Moba o Twafwainwa Kumusanchilanga Bingi Yehoba
1. Ñanyi lunengezho lwakatataka luketukwasha ‘kumusanchila bingi Yehoba’?
1 Mu March uno mwaka twatatwile kwingijisha jishinda jakatataka. Jino jishinda jikalengela basapwishi kwingilangako bupainiya bwa kukwasha bwa maola 30 mu March ne mu April pa mwaka pa mwaka ne kimye kalama wa mwanzo kyo afwakesha kipwilo. Onkao mambo, umvwe kalama wa mwanzo watatula kwingijila kipwilo ku mpelo ya ñondo umo kufika mu ñondo mukwabo, basapwishi bafwainwa kusalapo kwingila bupainiya bwa kukwasha bwa maola 30 mu yewo ñondo ubena kupwa nangwa mu walondelapo. Kabiji bapainiya ba kukwasha bonse bafwainwa kukatanwa ku kusambakana kwa bapainiya ba kimye kyonse na kalama wa mwanzo. Bakatatwila pamo ne kupwishisha pamo. Umvwe tukankalwa kwingila maola 50, twafwainwa ‘kumusanchila Yehoba’ kupichila mu kwingilako bupainiya bwa kukwasha bwa maola 30 mu March, mu April ne bimye bibiji kalama wa mwanzo byo afwakesha kipwilo mu mwaka.—Sala. 109:30; 119:171.
2. Ñanyi bintu bikoba basapwishi pa kuba’mba bakatundaikwe kimye kalama wa mwanzo kyo akafwakesha kipwilo?
2 Kimye Kalama wa Mwanzo kyo Akengijilenga Kipwilo: Bavula bakengilako bupainiya bwa kukwasha kimye kalama wa mwanzo kyo akafwakesha kipwilo kabiji kwingila nanji mu mwingilo kukebakosesha bingi. (Loma 1:11, 12) Basapwishi baya ku nkito bakengilangako bupainiya bwa kukwasha mu uno mulungu, bafwainwa kulomba luusa ku nkito pa kuba’mba bakengileko na kalama wa mwanzo mukachi ka mulungu. Balongo ne banyenga bakabula kukonsha kutambula luusa bafwainwa kumwipuzha umvwe kyakonsheka kwingila nanji pa Kibelushi nangwa pa Mulungu. Kabiji bapainiya ba kukwasha bakatundaikwa bingi inge batanwa ku kusambakana kwa bapainiya ba kimye kyonse ne beikajila ko bekala nako na kalama wa mwanzo.
3. Mambo ka moba a Kivuluko kyo awamina kwingilako bupainiya bwa kukwasha?
3 Mu March ne mu April: Aba bonse baingijilengako bupainiya bwa kukwasha bwa maola 30 pa ñondo umo mu moba a Kivuluko, luno bafwainwa kutotanga Lesa kupichila mu kwingilako pa bañondo babiji. Kino kyo ‘kitapisho kyo bakapananga.’ (Hebe. 13:15) March ne April bo bañondo bawama kwingilako bupainiya bwa kukwasha. Pa mwaka pa mwaka mu moba a Kivuluko, twikala na mukwekele wa kwita bantu kwiya na kutanwa ku Kivuluko. Byo kiji kuba’mba bavula bengilako na ngovu mu kimye kya Kivuluko, twakonsha kwingilako na basapwishi bapusa pusana. Panyuma ya Kivuluko, twafwainwa kwisamba jibiji na bantu bonse batanwako ne kwibatundaika kutanwa ku jashi jiikajila. Nanchi bino bishinka byakonsha kwimulengela kukeba kwingilako bupainiya bwa kukwasha mu bino bimye byo banungako nyi?—Luka 6:45.