Inengezhainga Kwingilako Mwingilo Pakatampe
1. Kyanemena ka kwingilako pakatampe mu March, April, ne May kabiji twakonsha kwinengezha byepi?
1 Pa mwaka pa mwaka mu March, April, ne May ‘tumusanchila bingi Yehoba’ kupichila mu kwingilako pakatampe. (Sala. 109:30) Nanchi mukengilako pakatampe mu March kumwesha lusanchilo kwi Lesa Wapaine bukuzhi nyi? Kino kyo kimye kya kulangulukila jimo bya kwingilako pakatampe.—Mana 21:5.
2. Anweba mwaubilepo byepi kabiji balongo ne banyenga bamo mwaya ntanda baubilepo byepi pa kuno kukepeshako kwa maola a bupainiya bwa kukwasha?
2 Bupainiya bwa Kukwasha: Mwaka wapwa basapwishi batemenwe bingi byo baumvwine lunengezho lwa kubwezhako maola a bupainiya bwa kukwasha mu April. Mulongo umo wanembele’mba: “Nkifunda sukulu kabiji kechi kimpelela kwingilako mwingilo wa bupainiya bwa kimye kyonse ne. Mu ñondo wa April nkanembeshako bupainiya bwakukwasha pa maola 30, kabiji nkebikako kwingila maola 50.” Nyenga wingila nkito ya ku mubiji wanembele’mba: “Maola 30 apela bingi.” Luno lunengezho byo belubijikile, nyenga umo waingijileko bupainiya bwa kimye kyonse uji na myaka ya kusemwa kukila pa 80 waambile amba: “Kino kyo kimye kyo natongelenga. Yehoba wayuka amba bupainiya ye mwingilo ye natemenwe bingi mu bwikalo bwami.” Bamo bakankalwa kwingilako bupainiya bwa kukwasha bebikila bikonkwanyi bya kwingilako pakatampe mwingilo.
3. Ñanyi bintu bikalengela kwingilako bupainiya bwa kukwasha mu March, April, ne May?
3 Ñondo wa March ukawama kwingilako bupainiya bwa kukwasha mambo ye ñondo basapwishi ye bakengilako jibiji bupainiya bwa kukwasha pa maola 30 nangwa 50. Kabiji kutatula pa Kibelushi pa 17 March, tukekala na mukwekele wa kwitanga bantu kwiya na kutanwa ku Kivuluko kikekalako pa 5 April. Bavula bakengilako pakatampe mu mwingilo kabiji kino kikebatundaika kukeba kwingilako bupainiya bwa kukwasha bwa maola 50 mu April ne May.
4. Twakonsha kwingilako byepi pakatampe mu mwingilo kabiji bi ka bikafumamo?
4 Pa kupopwela kwenu kwa kisemi mukesambe pa byo mwakonsha kwingilako pakatampe pa muntu pa muntu mu kisemi mu March, April ne May. (Mana 15:22) Lombai Yehoba kuba’mba akemukwashe. (1 Yoa. 3:22) Kwingilako pakatampe mu mwingilo kukemuletela lusekelo ne kutwajijila kumusanchila Yehoba.—2 Ko. 9:6.