Monai Kuba’mba Kimye kya Kivuluko kya uno Mwaka Kimuletela Lusekelo Lukatampe
1. Ñanyi jishinda jo twakonsha kubaishamo lusekelo lwetu mu kimye kya Kivuluko?
1 Abya mukeba kukekala na lusekelo lukatampe mu March, April ne May nyi? Jishinda jimo ja kubilamo bino ke kwingilako pakatampe mu mwingilo wa kusapwila ne kwingilako bupainiya bwa kukwasha inge mwakonsha. Kuba bino kukemulengela byepi kubaishako lusekelo?
2. Kwingilako pakatampe mu mwingilo wa kusapwila kuketuletela byepi lusekelo?
2 Baishai Lusekelo Lwenu: Yehoba witulengele mu jishinda ja kuba’mba twikalenga na lusekelo kimye kyo tubena kumwingijila ne kufunda pe aye. (Mat. 5:3) Kabiji witulengele ne kuba’mba twikalenga na lusekelo lufuma mu kupana. (Byu. 20:35) Mwingilo wa kusapwila witukwasha kuba bintu bibiji, kupopwela Lesa ne kukwasha bantu. Onkao mambo, kyayilamo kwamba’mba mu kwingilako pakatampe mwingilo wa kusapwila mufuma lusekelo lukatampe. Kunungapo, inge ke twingile pakatampe mu mwingilo wa kusapwila, tukayuka bya kwingila mwingilo wetu bulongo. Buno busendwe buketukwasha bingi kuchinchika ne kubula kwikala na moyo pa kusapwila mambo awama. Kwingilako pakatampe kuketulengela kusapwila bantu bavula ne kutendeka mafunjisho a Baibolo. Inge ke twingijishe ano mashinda, tukekala na lusekelo pa kwingila mwingilo wetu wa kusapwila.
3. Mambo ka o kyawamina kwingilako bupainiya bwa kukwasha mu March ne mu April?
3 Kikawama bingi kwingilako bupainiya bwa kukwasha mu bañondo ba March ne April mambo twakonsha kusalapo kwingila maola 30 nangwa 50. Kabiji kutatula pa Kibelushi pa 22 March, kufika pa juba ja Kivuluko pa Kimo pa 14 April, tukekala na mukwekele wa kwita bantu kwiya na kutanwa ku Kivuluko. Bipwilo bikekala bingi na lusekelo mambo bavula bakengila “na muchima umotu” pa kuba’mba bapwishe nyaunda mu kimye kyafwainwa.—Zefwa. 3:9.
4. Inge tukeba kwingilako bupainiya bwa kukwasha, twafwainwa kuba byepi?
4 Inengezhai Lonka Luno: Inge mukyangye, pitulukaimo mu mutanchi wenu wa mingilo ne kumona mo mwafwainwa kupimpulako pa kuba’mba mukengileko pakatampe mu mwingilo wa kusapwila, kupichila mu kwingilako bupainiya bwa kukwasha pa ñondo umo nangwa kukilapo. Lombaingapo. (Yako. 1:5) Isambaipo na kisemi kyenu nangwa na bakwenu mu kipwilo. (Mana 15:22) Vulukai kuba’mba nangwa mukolwa kolwa nangwa mwapayankana na nkito, nenuwa mwakonsha kwikala na lusekelo inge mwaingilako bupainiya bwa kukwasha.
5. Ki ka kikafumamo inge twaingilako na ngovu mwingilo wa kusapwila kimye kya Kivuluko?
5 Yehoba ukeba bakalume banji kwikala na lusekelo. (Sala. 32:11) Inge twaingila na ngovu mwingilo wa kusapwila mu kimye kya Kivuluko, tukekala na lusekelo lukatampe, kabiji tukasangajika ne Shetu wa mwiulu.—Mana 23:24; 27:11.