‘Sapwilai Mambo Awama’
1. Ñanyi mambo awama o twafwainwa kusapwila?
1 Mu ino ntanda mubula kumvwanyika umvwanyika mambo awama, tuji bingi na jishuko ja “kusapwila mambo awama a bupe bwa Lesa.” (Byubilo 20:24) Kino kyavwangamo ne kubulako bantu kuba’mba ano ‘moba apelako’ katatakatu akapwe pakapingakene ne ntanda ipya ya Yehoba ya bololoke amo ‘bintu bitanshi mo bikapichijijila.’ (2 Timo. 3:1-5; Lum. 21:4) Pa kyo kya kimye bikola kechi bikekalako jibiji ne. (Isa. 33:24) Bafu bakasangulwa kufuma mu bilende bya kivuluko ne kukwatankana jibiji na bisemi byabo ne balunda nabo. (Yoano 5:28, 29) Ntanda yonse ikekala ke paladisa wanengela bingi. (Isa. 65:21-23) Bino ke bya kumwenakotu bicheche bya mambo awama o twafwainwa kusapwila!
2. Mambo ka kimye kya Kivuluko o kyaikela kimye kyawama kusapwilamo mambo awama?
2 Bañondo ba March, April ne May bakekala bañondo bawama bingi kusapwilamo ano mambo awama. Mu bano bañondo, kipela bingi kwingila kimye kyabaya mu mwingilo mambo mu mapunzha avula mwaya ntanda kwikala bingi bulongo kabiji kechi bwila bukiji ne. Kunungapo, kintu kyanema bingi mu mwaka nangwa’mba Kivuluko, kikekalako mwaya ntanda yonse pa Kibelushi March 22, panyuma ya kuzhika juba. Kino kyo kimye kya kutendeka kwinengezha kuba’mba mukengileko pakatampe mu mwingilo wa mu bujimi.
3. Ki ka kikakwasha bisemi byonse kwingilako pakatampe mu mwingilo wa mu bujimi?
3 Bupainiya bwa Kukwasha: Nanchi mwakonsha kwinengezha kukengilako bupainiya bwa kukwasha pa ñondo umo, babiji nangwa pa bano bañondo bonse basatu nyi? Abya kuba mwisambapo pa kino na kisemi kyenu pa kimye kya lufunjisho lwa kisemi lukalondelapo nenyi? Umvwe mwaumvwañana bulongo, umo wa mu kisemi nangwa bavujilako bakonsha kwingilako bupainiya bwa kukwasha. (Mana. 15:22) Lombaipo pa kino kintu mumone Yehoba byo akemukwasha. (Mana. 16:3) Nangwa kya kuba kafwako nangwa umo mu kisemi wakonsha kwingilako bupainiya bwa kukwasha ne, bonse mu kisemi bakonsha kwibikila bikonkwanyi bya kwingilako pakatampe mu mwingilo kupichila mu kwingijila pamo na boba babena kwingilako bupainiya.
4. Twakonsha kunengezha byepi bintu bulongo kuba’mba tukengileko bupainiya bwa kukwasha umvwe tuji pa nkito?
4 Umvwe muji pa nkito, kunengezha bintu bulongo kwakonsha kwimulengela kwingilako bupainiya bwa kukwasha. Kampe mwakonsha kwingijisha kimye kya pachaile kusapwilamo. Nangwa kampe mwakonsha kutambula nyaunda iji ku bwipi na ko mwikela nangwa na ko mwingijila kuba’mba mukasapwilengako awala umo saka mukyangye kutendeka nkito nangwa panyuma ya kukomboka. Mwakonsha ne kwikalangako na kimye kikwabo kupichila mu kufungila kulutwe mingilo imo yabula kunema kuba’mba mukeingile mu ñondo ungi kabiji ne kwingilangako mu mwingilo moba onse atuntulu a ku mpelo ya milungu. Bamo balomba ku nkito juba jimo nangwa abiji a kukokoloka kuba’mba bakeengijishe kwingilako mu mwingilo wa mu bujimi.
