‘Ikalai Banonshi Bamumingilo Yawama’
1 Mumyaka yapeleleko yakubambakana kwanji mumwingilo, mutumwa Paulo waingijile bingi pamo na Timoti ne Titusa. Wibanembejile byambo bimotu byakwibakosesha bonse babiji. Wabujile Titusa kuba’mba “aba bamwitabila Lesa” bafwainwa ‘kutako muchima mu kubanga mingilo yawama.’ (Titu. 3:8) Timoti wamubujile’mba aba baketekela mwi Lesa bafwainwa “kwikala banonshi ba mu mingilo yawama.” (1 Timo. 6:17, 18) Bino byambo bitukosesha bingi neatweba! Pano kika kyakonsha kwitutundaika kwingila mingilo yawama mubwikalo bwetu? Kabiji ñanyi mingilo yotukengilanga mumoba akulutwe?
2 Lwitabilo mwi Yehoba, kutemwa kotwamutemwa neluketekelo lwawama loetupa bitutundaika kwikala banonshi bamumingilo yawama. (1 Timo. 6:19; Titu. 2:11) Kikatakata mukino kimye kyamwaka, tubena kuvululwako kuba’mba Yehoba watumine Mwananji panopantanda aye Yesu amba abingishe Shanji nekushinkwila bantu jishinda jakubumi bwamyaka nemyaka. (Mat. 20:28; Yoa. 3:16) Kino kikalumbululwa bulongo pa Kivuluko kya lufu lwa Kilishitu pa March 28. Byotuji naluketekelo lwakutambula bumi bwamyaka nemyaka, nanchi kuba twaingila papelela ngovu yetu “kwikala banonshi ba mu mingilo yawama” nenyi? Kwakubula nangwa kuzhinaukatune twingila nangovu! Ñanyi mingilo yotwafwainwa kwingila lelo jino?
3 Mingilo Yawama Yotukengilanga mu March nemu Bañondo Bakwabo: Kwakubula nangwa kuzhinaukatune, tukatanwako ku Kivuluko—kimye kyanema mumwaka ku Bakamonyi bakwa Yehoba mwaya ntanda yonse. (Lu. 22:19) Pano bino tukeba tukasangalele pamo nabantu bavula pa kyokya kimye. Monai sawakya wa mwingilo uji mu Kyamba kya Usopa kya January 1, 2002, kabiji musakumona kuba’mba mwaka wapwa mubyalo byavula kuzhokoloka ntanda yonse, batainwe ku Kivuluko bavujile bingi bimye bisatu, bina, bitanu nangwa kukilapo panambala yabasapwishi. Kine kine bonse mukipwilo bebikisheko bingi kwingila nangovu kwita bantu munyaunda yabo kwiya nakutanwa ku Kivuluko. Onkao mambo, tukeba kwikala nakimye kyabaya kutatula lonka luno kukafika nepa March 28 kwitanga bantu bakeye nakutanwa ku Kivuluko, nekwibakwasha kufunda luketekelo lwalupulukilo.
4 Mu April, kimo kimye tukatatula kwiyowa kimye kyawama kyamwela. Twakonsha kwingijisha byepi kino kimye kyamwela pa “kwikala banonshi ba mu mingilo yawama”? Tukoba byobyo inge twatwajijila kwingila namuchima yense mumwingilo wakusapwila mambo awama, kokuba’mba “kwingila mingilo yawama.” (Titu. 2:14; Mat. 24:14) Umvwe kechi mwaingijileko bupainiya bwakukwasha mu March ne, abya mwakonsha kwingilako mu April ne May nyi? Umvwe mubena kwingila bupainiya mu March, nanchi kuba mwatwajijilanenyi?
5 Bamo bengila nkito yakumubiji bengilako uno mwingilo awala umo nangwa kukilapo pakuya kunkito, sabasapwila busapwishi bwamumukwakwa nekubantu batendeka lukelo-kelo busulu bwabo. Bamo benengezha kusapwila kimye kyapachaile. Bakwabo nabo batana kuba’mba kibapelelako kufunjisha lufunjisho lwa Baibolo kubakwabo bobengila nabo kinto pakino kyonka kimye kyapachaile. Banyenga bavula basongolwa bapatulako kimye kyakuya mumwingilo wabusapwishi, baya baana babo sabakiji kusukulu. Moba amo babuka lukelo-kelo nekwingilako mingilo imo yapanzubo, kyakuba mute baikala nakimye kyabaya kyakusapwila nekufunjisha.—Efi. 5:15, 16.
6 Nangwa kyakuba kechi mwakonsha kwingilako bupainiya bwakukwashane, mwakonsha kutanchika mutanchi wakyenu kyenu kwingilako mwingilo papelela ngovu yenu “mukuba byawama, ne kwikala banonshi ba mu mingilo yawama, mwikale bampanyi, bakukwashañana” bukine nabakwenu.—1 Timo. 6:18.
7 Vulukai Mwingilo Wawama Wakulenga Baana Babwanga: Pamwaka pamwaka kwikala bantu bakeba kufunda bukine beya nakutanwa ku Kivuluko. Nanchi bamo mukipwilo bakonsha kufwakesha boba batanwako bino bakyangye kutatula kufunda bukinenyi? Nanchi mwafwainwa kubwelako nakutatula kwibafunjisha kuba’mba bakomeneko kumupashi? Kimo kimye bamo bamubano bakatanwa ku Kivuluko kebalongo bakumubiji ba Bakamonyi. Bamo kimo kimye bafundanga bukine kunyumakwe bino bakebatu kwibatundaika kuba’mba batatule jikwabo kufunda bukine nekutanwanga kukupwila kimye kyonse. Kashika byotwakonsha kusekela kwibamona baaluka kebamingilo bakwetu ba Yehoba babambakana!
