Kabokoshi Kamepuzho

◼ Mwina Kilishitu wakonsha kuba byepi umvwe wakankalwa kumona mukwabo wafwainwa kutwela nanji mumasongola?

Bavula batana lusekelo mukwingijila Lesa kwakubula kwikala mumasongola. (Mat. 19:11, 12; 1 Ko. 7:7) Bamo bakebesha kutwela mumasongola bamona nobe kino kyokyonka kintu kyanema bingi mubintu byonse. Beyukanyikisha nemu mapepala abyambo amba babena kukeba mukwabo wakutwela nanji mumasongola. Nanchi kino kyawamanyi?

Watendekeshe masongola byoaji Yehoba, twaketekela namba wabikako nemizhilo yakulondela ileta lusekelo kubantu bekomoka bakeba kutwela mumasongola. Mukambizho wakwa Paulo kubakalume ba Lesa bepana kewakusongola nekusongolwa “kana monka mwi Nkambo.”—1 Ko. 7:39.

Kwifwalama kechi twafwainwa kwikupezhane. (1 Ko. 15:33; Mana. 10:23) Abya kyawama kutuma muntu wakukyalo amba etukebeleko muntu wakutwela nanji mumasongola bino saabula kwitutemwa, waluba byotukeba usakatu mali?

Kwiyukanyikisha mumapepala abyambo kwakonsha kwitusolwesha kubantu botubula kukeba kabiji nebintutu bikwabo byakonsha kwituletelela. Kwakonsha kulengela bakwetu kikatakata bakyanyike, kulanguluka’mba nanchi kafwapo lupusano luji pakachiketu nebantu bakukyalo pamambo akukeba mukwenu wakukomoka yeukatwela nanji mumasongolane. Kwakonsha nekwibatundaika kutendeka kukeba bantu bakukyalo mubufyamfya babula kuyuka mizhilo yabyubilo byawama nekwiletelela bene.—Nte. 34:1, 2; Mana. 22:3.

Bena Kilishitu bayuka’mba kwikomoka kejishinda janema bingi jitwelelamo bantu mumasongola. Mukipwilo momuji bantu bakonsha kwitujimunako pabino bintu byanema mumbaji yonse ibiji, kumubiji nekumupashi mambo betutemwa, kechi mu mapepala abyambone.—Sala. 119:9; Isa. 32:1, 2; Titu. 2:3.