April—Kimye kya ‘Kwingila na Ngovu ne Kwibikako Atweba Bene’
1 Milungu ya mu moba a Kivuluko kyo kimye bantu ba Yehoba kyo balanguluka-langulukapo. Kyo kimye kya kulanguluka pa bitubila lufu lwa Kilishitu ne luketekelo lwitupa Lesa kupichila mu mashi a kwa Yesu aichikile. Byo mulanguluka pa byo kyajinga pa April 19 mwaka wapwa, muvulukapo ka? Abya mwakonsha kuvuluka bantu bo mwamwene pa joja juba, kupwañana kwa ku mupashi kwajingako pa Kivuluko, jashi ja Baibolo jaambiwe ne milombelo ya pa muchima yalombelwe nyi? Kampe mwafuukwile’mba musanchilanga Yehoba ne Yesu pa butemwe bo bamwesha kwi anweba. Nanchi pa kino kimye, ino ndangulukilo ya uno mutundu imulamata byepi?
2 Kya kine, bantu ba Yehoba bamwesha lusanchilo mu mashinda avula kechi mu byambotu ne. (Kolo. 3:15, 17) Mu April mwaka wapwa, twamwesheshe lusanchilo lwetu kwi Yehoba pa lupulukilo lo etunengezhezha kupichila mu kwingila na ngovu mu mwingilo wetu wa bwina Kilishitu. Bapainiya bakukwasha bavujile bingi kabiji bakijilepo na kipimo kya 40 pesenti pa kibelengelo kikatampe kya mwakawa muno mu Zambia. Kwingila na ngovu kwabo, pamo na bakwabo bataya mbila ya Bufumu kwaletele bibelengelo bikatampe bipya bya maawala, magazini ashilwe ne kubwelako kwaubiwe. Twasangalele bingi pa kutatula mafunjisho a Baibolo apya avula ne kumona kibelengelo kipya kya bantu batainwe ku Kivuluko!
3 Kya kine, bukine bwa luketekelo lwetu bwitutundaika kwikala babambakana mu mwingilo. Kijitu nobe byanembele mutumwa Paulo’mba: “Na onka ano mambo twingila na ngovu ne kwibikako atweba bene mambo luketekelo lwetu luji mwi Lesa mumi, ye Mupulushi wa bantu bonse, pakuba baitabila bo bene.”—1 Timo. 4:10, NW.
4 Mu kino kimye kya Kivuluko, musakumwesha byepi luketekelo lwenu mu lunengezho lwa Yehoba lwa kuba’mba bantu bakekale na bumi? Mu April mwaka wapwa twamwene kibelengelo kya basapwishi bavula ba Bufumu kukila pa bibelengelo bya ku nyuma kwe muno mu Zambia. Abya twakonsha kukila pa kino kibelengelo mu iwe ñondo wiya wa April nyi? Ee, twakonsha. Bino pa kuba’mba tukonshe kuba byo byo, basapwishi bonse babatizwa ne babula kubatizwa bafwainwa kwivwanga mu uno mukwekele. Bapya bavula nabo bafwainwa kwingilako. Onkao mambo, byo mubena kulanguluka kwingila na ngovu ne kwibikako anweba bene mu iwe ñondo wiya wa April, langulukaipo mashinda amo o mwakonsha kutundaikilamo bakwenu, kuvwangako bapya ne babula kupilwa kuba’mba mukengijile nabo pamo mu uno mwingilo.
5 Kukwasha Bamo Kuba’mba Batatule Jibiji Kusapwila: Umvwe mwayukapo bamo bababulenga kusapwila pa ñondo umo nangwa babiji, mwakonsha kwibakosesha ne kwibalomba kwingijila nabo pamo mwingilo wa mu bujimi. Umvwe bamo mu kipwilo bakoka, bakulumpe mu kipwilo bafwainwa kuya na kwibakosesha kuba’mba batatule kwingila jibiji mu iwe ñondo wiya wa April.
6 Atweba bonse twafwainwa kutwajijila na kulomba mupashi wa Yehoba kwitukosesha mu mwingilo wanji. (Luka 11:13) Twafwainwa kuba byepi pa kuba’mba twikale na uno mupashi? Twafwainwa kutanganga Byambo bya Lesa byanembeshiwa. (2 Timo. 3:16, 17) Kabiji twafwainwa kumvwa “bintu byamba Mupashi ku bipwilo” pa kutanwa ku kupwila konse kutanu mu mulungu. (Lum. 3:6) Kino kyo kimye kya kukwasha babula kuyayaya mu mwingilo ne bakoka kwikala na lufunjisho lwabo lwa pa bunke ne kutanwanga kimye kyonse ku kipwilo. (Sala. 50:23) Byo tubena kuba bino, netuwa kasa twikenkenta atweba bene ku mupashi. Nangwa kiji byonkabyo, kuji ne bikwabo byo twafwainwa kuba.