8 Umvwe March nebañondo bakwabo twibengijisha mumwingilo, kwakubula nangwa kuzhinaukatune, tukatana bantu bavula baji nalusekelo lwakufunda botukafwakesha jikwabo. Bashilai jipuzho, samukyangye kufumapo. Kepo mwibalaye’mba musakukabwelako jibiji nakukumbula. Umvwe mwauba kino, kikapela bingi kubwelako. Kiwama bingi umvwe twabwelako bukiji. Umvwe kechi twatatula lufunjisho kimye kitanshine, tukatatule kimye kyotukabwelako jibiji umvwe kyakonsheka.
9 Umvwe tuji mubusapwishi bwamumukwakwa, twafwainwa kumona kuba’mba twatapo muchima kwisamba nabantu. Basapwishi bavula kimye kyobasapwila mumukwakwa javula bebapa mazhina, makeyala, nemanambala afoni kubantu baji nalusekelo lwakufunda bukine. Umvwe muntu yemwisamba nanji kechi wikala munyaunda yenune, tambulai pepala ya Please Follow Up (S-43) ku Nzubo ya Bufumu, inembai, nekwiipana kumunembeshi mukipwilo, aye bino akapane kukipwilo kiji kuyoyo nyaunda ikelamo yewo muntu. Umvwe munembeshi wakankalwa kuba byobyo, wafwainwa kutuma kuofweshi yamusampi kobakonsha kuyuka byakuba. Mujino jishinda, awa muntu wakonsha kutundaikwa.
10 Umvwe muntu wimupa nambala yafoni kwakubula keyala, monai kuba’mba mwisamba nanji jibiji pafoni. Nengezhezhai jimo byomukeba kwisamba nanji. Ingijishai buku wa Ukupelulula kuba’mba emukwasheko kutana mikumbu bukiji. Bamo babena kwingila bingi bulongo kufunjisha bantu pafoni, kubikakotu neboba bobabulanga kutana panzubo javula. Nyenga umo watatwile kwipuzha manambala afoni kubanabakazhi bajinga nalusekelo lwakufunda bukine boasolomokelenga mumwingilo wakunzubo nenzubo, kyafuminemo kyakuba’mba watatwile kufunjisha mafunjisho a Baibolo abiji.
11 Ingijilai Pamo na Bakulumpe Mukipwilo Kukwasha Bakoka: Bakulumpe mukipwilo mubutemwe batemwa bingi kukwasha bano bantu. Bachechetu bamubano, bobetendekelakotu bene kutanwanga kukupwila. Bavuluka buneme bwakupwañena pamo na jibumba ja Yehoba pakuba’mba bazhikijilwe kumupashi byonka byokyanembwa mu Salamo 91. Bamo bamubano batatula jibiji kuya mumwingilo wamubujimi. Umvwe bakwabo bakoka kala baiya nakushinkwa ku Kivuluko uno ñondo, kimye kimo bakonsha kwitaba kutatula nabo lufunjisho lwa Baibolo. Umvwe kyaikala byobyo, bakulumpe mukipwilo bakanengezha lunengezho lwamuntu wakufunjishanga bonse bakeba bobo bukwasho. Umvwe bemubula kuba’mba mukwashe muuno mwingilo, bukwasho bwenu bukasanchilwa bingi.—Loma 15:1, 2.
12 Twajijilai “Kwingilanga Mingilo Yawama”: Bantu bavula baingilako kala bupainiya bwakukwasha muñondo umo nangwa kukilapo batana kuba’mba mwingilo wabo wamubujimi ubailako mubañondo balondelapo. Bataine bantu baji nalusekelo lwakukeba kufunda bukine abo bobalaile kufwakesha jikwabo. Kino kibatundaikile kuyanga kimye kyonse mumwingilo wamubujimi pakuba’mba besambe jibiji nabantu bakeba kufunda. Bamo batatwile mafunjisho, kabiji kino kibakwashishe kwingila nangovu mumwingilo.
13 Kabiji bakwabo nabo bataine lusekelo kwingila mwingilo wabusapwishi nekulenga baana babwanga abyo bibatundaikile kupituluka mumingilo yobanemeka mubwikalo bwabo. Kyafuminemo, bamo bakepesheko kimye kyabo kyamingilo yabo yakumubiji nekutatula mwingilo wa bupainiya bwakukwasha. Bamo nabo batatwile mwingilo wabupainiya bwakimye kyonse. Baketekejile mwi Lesa kechi mubintu byaino ntandane. Bataine kuba’mba kwikala “bampanyi, ba kukwashañana,” kwibaletejile mapesho kufuma kwi Yehoba nekwibakoseshesha luketekelo lwabo lwakwiyowa “bumi, bonkabwa bwa kine kine.” (1 Timo. 6:18, 19) Ee, umvwe bavula baingilako mwingilo wabupainiya, kipwilo kyonse kimwenamo mfweto. Bapainiya batemwa kushimikizha byobatana mumwingilo nekwitako bakwabo kuya nabo mubusapwishi, kabiji kino kikosesha bingi bumupashi mukipwilo.
14 Twayai atweba bonse twikale “banonshi ba mu mingilo yawama” mukino kimye kya Kivuluko nemumobatu akwabo kubaishako mwingilo wabwina Kilishitu. Twayai tumweshe lusanchilo pabintu Yehoba byoetubila kwitupa luketekelo lwakwikala myaka nemyaka mukyalo kipya mwayula bololoke.—2 Pe. 3:13.