Kimye kya Kivuluko, kyo Kimye kya Kwingilako Pakatampe mu Mwingilo!
1. Mambo ka o twafwainwa kwingijilako pakatampe mu mwingilo mu March, April ne May?
1 Abya mwakonsha kwingilako pakatampe mu mwingilo mu kimye kya Kivuluko nyi? Basapwishi bamo balomba moba ku nkito nangwa ku sukulu pa kuba’mba bakengileko mu mwingilo. Kutendeka pa 2 April, tukekala na mukwekele wa kwita bantu ku Kivuluko kikekalako pa 17 April. Kabiji aba bakatanwako tukebetanga ku jashi jiikajila jikekalako pa 25 April. Kuji bintu byavula bingi byakonsha kwitulengela kwingilako pakatampe mu mwingilo mu ñondo wa March, April ne May.
2. Ñanyi jishinda jimo jawama kwingijilamo pakatampe mu mwingilo?
2 Bupainiya bwa Kukwasha: Bupainiya bwa kukwasha ke jishinda jimo jawama kwingijilamo pakatampe mu mwingilo. Na mambo a kuba bonse twapayankana, kikebewa kunengezhezha jimo ne kwalula mutanchi wetu. (Mana. 21:5) Kampe mwakonsha kukileka kubako bintu bimo byabula kunema. (Fili. 1:9-11) Mambo ka akubula kutundaikilako bakwenu mu kipwilo pa kuba’mba mukengijile pamo nabo bupainiya bwa kukwasha?
3. Bisemi byakonsha kunengezha byepi kwingilako pakatampe mu mwingilo?
3 Pa juba jenu jikalondelapo ja Kupopwela kwa Kisemi, kyawama kwisambapo pa byo mwakonsha kwingilako na kisemi kyenu. (Mana. 15:22) Inge mwakwatankana, kampe bamo mu kisemi bakonsha kwingilako bupainiya bwa kukwasha pa ñondo umo nangwa bavula. Pano ibyepi inge mwamona’mba kechi mwakonsha ne? Ba mu kisemi bakonsha kwingilako kimye kyabaya mu mwingilo mabanga nangwa ku mpelo ya milungu.
4. Kwingilako pakatampe mu kimye kya Kivuluko kuleta ñanyi mapesho?
4 Yehoba wayuka byo tumwingijila kabiji usanta bingi pa kwipana kwetu. (Hebe. 6:10) Kwingijila Yehoba ne kukwasha bakwetu kuleta bingi lusekelo. (1 Moba. 29:9; Byu. 20:35) Nanchi mukengilako pakatampe mu kimye kya Kivuluko nyi? Umvwe mwauba bino mukekala na lusekelo kabiji mukafuma mapesho avula bingi.