5. Mwakonsha kukwasha byepi bakikote nangwa babelabela kwingilako bupainiya bwa kukwasha?
5 Umvwe mwi bakikulumpe nangwa mubelabela nangwa mwakepelwa bulume, mwakonsha kwingilako bupainiya bwa kukwasha kupichila mu kwingilangako pacheche moba onse mu mwingilo. Lombai Yehoba kwimupa “bukata bwine bwa bulume.” (2 Ko. 4:7) Nyenga umo wakonsheshe kwingilako bupainiya bwa kukwasha saaji na myaka 106! Kupichila mu bukwasho bwa balongo banji ba bwina Kilishitu ne bakwabo mu kipwilo, wasapwilanga ku nzubo ne nzubo, kubwelako, kufunjisha mafunjisho a Baibolo kabiji ne kwingilako mbaji ikwabo ya mwingilo. Watendekele mafunjisho a Baibolo jikumi. Uno nyenga waambile’mba: “Umvwe navuluka jishuko jo najinga najo ja kwingilako bupainiya bwa kukwasha, muchima wami uyula bingi na butemwe ne lusanchilo lwa kusanchila Yehoba, Mwananji ne jibumba janji ja butemwe. Ñamba namba, ‘kine nemusanchila bingi anweba Yehoba!’”
6. Nga bakyanyike babatizwa bakiji pa sukulu bakonsha kwingilako byepi bupainiya bwa kukwasha?
6 Umvwe mwi wakyanyike wabatizwa ukiji pa sukulu, ne anwebatu mwakonsha kunembeshako bupainiya bwa kukwasha. Byonkatu byo kiji ku boba baji pa nkito, mwakonsha kwingijishanga moba a ku mpelo ya milungu kuyilamo mu bujimi. Kampepo ne anweba mwakonsha kwingilangako awala umo nangwa kukilapo panyuma ya kukomboka ku sukulu mu moba amo. Nanchi kujipo moba a kukokoloka ku sukulu o mwakonsha kwingijisha kuyilamo mu mwingilo nyi? Umvwe mukeba kwingilako bupainiya bwa kukwasha, isambai na bansemi benu.
7. Bakulumpe mu kipwilo bakonsha kuba byepi kuba’mba babayishe kizaku kya ba mu kipwilo kya kwingilako mu mwingilo mu kimye kya Kivuluko?
7 Ikalai na Kizaku Kikatampe: Bakulumpe bakonsha kubayisha kizaku kya ba mu kipwilo kupichila mu kya kumwenako kyabo. (1 Pe. 5:2, 3) Bakonsha kunengezhapo kupwila kukwabo kwa kuya mu mwingilo wa mu bujimi kwa boba bakonsha kwingilako mu mwingilo mu kimye kya lukelo, panyuma ya kukomboka ku sukulu nangwa pa kukomboka ku nkito. Mukulumpe wa mwingilo wafwainwa kumona’mba basapwishi bafikilamo bapewa mwingilo wa kutangijila kuno kupwila kwa kuya mu mwingilo kabiji ne kuba’mba nyaunda ya baya ya kwingijilamo poiji, kabiji magazini ne mabuku avula nao poaji a kwingijisha mu bano bañondo ba mwingilo wiikajila.
8. Ki ka kyo twafunjilako ku byaubile kipwilo kimo?
8 Mu kipwilo kimo, bakulumpe batendekele kutundaika basapwishi kunembesha bupainiya bwa kukwasha saka kwakishala bañondo bavula. Babulanga kipwilo mulungu ne mulungu kibelengelo kya basapwishi banembeshengako bupainiya bwa kukwasha. Kino kyatundaikilenga aba bonse bakebelenga kwingilako pakatampe mu mwingilo kuba’mba baji na bakwabo ba kwingila nabo. Kupwila kukwabo kwa kuya mu mwingilo kwaikalangako lukelo ne mabanga. Kyafuminemo, pa bonse mu kipwilo, basapwishi 53 bo baingijileko bupainiya bwa kukwasha mu April!
