‘Bapaine Byabo Byawamisha’

Kimye kyonse mwingilo wetu ukwashiwa kabiji watwajijila nakukwashiwa nabyabupe bipana bampanyi bakwitemenwa. Lunengezho lwakatataka lwakutambwishishamo mabuku lubena kumwesha kishinka kyakuba’mba mali kechi oetutundaika kusapwila mambo awamane. Atweba ‘kechi tuji pamo ne bamo bavula bavwangakanya mambo a Lesa amba tumwenemo ne: pakuba atweba twambila mwi Lesa’ kushimuna mambo awama a Bufumu. (2 Ko. 2:17; Mat. 24:14) Byobatundaikilwe namuchima walusanchilo bamulume nemukazhi bamo bakikulumpe baingila myaka yavula mumwingilo wa Lesa, bapoteshe ñombe nekutuma mali onse kuofweshi yamusampi. Kwesakana nabyambo byanembwa mu 1 Byambo bya Moba 29:14, banembele munkalata yabo’mba: “Twalanguluka namba kyawama kupana jibiji kwi Yehoba mubyakwanji mwine byawamisha.”

Nga mamboka akupainatu tucheche bino satwakonsha kupana byawamisha? Kitufwainwa kupana byawamisha mambo uno yemukambizho kubena Kilishitu mu Byambo bya Lesa wakulondela mizhilo nekwikala muntu wakumwenako bakwenu, kwesakana nabyonka byotwamona. Kunungapo, kileta bingi lusekelo kumuntu umvwe wayuka’mba kechi wauba butanyine wapana byavula. Kabiji, kukila nepopo, kuji nejifunde jamu Binembelo jamba pakino, mambo bifumamo kuba twibileyane, kuba’mba: “Awa ukusa nkunwa icheche, ukanowa kacheche; kabiji aye ukusa nkunwa yavula ukanowa kavula.” Kunowaka? Kechi kunowa byakumubijine bino byakumupashi, monka mwayila byambo byaambile Yesu amba: “Lusekelo lo bamona aba bapana lwakila lo bamona aba batambula.”—2 Ko. 9:6; Byu. 20:35.