‘Bobilai Bantu Bonse Byawama’
1 ‘Sapwilai Mambo a Lesa’ ne ‘Ikalai Banonshi Bamumingilo Yawama’ yomitwe yajinga mukyamukachi kya Mwingilo Wetu wa Bufumu, wa February ne March 2002. (Kolo. 1:25; 1 Timo. 6:18) Muino mitwe twatundaikilwe kwingila bingi nangovu kukwasha bakeba kufunda bukine kuba’mba bakatanwe ku Kivuluko, kukwasha bakoka kuba’mba batatule jibiji kwingila mingilo yakipwilo, nekukwasha baana betu kabiji nebotufunjisha Baibolo babena kuba bulongo kuba’mba batatule kusapwila mambo awama. Kwakubula nangwa kuzhinaukatune, tusangalala bingi pakumona bibena kufuma mumingilo yetu yotubena kwingila nangovu. Pano, ‘byo tuji ne mwa kubila, twayai [tutwajijile] kwibobila bantu bonse byawama.’—Nga. 6:10.
2 Betai Bakatanweko Nejikwabo: Mu Zambia monkatu, bantu kukila pa 300,000 babula basapwishi bamambo awama, batanwa ku Kivuluko pamwaka pamwaka. Kutanwako kwabo byokumwesha lusekelo lobaji nalo, twafwainwa kuba byepi kuba’mba tutundaike boba “batongwejilwe bumi bwa myaka” kuba’mba ‘betabile’? (Byu. 13:48) Batundaikai bukiji-bukiji kuba’mba batatule kutanwanga kukupwila kwakipwilo.
3 Nga mamboka omwabujila kwitako muntu ubena kukeba kufunda bukine kuba’mba atanweko ku Lufunjisho lwa Buku pa Kipwilo nekufunda lufunjisho lwawama mubuku wa Ukusesema kwa kwa Esaya? Umvwe uno muntu mulongo wenu nangwa mwiyukatu nanji kabiji mwapewa kukamba jashi mu Sukulu ya Mwingilo wa Teokalasi, mwakonsha kumwitako kuba’mba akeye nakumvwako jashi jenu. Mubujilai jimo mitwe yamajashi a Baibolo ikambiwanga mumilungu ikalondelapo. (Mutanchi watanchikwa katataka wafwainwa kulamikwa pakipabi kya mabulañano.) Monaipo jishinda jakukwashishamo yewo muntu kuba’mba ekale nakizaku kyakupopwela Yehoba. Kabiji umvwe mukipwilo kyenu kafwako babena kumufunjisha Baibolo ne, mwakonsha kutatula kumufunjisha.
4 Twajijilai Kukosesha Bakoka: Bavula bamuboba batanwa ku Kivuluko bepana kala kwi Yehoba. Nangwa byonkabyo, pakimye kimo balekele kusapwila mambo awama. Pano bino mutumwa Paulo witukambizha amba “twibobile bantu bonse byawama pakuba bene bene bonka bakwetu ba mu lwitabilo.” (Nga. 6:10) Onkao mambo, bakoka bobene bene botwafwainwa kuteshako muchima.
5 Kampepo bamo baumvwina kala lutundaiko lwibatundaika bakulumpe mukipwilo nelwibatundaika bakwabo kuba’mba batatule jibiji kuya mumwingilo. Umvwe bakulumpe mukipwilo bemubula kwingijila pamo namusapwishi watatula jikwabo kwingila, yukai’mba butemwe bwenu bomwatemwa Yehoba nemwingilo wamubujimi bukatundaika yewo musapwishi. Mubulai byomwingila mumbaji yapusana-pusana yamwingilo pakuba’mba atane lusekelo mukuba kino, mambo kikamulengela kukosela mumwingilo wakusapwila, nekukonsha kutambula mapesho a Yehoba.
6 Kwashai Basapwishi Bakatataka Kwikala Napakutatwila Pawama: Kimye mwanamukazhi umo wajinga nalusekelo lwakufunda bukine kyoayukile kuba’mba watana jibumba ja Lesa jakine, ponkapotu wakebeshe kutatula kuya mumwingilo. Panyuma yakuyuka byakebewenga kwiaye, waambile’mba: “Mbena kukeba kutatula kwingila lonkaluno.” Umvwe kyakuba muntu yemufunjisha Baibolo bamwitabizha kutatula kuya mumwingilo wamubujimi, mukwashai ayuke buneme bwa “kutatula kwingila ponkapo,” kabiji mukwashai kuba’mba ekale napakutatwila pawama. Mukwashai ayuke byakunengezhezhanga jimo mwingilo wamubujimi nekuyangamo kimye kyonse mulungu nemulungu.
7 Umvwe mwanenu yewaikala musapwishi wabula kubatizwa, ingilainga nanji kuba’mba aileko palutwe kwesakana nakimino kyanji nebulume bwanji. Monka mukumukwasha, mukakumya bingi byomukamumona keesambe namuntu, kutanga mu Baibolo, nekutambika mabuku. Umvwe watana muntu walusekelo mumwingilo wamubujimi, mufunjishai byakubwelako jibiji kuyewo muntu ukeba kufunda.
8 Baishai Mwingilo Wenu: Nanchi bwikalo bwenu bwimuswisha kubaishako mwingilo wabusapwishi kuba’mba mukengileko nepanyuma yakimye kya Kivuluko? Abya mwakonsha kunungako awala umo nangwa abiji mulungu nemulungu pamaawala omwingila javula mumwingilonyi? Abya mubena kutala pakalenda kuba’mba muyuke kimye kyomukengilako jikwabo bupainiya bwakukwasha? Inyi mwakonsha kupimpula bwikalo bwenu kuba’mba mutatule mwingilo wakimye kyonse? Kwibikishako kwetu mumwingilo kwakonsha kukwasha bakwenu kutambwila bukine! (Byu. 8:26-39) Byotubena kupembelela kimye kyakulutwe, twayai ‘twiubile byawama atwe bene na bene, ne ku bonse bakwetu.’—1 Tesa. 5:15.
[Kitenguluzha pa peja 3]
Twajijilai Kukwasha:
□✔ Batanwa Kukivuluko
□✔ Basapwishi Batatula jibiji Kwingila
□✔ Basapwishi Bakyangye Kubatizwa