9. Mambo ka kimye kya Kivuluko o kyawamina ku boba bafikilamo kutendeka kusapwila mambo awama?
9 Kwashai Bakwenu Kusapwila: Umvwe bakatataka ne bakyanyike bafikilamo kwikala basapwishi, bakonsha kwingila mu mwingilo wa mu bujimi pamo na basapwishi bapijilwa. Jino jishuko jakonsha kwikalako mu kimye kya Kivuluko mambo kyo kimye bavula mu kipwilo kyo bengilako pakatampe mu mwingilo. Abya muji na ye mufunjisha Baibolo waalula bwikalo bwanji ne kwikela mwayila mizhilo ya Yehoba yaoloka nyi? Nanchi muji na baana baji na byubilo byawama babena kuba bulongo ku mupashi bino bakyangye kwikala basapwishi nyi? Umvwe bano bonse baamba’mba babena kukeba kwikala basapwishi babula kubatizwa kabiji mwamona’mba kine bafikilamo, bulaipo mukulumpe umo mu kipwilo. Mukulumpe utangijila ukamonapo bakulumpe babiji bakwisamba ne anweba ne mwanenu nangwa ye mufunjisha.
10. Bakulumpe mu kipwilo bakonsha kuba byepi kukwasha boba bakoka?
10 Kabiji bañondo baji kulutwe kwe bakekala kimye kyawama bingi ku boba bakoka bakeba kutendeka jibiji kusapwila pamo na kipwilo. Bakulumpe ba Lufunjisho lwa Buku lwa Kipwilo ne bakulumpetu bakwabo bafwainwa kwibikishako bingi kufwakesha bonse bakoka ne kwibatundaika kukengilanga nabo mu mwingilo. Umvwe bakoka pa kimye kikatampe, bakulumpe babiji bafwainwa patanshi kukisamba nabo kumona umvwe bafikilamo kuyanga mu busapwishi nangwa ne.—km-KD 11/00 pe. 3.
11. Ñanyi kintu kikatampe kimwesha “bupe bwa Lesa?”
11 Nengezhai Kuketa Bantu Kutanwa ku Kivuluko: Bukuzhi ke kimwesho kikatampe bingi kya “bupe bwa Lesa.” (Byubilo 20:24) Bantu bavula balusanchilo mwaya ntanda bakapwila na kuvuluka Kivuluko kya lufu lwa Kilishitu pa Kibelushi, March 22, panyuma ya kuzhika juba. Tukeba kuketa ne kukwasha bantu bonse bamichima yakishinka kukeya na kutanwa ku kino kintu kikatampe kishimuna bupe bwa Yehoba ku bantu.
12. Bañanyi bo twafwainwa kwita ku Kivuluko?
12 Nembai bantu bo mukeba kuketa. Kwa kubula nangwa kuzhinaukatu ne, muketa balongo benu, bakinkalankulo, bakwenu mo mwingijila nangwa mo mufunjila, bantu bo mwafunjishangapo kala Baibolo ne bo mukifunjisha luno, ne bonse bo mukelwa kwita. Umvwe bantu bamo bo muketa bakekale na mepuzho pa mambo a Kivuluko, mwakonsha kwingijisha kibaba kya bya kulumbulula kyaamba pa mambo a Kijiilo kya Nkambo kya Mabanga kiji pa peja 206-8 mu buku wa Baibolo Ufunjisha. Kino kyakonsha ne kwimulengela kutendeka lufunjisho lwa Baibolo, mambo kikemupa jishuko ja kumwesha yewo muntu buku ye twingijisha kufunjishishamo mafunjisho a Baibolo.
13. Yehoba wapesheshe byepi kwibikako kwa basapwishi babiji baichile bantu kwiya na kutanwa ku Kivuluko?
13 Nyenga umo wajinga na mutanchi wa bisemi 48 byo akebelenga kwita. Byo ebechilenga, waipayilenga mazhina abo kabiji ne kunembapo juba jo ebechilamo. Byo kya musangajikilepo pa kumona bantu 26 bo aichile baiya ku Kivuluko! Mulongo umo uji na shitolo waichile wa mwingilo wanji wajinga kala pulishiti. Uno mwanamulume waishile kabiji waambile’mba: “Mu awala umotu, nafunda byavula bingi pa mambo a Baibolo kukila byo nafunjile pa myaka 30 yo naikele mu Chechi ya Bakatolika.” Panyumatu ya Kivuluko, waswile lufunjisho lwa Baibolo mu buku wa Baibolo Ufunjisha.
14. Ñanyi mukwekele ukengijiwa ntanda yonse ukatendeka pa March 1?
