Byakubijika
◼ Mabuku akutambika mu February: Life—How Did It Get Here? By Evolution or by Creation?, Revelation—Its Grand Climax At Hand!, nangwa buku yense wakala uji namapeja 192 umvwe poaji pakipwilo. March: Kuyuka Kutangijila ku Bumi Bwa Myaka. Twafwainwa kwingila nangovu pakuba’mba tutatule mafunjisho a Baibolo apanzubo. April ne May: Magazini a Kyamba kya Usopa ne Loleni!. Pakubwela kubantu baji nalusekelo lwakukeba kufunda bukine, tambikai buloshuwa wa Nanchi Lesa Ukebaka, nekutatula mafunjisho a Baibolo apanzubo.
◼ Kimye kyomubena kusapwila munyaunda momubula kusapwila javula, basapwishi bakonsha kutambika buloshuwa wa Nanchi Lesa Ukebaka nangwa buku wa Kuyuka Kutangijila ku Bumi Bwa Myaka. Umvwe mwina nzubo uji nao ano mabuku abiji, mwakonsha kumutambika mabuku akwabo. Bonse bafwainwa kusenda matalakiti apusana-pusana akushila bantu babula kutanwa pamazubo nangwa bakana kutambula mabuku. Twafwainwa kutesha muchima kubwela kubantu baji nalusekelo lwakufunda bukine, kikatakata baji mumanyaunda otubula kusapwilamo javula pano bino musapwilwatu jakamo kamo nabipwilo biji kwipi.
◼ Kipamo kya National Registration Regulations kyakambizha bena Zambia bonse baji namyaka yakusemwa 16 nangwa kukilapo kuya nakukopwa leji ku Ofweshi ya National Registration iji kwipi nakobekela. Uno mukambizho wingila nekuboba bapimpula mazhina abo. Aba bonse bafikizha myaka yakukopelwamo maleji bafwainwa kukopwa bukiji-bukiji mambo uno kemukambizho kubena Kilishitu wakunekenena bakulumpe balama kyalo. Bakulumpe mukipwilo nebansemi bafwainwa kulabijila uno mukambizho nekuvululako balongo nebanyenga bakyanyike babena kunangijila kumyaka yakusemwa 16.
◼ Mukulumpe utangijila mukipwilo nangwa mukwabo umo yeatongola wafwainwa kubala maakaunti akipwilo pa March 1 nangwa bukiji-bukiji panyuma yajino juba. Umvwe mwapwisha kubala, bijikai kukipwilo pakubijika sawakya wa maakaunti.
◼ Munembeshi nemukulumpe utangijila mwingilo wamubujimi bafwainwa kupituluka mumingilo yabapainiya bakimye kyonse. Umvwe paji bamo babena kukankalwa kufikizha maawala akebewa, bakulumpe mukipwilo bafwainwa kwibakwasha. Pakuba’mba muyuke bukwasho bomwakonsha kwibakwasha, pitulukai munkalata yapamwaka pamwaka ya S-201. Kabiji monai nemu kyamukachi kya Mwingilo Wetu wa Bufumu wa Kibemba October 1986 mapalagalafu 12 kufika ku 20.
◼ Jimukai nabujimbijimbi bubena kuba bantu pa Intaneti nemumakalata obabena kutuma kulombelamo mali kubalongo betu kuba’mba akukwashishamo bantu baponena mumalwa. Umvwe kwaikala kometi yakupana bukwasho bwakumubiji ku Bakamonyi bakwa Yehoba, twakonsha kwimubula balongo bakuba kino. Bupe bwabuno bukwasho bwafwainwatu kutumwa ku Watch Tower, Zambia.
◼ Jashi jamvula-bantu jiikajila ja mukimye kya Kivuluko kyamu 2002 jikambiwa pa Mulungu, April 14, jiji namutwe wakuba’mba “Vulukainga Juba Jiletesha Moyo.” Autulaini ikatumwa. Bipwilo bikekala namukulumpe wakijiiji nangwa kupwila kwiikajila muyeo mulungu, bikekala najino jashi jiikajila mumulungu ukalondelapo. Kafwako kipwilo kikamba jashi jiikajila juba ja April 14, 2002 saka jikyangye kufikane.