o twafwainwa kubujilako bakwetu mulanguluko wetu wa kwingilako bupainiya bwa kukwasha mu kimye kya Kivuluko?

¹⁰ Ikwashainga: Kizaku kyenu kyakonsha ne kutuntulukila bakwenu. Ambaingapo pa mulanguluko wenu wa kwingilako bupainiya bwa kukwasha. Kino kyakonsha kulengela bakwenu nabo kunembeshako. Kunungapo, aba baingilapo kala bupainiya bakonsha kwimubulako mashinda amo akemukwasha kunengezha bulongo mingilo ne mutanchi wenu kuba’mba mukafikizhe kikonkwanyi kyenu. (Mana. 15:22) Umvwe mwakonsha kwingilako bupainiya bwa kukwasha, mambo ka a kubula kwambila musapwishi mukwenu, kampe nabiji yewa ujipo mu bwikalo bo mujimo kuba’mba mukwatankene pamo mu uno mwingilo wawama?

11. Bakulumpe mu bipwilo bakonsha kulengela byepi bakwabo kwikala na kizaku kya kwingilako bupainiya bwa kukwasha mu bañondo babena kwiya?

¹¹ Bakulumpe mu bipwilo bavula banengezha kwingilako mu uno mwingilo wiikajila. (Hebe. 13:7) Kino kitundaika bingi kipwilo! Kabiji bakulumpe balengela bakwabo kwikala na kizaku kupichila mu misambo. Byambotu bicheche bya lutundaiko nangwa milanguluko yakonsha kukwasha, kampe byo byonkatu bikebewa kutundaika basapwishi bamo kwingilako bupainiya bwa kukwasha. Mukulumpe wa mwingilo kampe ukanengezha kupwila kukwabo kwa kuya mu mwingilo wa mu bujimi kuba’mba bonse bakakonshe kuyanga mu busapwishi bwa jibumba, nangwatu panyuma ya kukotoka ku nkito nangwa ku sukulu. Luno lunengezho lwafwainwa kubijikwanga kimye kyonse. Ukamonanga ne kuba’mba bonse baji na mabuku awaina ne nyaunda mwa kwingijila.

12. Ki ka kyo mwakonsha kuba umvwe mwakankalwa kwingilako bupainiya bwa kukwasha?

¹² Nangwa kya kuba bintu bimo bimulengela kubula kwingilako bupainiya bwa kukwasha, mwakonsha kutundaika boba banembesha kabiji ne kwibalombelako. (Mana. 25:11; Kolo. 4:12) Kampe mwakonsha kunengezha kwingilako nabo mu mwingilo juba jimo mukachi ka mulungu nangwa kwingilako nabo kimye kyabaya kukila byo mukelwa kuba jonse.

13. Kikonkwanyi ka kyo twibikila mu Zambia kabiji kipwilo kyenu kyakonsha kukwasha byepi kwikifikizha?

¹³ Kikonkwanyi kya Bapainiya ba Kukwasha 15,000 mu April: Mu April, 2000, bapainiya ba kukwasha muno mu Zambia bafikile ku 10,724. Onkao mambo, twibikila kikonkwanyi kya bapainiya ba kukwasha 15,000 mu ñondo wa April. Twakonsha kwikifikizha umvwe kya kuba mu kipwilo kimo kimo, muntu umo pa basapwishi 8 waingilako uno mwingilo wa bupainiya bwa kukwasha. Pano bino bipwilo bimo bikekala na basapwishi bavula bakakonsha kwingilako bupainiya bwa kukwasha. Bipwilo byavula byakonsha kufikizha kino kikonkwanyi mambo kechi kyabayishatu ne. Akilangulukaipotu kino byo kikaleta lusekelo mu kipwilo kyenu kabiji ne byo kikalengela mwingilo wa kusapwila kwingijiwa bulongo mu nyaunda yenu!

14. Mambo ka April o aikela ñondo wawamisha kwingilako bupainiya bwa kukwasha?

¹⁴ Mambo ka April o aikela ñondo wawamisha kwingilako bupainiya bwa kukwasha? Wawama na mambo a kuba Kivuluko kikekala ku ntendekelo ya ñondo, kabiji kino kiketulengela kwikala na mashuko avula a kubwelako ne kwisamba na boba bakatanwako. Tukashanga magazini na nkebelo ya kusha buku wa Baibolo Ufunjisha pa kubwelako kabiji ne kutendeka mafunjisho a Baibolo. Onkao mambo, bupainiya bwa kukwasha mu April bukaleta mashuko avula bingi a kutendeka mafunjisho a Baibolo. Ñondo wa April uji na moba a Mulungu atanu kabiji ne juba ja kukokoloka jimo. Kino kikalengela boba bengila nkito ya ku mubiji ne boba baya ku sukulu kunembeshako.

15. Mambo ka o twafwainwa kwingijila na ngovu kimye kya Kivuluko byo kyafwenya kala pepi?

¹⁵ Kimye kya Kivuluko kyonse kikalako, kitufwenya na mwaka umo kwipi na mpelo ya buno bwikalo. Kimye kyashalako kya kubujilamo bantu pa mambo a Lesa wetu mukatampe kyakepa. (1 Ko. 7:29) Umvwe kino kimye kya Kivuluko kyapitatu, ko kuba’mba mashuko onse o kitupele a kutotelamo Shetu wa mwiulu kyapwa apichijila. Twayai tutendekeko lonka luno kwinengezha kuba’mba tukengileko pakapelela bulume bwetu mu March, April, ne May kulondolola byawamisha bya Yehoba!

[Kitenguluzha pa peja 4]

Twakonsha Kwikala na Bapainiya ba Kukwasha 15,000 mu April Nyi?

◼ Yukai mingilo yenu yanema

◼ Isambilai pamo na kisemi pa byo mukeba kuba

◼ Bulaiko bakwenu mulanguluko wenu