14 Mukwekele: Kutendeke pa Kibelushi, March 1, shoo kukafikatu ne pa March 22, tupananga bipepala bya kwichilapo bantu ku Kivuluko mwaya ntanda yonse. Basapwishi bonse bakengilako papelela bulume bwabo mu uno mukwekele wanema wiikajila. Kyawama kupa mwina nzubo kino kipepala kya kumwichilapo kukila kwikishatu pa kibelo. Nangwa byonkabyo, umvwe nyaunda yenu yabaya, bakulumpe mu kipwilo bakonsha kwikimona’mba mwakonsha kusha bino bipepala pa mpunzha pawama pa mazubo po mwabula kutana bantu. Mu moba a kumpelo ya milungu tukashanga ne magazini a bukumo.
15. Tukambanga’mba ka pa kusha bino bipepala?
15 Byo kiji kuba’mba kimye kya kupainamo bino bipepala kikakepa, kyawama kwambatu byambo bicheche. Ikalai bakasuluka ne balusekelo pa kwisamba na bantu. Mwakonsha kwamba bino amba: “Tubena kwimwita namba anweba ne kisemi kyenu kabiji ne balunda nenu mukeye na kutanwako ku kino kintu kyanema kikekalako pa March 22. Kipepala kye. Byavula byanembwa pa kyonkakye kipepala.” Kampe mwina nzubo wakonsha kwikala na mepuzho. Nangwa kampe wakonsha kutambula kino kipepala ne kwamba’mba nkeya. Munembai jizhina janji ne kukabwelako.
16. Kyamwekele ka kimwesha buneme bwa mukwekele wa kwita bantu mu nyaunda yetu kutanwa ku Kivuluko?
16 Mwaka wapwa mushilikale umo wataine pa kibelo kipepala kya kumwichilapo ku Kivuluko. Wakebelenga kutanwako, bino patanshi wafwainwe kukitambula lūsa ku mukulumpe wanji. Byo amumwesheshe kino kipepala mukulumpe wanji, uno mukulumpe wa bashilikale wakizhindaminetu nzoo bino wabwela waamba’mba, bansemi bami Bakamonyi kabiji nayanga na kupwila nabo. Uno mukulumpe wa bashilikale kechi wamuswishishetu uno mushilikale ne, bino naye wayile na kutanwako ku Kivuluko!
17. Twakonsha kumwesha byepi kuba’mba kechi twatambula bupe bwa Lesa kwikala ke bwatu ne?
17 Mweshai Lusanchilo: Kimye kya Kivuluko kya mu 2008 byo kyafwenya kala pepi, twayai atweba bonse pa muntu pa muntu tulangulukenga pa bupe bwa Yehoba bo etubila. Mutumwa Paulo wanembele’mba: “Twimusashijila namba, kechi mutambule bupe bwa Lesa ke bwatu ne.” (2 Ko. 6:1) Twakonsha kumwesha byepi’mba kechi twatambula bupe bwa Lesa kwikala ke bwatu ne? Paulo wanembele’mba: ‘Bino mu bintu byonse twilumbulula byo tuji ba mingilo ya Lesa.’ (2 Ko. 6:4) Onkao mambo, tumwesha lusanchilo lwetu pa bupe bwa Yehoba kupichila mu byubilo byetu byawama ne kwingila na kizaku mu mwingilo wa kusapwila mambo awama. Mu kikye kimye kya Kivuluko kibena kwiya, tukekala na jishuko jikatampe bingi ja kwingilako pakatampe mu mwingilo wetu wa kusapwila mambo awama.
[Kitenguluzha pa peja 3]
Bañanyi Bakonsha Kwingilako Bupainiya bwa Kukwasha?
◼ Bisemi
◼ Aba baji pa nkito
◼ Bakikulumpe ne babelabela
◼ Aba bakiji pa sukulu
[Kitenguluzha pa peja 4]
Pa Kupana Bipepala bya Kwichilapo Bantu ku Kivuluko:
◼ Ambaitu byambo bicheche; ambai na lusekelo
◼ Nembai jizhina ja muntu ye mwatana ne kukabwelako
◼ Shainga magazini ku mpelo ya milungu