Mukengilako Bupainiya bwa Kukwasha Nyi?

1. Mambo ka o kyawamina kwingila na ngovu mu kimye kya Kivuluko?

¹ Kimye kya Kivuluko ke kimye kyawama kya kwingila na ngovu mu mwingilo wetu. Ke kimye kyo tuvuluka butemwe bwitumwesheshe Yehoba pa kupana Mwananji ke bukuzhi. (Yoa. 3:16) Tumusanchila bingi Yehoba pa kino kyo etubijile kabiji kino kitulengela kusapwila bantu pa mambo a Yehoba ne byo akebobila. (Isa. 12:4, 5; Luka 6:45) Kino kyo kimye kyo twikala na mukwekele wa kwitako bayukane ne bantu bekala mu nyaunda yo tusapwilamo kwiya na kutanwa ku Kivuluko. Kabiji tutwajijila kufunjisha bantu bo twaichile batainweko ku Kivuluko. Nanchi mukengila na ngovu kupichila mu kwingilako bupainiya bwa kukwasha mu March, April nangwa May nyi?

2. Mambo ka o kyawamina kwingilako bupainiya bwa kukwasha mu ñondo wa March?

² Kikawama Bingi mu Ñondo wa March: Kikawama bingi kwingilako bupainiya bwa kukwasha mu ñondo wa March. Aba basaka kwingilako uno mwingilo bakakonsha kusalapo kwingila maola 30 nangwa 50. Umvwe kya kuba kalama wa mwanzo ukafwakesha kipwilo kyenu mu March, bapainiya bakukwasha bafwainwa kutanwako ku kusambakana kwikala na kalama wa mwanzo na bapainiya ba kimye kyonse ne beiikajila. Bafwainwa kutatwila pamo kuno kusambakana ne kupwishisha pamo. Uno mwaka moba a kwichilamo bantu kwiya na kutanwa ku Kivuluko kikekalako pa Kibiji pa 26 March, 2013 akavula bingi. Uno mukwekele ukatatula pa 1 March. Ñondo wa March uji na Milungu itanu ne Bibelushi bitanu. Onkao mambo, twafwainwa kulangulukapo bulongo ne kumona umvwe twakonsha kwingila na ngovu mu ñondo wa March uno mwaka.

3. Nanchi twakonsha kunengezha byepi pa kuba’mba tukengile na ngovu mu mwingilo?

³ Nengezhai Bulongo: Kino kyo kimye kyawama kupituluka mu mutanchi wenu ne kumona byo mwafwainwa kuba pa kuba’mba mukengileko bupainiya bwa kukwasha. Kyanema bingi kukwatankana mu kisemi. Onkao mambo pa Kupopwela kwa Kisemi mwafwainwa kwisamba pa byo mukoba ne kumona byo mwafwainwa kutanchika bulongo. (Mana 15:22) Umvwe mukakankalwa kwingilako bupainiya bwa kukwasha kechi mwafwainwa kulefulwa ne. Nanchi mukakonsha kupimpulako mutanchi wenu pa kuba’mba mukabandengako pacheche mu mwingilo pa moba o muya mu busapwishi nyi? Abya mukakonsha kwingilanga moba avula kukila pa moba o muyilapo mu mwingilo mu mulungu nyi?

4. Ñanyi bintu byawama byo tukamwenamo umvwe tukengile na ngovu mu March, April ne May?

⁴ Inge tukengile na ngovu mu March, April ne May tukasangalala bingi kabiji tukekala na lusekelo lufuma mu kwingijila Yehoba ne mu kukwasha bantu. (Yoa. 4:34; Byu. 20:35) Kwibikako kwetu mu mwingilo kwanema bingi mambo kusangajika Yehoba.—Mana 27:11.