Anweba Balongo Mukiji Banyike Nanchi Mukanamina Mingilo mu Kipwilo Nyi?
1. Kwesekana na byambo bitanwa pa 1 Timoti 3:1, ñanyi kimye mulongo kyo afwainwa kutatula kukanamina mingilo?
1 “Umvwe muntu ubena kukanamina mingilo . . . , ubena kukeba mingilo yawama.” (1 Timo. 3:1) Bino byambo bitundaika balongo kukanamina mingilo mu kipwilo. Nanchi mwafwainwa kwikala bakulumpe pa kuba’mba mutatule kukanamina mingilo nyi? Kyawama kutatula saka mu kiji banyike. Bakulumpe bakonsha kwimupa mingilo pa kuba’mba bamone inge mwafikilamo kwingila mingilo mu kipwilo. (1 Timo. 3:10) Anweba balongo mukiji banyike mwakonsha kuba byepi pa kuba’mba mutatule kukanamina mingilo mu kipwilo?
2. Mwakonsha kwikala byepi na muchima wa kwipana, kabiji mwakonsha kuba byepi bino?
2 Kwipana: Yukai’mba mubena kukanamina mingilo yawama, kechi kifulo ne. Onkao mambo, ikalai na muchima wa kwingijila balongo ne banyenga mu kipwilo. Mwakonsha kwikala na muchima wa kwipana umvwe ke mulanguluke byaubanga Yesu. Kino kikemukwasha kwingijilanga balongo ne banyenga. (Mat. 20:28; Yoa. 4:6, 7; 13:4, 5) Lombai Yehoba kwimukwasha kwikala na muchima wa kukwasha balongo ne banyenga. (1 Ko. 10:24) Abya mwibakwashako mingilo balongo ne banyenga bakoma nangwa kutundaika bakoka ku mupashi nyi? Pa kipwilo umvwe paikala mingilo muya na kwingilako nyi? Nanchi munengezha majashi onse mu Sukulu wa Mwingilo ne kwamba umvwe mwina jashi kechi waiya nenyi? Mukekala ba lusekelo umvwe saka mwingijila bakwenu.—Byu. 20:35.
3. Kwikala ba bumupashi kwanemenaka, kabiji twakonsha kwikala byepi babumupashi?
3 Bumupashi: Kyanema mulongo mu kipwilo kwikala na bulunda bwawama ne Lesa kukila kutatu muchima pa kifulo. Muntu wa bumupashi uba bintu kwesekana na mweno ya Yehoba ne Yesu. (1 Ko. 2:15, 16) Umwesha ‘bipangwa bya mupashi.’ (Nga. 5:22, 23) Wanemeka bintu bya Bufumu. (Mat. 6:33) Mwafwainwa kwikala na bipangwa bya mupashi umvwe saka mwikala na lufunjisho lwa pa bunke. Kino kyavwangamo kutanga Baibolo moba onse, Kyamba kya Usopa, Labainga!, kunengezha kupwila ne kutanwako. (Sala. 1:1, 2; Hebe. 10:24, 25) Paulo pa kutundaika Timoti kukoma ku mupashi wanembele’mba “Saka wiketa . . . ne lufunjisho lobe.” (1 Timo. 4:15, 16) Ne anweba mwafwainwa kunengezhanga majashi mu Sukulu wa Mwingilo ne kwiamba bulongo. Nengezhezhainga jimo byo mwafwainwa kwamba mu mwingilo. Ibikilai bikonkwanyi bya kwingijila Lesa, nabiji bupainiya, kwingijila pa betele, kutanwa ku Sukulu wa Baibolo wa Balongo Bakatanda. Bumupashi bukemukwasha ‘kuchina bya kusakasaka bya bwanyike.’—2 Timo. 2:22.
4. Kwikala bakishinka kwanemena ka?
4 Ikalai Bakishinka: Kimye kya bena Kilishitu batanshi, balongo bamo bebapele mwingilo wa kwabanya bya kuja bakajilwa, na mambo a kuba ‘bajinga na byubilo byawama.’ Batumwa bebaketekejile’mba bakengila bulongo uno mwingilo, mambo bajinga bakishinka. Kino kyakwashishe batumwa kuta maana pa mingilo ikwabo. (Byu. 6:1-4) Onkao mambo, umvwe bemupa mingilo mu kipwilo mwafwainwa kutako maana. Mwafwainwa kwingila byonka byaingijile Nowa, walondejile mikambizho yonse yo bamupeele pa kuba’mba apwishe kushimika bwato. (Nte. 6:22) Yehoba watemwa bantu bakishinka bengila bulongo mingilo.—1 Ko. 4:2; monai kakitenguluzha ka kuba’mba “Kufunjisha Banyike Mingilo.”
5. Mambo ka balongo bakiji banyike kyo bafwainwa kukanaminanga mingilo mu kipwilo?
5 Byonkatu byo kyaambijiwe jimo, Yehoba ubena kusaka mwingilo wa ku nowa kumwingila bukiji. (Isa. 60:22) Bantu bavula babena kubatizhiwa pa mwaka pa mwaka, onkao mambo, ku bena kukebewa balongo bafikilamo kwingila mingilo mu bipwilo. Mingilo ya kwingila yavula bingi mu jibumba ja Yehoba. (1 Ko. 15:58) Anweba balongo mukiji banyike, nanchi mubena kukanamina mingilo mu kipwilo nyi? Umvwe byo byo kiji ko kuba’mba mubena kukeba mingilo yawama.
[Mabulañano pa peja 2]
Bantu bavula babena kubatizhiwa pa mwaka pa mwaka, onkao mambo, ku bena kukebewa balongo bafikilamo kwingila mingilo mu bipwilo
[Kitenguluzha pa peja 3]
Kufunjisha Banyike Mingilo
Balongo bakiji banyike umvwe bebafunjisha mingilo bengila bingi bulongo. Byo bapwishishe kupwila, kalama wa mwanzo waikele pa mutuntamo saka abena kukwasha musapwishi. Mwanyike wamulume waishile waimana saka apembelela, kalama wa mwanzo wamwipwizhe umvwe wakebelenga kwisamba nanji. Uno mwanyike wakumbwile’mba ubena kukeba kupyanga ku mutuntamo mambo ye mwingilo ye engila moba onse panyuma ya kupwila. Bansemi yanji byo bailenga aye washajile amba kanatu apyange. Kalama wa mwanzo watemenwe bingi. Waambile’mba: “Bakulumpe ba mu kyo kya kipwilo bayuka bingi kufunjisha banyike mingilo. Kabiji kimye kyo nafwakashijile kino kipwilo, bakulumpe bamutongwele uno mwanyike kwikala nkwasho mu kipwilo.”