Bankwasho mu Kipwilo Bengila Mingilo Yanema Bingi

MUTUMWA Paulo wanembejile kipwilo kya mu Filipai amba: “Amiwa Paulo ne Timoti, bakalume ba kwa Kilishitu Yesu, kwi anweba bazhijikwa bonse ba mwi Kilishitu Yesu baji mu Filipai, pamo na bakalama ne bankwasho mu kipwilo.” (Fili. 1:1) Apano Paulo waimwine bankwasho mu kipwilo. Kyamwekeshatu patoka kuba’mba bano banabalume baingijile mwingilo wanema bingi wa kukwasha bakulumpe mu kipwilo. Byobyo kiji ne mu ano moba, bankwasho bakwasha bakalama mu kipwilo kabiji kino kilengela bintu kwenda bingi bulongo mu kipwilo.

² Nanchi mwayuka bankwasho baji mu kipwilo kyenu nyi? Nanchi mwayuka mingilo yo bengila pa kuba’mba mumwenemo mu kipwilo kyonse nyi? Yehoba usanta bingi pa mingilo ingila bano banabalume. Mutumwa Paulo wanembele’mba: “Banabalume bengila bulongo, bekala na byubilo byawama kabiji bakonsha kukasuluka pa kwamba pa lwitabilo lwabo mwi Kilishitu Yesu.”—1 Timo. 3:13.

BIKEBEWA BYA MU BINEMBELO KU BANKWASHO MU KIPWILO

³ Bankwasho bafwainwa kwikala na byubilo bya bena Kilishitu, kwikala banabalume bo baketekela, ne kwingila bulongo mingilo yabo. Tuyuka kino umvwe twalanguluka pa byaambile Paulo mu nkalata yanji kwi Timoti pa mambo a bikebewa ku bankwasho amba: “Bankwasho mu kipwilo nabo bafwainwa kwikala bashiñama, kechi banjimi ibiji ne, nangwa batoma binyu byavula ne, nangwa ba lwiso lwa mali ne bintu ne, saka bakwachisha kyafyamika kyazhila kya lwitabilo na jiwi ja mu muchima jatoka. Kabiji bano bakibeseke patanshi ne kumona umvwe bajitu bulongo; apa bino bekale ba mwingilo, byo babula mambo. Bankwasho mu kipwilo bekale banabalume baji na mukazhi umo, batangijila bulongo baana babo ne ba mu mazubo abo.” (1 Timo. 3:8-10, 12) Inge bankwasho baikala na bino byubilo byawama kilengela kuzhikijila kipwilo na bintu byatama byo bakonsha kukalakanya mwanabalume ye batongola kwingila mingilo mu kipwilo.

⁴ Nangwatu kya kuba bankwasho banyike nangwa bakulumpe, bafwainwa kwingilanga mwingilo wa kusapwila. Na mambo a kuba’mba balondela Yesu, bengila na mukoyo mu mwingilo. Kwingila na mukoyo, kumwesha’mba Yehoba ukebesha bantu kupuluka.—Isa. 9:7.

⁵ Banabalume bo batongola kwikala bankwasho bafwainwa kwikala ba kumwenako bawama mu mvwajilo, mu mwekelo, mu ñambilo ne mu byubilo. Balanguluka bulongo kabiji kino kilengela bakwabo kwibanemeka. Kabiji bata muchima pa bulunda bwabo ne Yehoba ne pa mingilo yo bengila mu kipwilo.—Titu. 2:2, 6-8.

⁶ Bano banabalume ‘bebeseka kumona umvwe bajitu bulongo.’ Nangwatu saka bakyangye kwibatongola, bamwesheshe’mba bepana kya kine. Bamwesha’mba batangizhako bintu bya Bufumu mu bwikalo bwabo kabiji babena kukanamina mingilo yonse yo bakonsha kwibapa. Kwambatu kine ke bakumwenako bawama bo bafwainwa kulondela ku bakwabo mu kipwilo.—1 Timo. 3:10.

BYO BENGILA

⁷ Bankwasho bengila mingilo yapusana pusana kukwasha balongo ne banyenga. Kino kilengela bakalama kuta muchima pa kufunjisha ne kwingila bulongo mwingilo wa bukafunga. Pa kupa bankwasho mingilo, jibumba ja bakulumpe mu kipwilo jitala pa bulume bwabo ne kukajilwa kwa kipwilo.

⁸ Akimonai mingilo imo yo bengila: Nkwasho umo bakonsha kumupa mwingilo wa kutala pa mabuku a kipwilo, kuba’mba atweba bonse tutambulenga mabuku o tukeba kwingijisha atweba bene ne a kwingijisha mu busapwishi. Nkwasho mukwabo bamupa mwingilo wa kutala pa mali a kipwilo nangwa bikachi bya nyaunda. Bakwabo bebapa mwingila wa kwingijila ku bya kwambilamo, ku bijimba, kwingijila ku mutuntamo, buasha, ne kukwasha bakulumpe mu mingilo ikwabo. Kuji mwingilo wabaya bingi wa kuwamisha Nzubo ya Bufumu ne kwiilama bulongo, onkao mambo, javula bankwasho bebapa uno mwingilo wa kuwamisha.

⁹ Mu bipwilo bimo, nkwasho umo bakonsha kumupa mwingilo umo. Mu bipwilo bikwabo, nkwasho umo bakonsha kumupa mingilo yavula. Kimye kimo, mwingilo umo bakonsha kumupana ku bankwasho bavula. Umvwe kafwapo bankwasho bavula ba kwingila mingilo imo, jibumba ja bakulumpe jakonsha kusala basapwishi babatizhiwa baji na byubilo byawama bafwainwa kwingilanga ino mingilo. Mu jino jishinda, bano balongo bafunda mingilo ikebakwasha umvwe nabo bafikilamo kwibatongola kwikala bankwasho. Umvwe kafwapo balongo, nyenga uji na byubilo byawama bakonsha kumwambila kukwasha mu mingilo imo nangwa kya kuba kechi bakonsha kumutongola kwikala nkwasho ne. Muntu wabula kaneneno ke muntu uji na byubilo byawama kabiji upopwela Lesa, bano bo bantu bo twafwainwa kufunjilako. Inge mulongo nangwa nyenga utanwa ku kupwila, uya mu mwingilo wa mu bujimi, wikala bulongo na kisemi, usala bya kisangajimbwe byawama, uji na mvwajilo ne mwekelo yawama ne byubilotu bikwabo byawama, wakonsha kwikala wa kumwenako wawama.

¹⁰ Mu bipwilo muji bakulumpe bacheche, bankwasho bafikilamo bakonsha kwibambila kwisamba na bakeba kubatizhiwa mepuzha aamba pa byo twaitabilamo. Ano mepuzho aji mu bya Kulumbulula, “Lubaji 1: Byaitabilamo Bena Kilishitu.” Byo kiji kuba’mba mu “Lubaji 2: Byafwainwa Kwikala Bena Kilishitu,” muji bintu byakunza muntu mwine, mukulumpe mu kipwilo ye wafwainwa kwisamba nanji luno lubaji.

¹¹ Umvwe kibena kukebewa, jibumba ja bakulumpe jakonsha kufuukulapo kupimpunzhanya bankwasho mu mingilo yabo na bankwasho bakwabo. Pano bino, mufuma bintu byawama mu kuleka balongo kutwajijila kwingila mwingilo umo pa kimye kyabaya pa kuba’mba bamuyuke bulongo.

¹² Kwesakana na byo kiji pa kipwilo, kwakonsha kwikalapo ne mingilo ikwabo yo bakonsha kupa bankwasho pa kuba’mba kuyilako kwabo palutwe “kumweke ku bantu bonse.” (1 Timo. 4:15) Umvwe kafwapo bakulumpe mu kipwilo bavula, nkwasho bakonsha kumutongola kwikala nkwasho ku kalama wa jibumba, nangwa bimye bimo, kwikala kalume wa jibumba, saka bamutangijila ku bakulumpe mu kipwilo. Inge kyakonsheka, bankwasho bakonsha kwibapa majashi amo mu Kupwila kwa Bwikalo ne Mwingilo ne kutangijila Lufunjisho lwa Baibolo lwa Kipwilo, ne kwamba majashi a mvula bantu. Bankwasho bakonsha kwibapa mingilo ikwabo inge paji kukajilwa kabiji inge bafikilamo kwingila yewo mwingilo. (1 Pe. 4:10) Pa kukwasha bakulumpe mu kipwilo, bankwasho bafwainwa kwipana abo bene.

¹³ Nangwa kya kuba mwingilo wabo wapusanako na wa bakulumpe mu kipwilo, bino naye ke mwingilo wazhila kwi Lesa kabiji wanema pa kuba’mba kipwilo kingilenga bulongo. Mu kupita kwa kimye, umvwe bankwasho ke bengile mingilo yabo bulongo ne kufikilamo kwikala bakafunga nangwa bafunjishi, bakonsha kwibatongola kwikala bakulumpe mu kipwilo.

¹⁴ Umvwe mwi mulongo uji na myaka pakachi ka 13 ne 19 nangwa popo mwabatizhiwatu, nanchi mubena kukanamina kwikala nkwasho mu kipwilo nyi? (1 Timo. 3:1) Bantu bavula byo babena kwiya mu bukine pa mwaka pa mwaka, banabalume bakosa mu lwitabilo, babena kukebewa kwingila mingilo mu kipwilo. Mwakonsha kukanamina ino mingilo kupichila mu kwikala na muchima wa kukeba kukwasha bakwenu. Jishinda jimo jo mwakonsha kubilamo kino, ke kulangulukanga pa byaubilenga Yesu. (Mat. 20:28; Yoa. 4:6, 7; 13:4, 5) Mukakebeshanga kukanamina mingilo mu kipwilo inge mwalanguluka pa lusekelo lufuma mu kupana. (Byu. 20:35) Onkao mambo, ipanainga kukwasha bakwenu, kuwamisha Nzubo ya Bufumu nangwa kwamba majashi a baana ba sukulu abula bene mu Kupwila kwa Bwikalo ne Mwingilo. Kukanamina mingilo kwavwangamo ne kwibikishako kwikala na byubilo bya bena Kilishitu inge kimye kyonse ke mwikale na lufunjisho lwa pa bunke. (Sala. 1:1, 2; Nga. 5:22, 23) Kabiji mulongo ubena kukanamina umwesha’mba bakonsha kumuketekela kabiji wa kishinka inge bamupa mingilo mu kipwilo.—1 Ko. 4:2.

¹⁵ Mupashi wazhila ye utongola bankwasho kuba’mba kipwilo kimwenemo. Bonse mu kipwilo basanta bingi pa mingilo yakosa ingila bankwasho inge ke bakwatankene pamo nabo pa kwingila mingilo yabo. Mu jino jishinda, kipwilo kikamweshanga lusanchilo ku lunengezho lwa Yehoba lwa kulama bulongo ba mu nzubo.—Nga. 6:10.