7 Mutumwa Petelo walumbulwile’mba Lesa upana mupashi wanji wazhila “ku bamukokela.” (Byu. 5:32) Kukokela kwa uno mutundu kwavwangamo kumvwina mukambizho wa ‘kusapwila bantu, ne kumushimuna.’ (Byu. 1:8; 10:42) Onkao mambo, byonka byo tukeba mupashi wa Lesa kwitukosesha kusapwila, byo byo tutatula ne kumwesha kusaka kwetu kwa kwikala batokwa kwi Yehoba, utwajijila na kwitukwasha. Kange tusule buneme bwa kulondela mashinda atanshi a lukokelo ne!
8 Kukwasha Bakyanyike: Bansemi, nanchi mubena kumona kuba’mba baana benu bakeba bingi kwamba na bakwabo bya bukine? Abya muya nabo mu mwingilo wa mu bujimi nyi? Baji na byubilo byawama nyi? Umvwe ibyo, mubena kupembelela ka? Ambai na umo wa mu Kometi ya Mwingilo wa Kipwilo, ne kumona inge mwanenu wafwainwa kwikala musapwishi mu iwe ñondo wiya wa April. (Monai buku wa Abateyanishiwa, mapeja 99 ne 100.) Yukai kuba’mba baana benu nabo bakonsha kutota Yehoba mu kimye kya Kivuluko.—Mat. 21:15, 16.
9 Inetu umo wa bwina Kilishitu ku Luanshya, kimye kyonse wingila na mwananji wamulume mu mwingilo. Mwaka wapwa, uno kalombwana byoajinga mu busapwishi na bainanji, wapele mwanamukazhi umo buloshuwa wa Nanchi Lesa Ukebaka. Watatwile mwisambo ne kushikisha mwanamukazhi umvwe bumbanzhi bubiwa mu kimasamasa bubiwa na mambo akuba bansemi bakankalwa kufunda baana babo. Mwanamukazhi wakumbwile’mba: “Ee, ibyo.” Mwanamukazhi wakuminye bingi pa kumvwa jipuzho jamushikishe kalombwana wa myaka ya kusemwa 7. Kepo uno kalombwana ashikwile buloshuwa wa mu Kibemba wa Nanchi Lesa Ukebaka ne kuzhikula pa Lufunjisho 8 palagalafu 5 ne kwambila mwanamukazhi’mba atangepo. Mwanamukazhi kechi waumvwine byambo byonse biji mu buloshuwa wa Kibemba ne. Byo aipwizhe bwaluluzhi bwa kyambo kimo, waketekejile’mba baina uno mwana bo basakumulumbulwila. Wakuminye bingi pa kutana kuba’mba uno mwana wamulumbulwijile mwatajile kino kyambo. Kino kyamuletejile bingi lusekelo lwa kutatula kufunda Baibolo kabiji wakebeshe’mba uno kalombwana amufunjishenga. Na lusekelo, uno mwanamukazhi uji na baana bana, membala wa mu kipwilo kya UCZ kabiji dikonesi, waitabile’mba ku chechi kwabo kechi bafunjisha baana babacheche kufunjisha bakwabo ne. Pa kino kimye uno kalombwana uji na mafunjisho a Baibolo atanu.
10 Bakyanyike bavula luno ke basapwishi, kabiji twiyowa kwingijila nabo pamo mu mwingilo. Bano banyike bakonsha kutundaika ne kukosesha bakwabo banyike. April ye ñondo wawama ku bisemi kukosesha mfungwa yabo ne kwitundaika ku mupashi mu kwingijila pamo mu mwingilo wazhila. Mitwe ya bisemi yafwainwa kutangijila uno mwingilo.—Mana. 24:27.
11 Kwashai Bapya: Ibyepi pa mambo a bapya bo mubena kufunjisha Baibolo? Nanchi nabo bakonsha kwingilako na ngovu mu iwe ñondo wiya wa April nyi? Kampe kimye kyo mwafunjilenga nabo mu buku wa Kuyuka kitango 2, palagalafu 22, nangwa kitango 11, palagalafu 14 bamwesheshe kusaka kwabo kwa kubulako bakwabo. Umvwe muji pepi na kupwisha uno buku, isambai nabo bulongo pa uno mutwe byo mubena kufunda kitango 18, palagalafu 8, paamba kuba’mba: “Kampe muji na kizaku kya kubulako balongo benu, bakwenu, ne bakwabo bintu byo mubena kufunda. Mu bukine, kampe mwatendeka kala kwibasapwilako, byonka Yesu byo aabene mambo awama na bakwabo nangwa kimye kyo aambilengatu jashi. (Luka 10:38, 39; Yoa. 4:6-15) Pano kampe mubena kukeba kuba byavula.” Abya byo byo kiji ku bo mubena kufunda nabo bukine nyi?
12 Nanchi ye mubena kufunda nanji waitabila Byambo bya Lesa? Abya watatula kwingijisha mafunde a mu Baibolo? Nanchi wapimpula bwikalo bwaji kwesakana na mwayila bipimo bya Lesa? Nanchi utanwa ku kupwila nyi? Ubena kukeba kwingijila Yehoba Lesa nyi? Umvwe ibyo, mambo ka o mwabujila kumutundaikila kwamba na bakulumpe mu kipwilo pa kuba’mba amone inge wafwainwa kwikala musapwishi wabula kubatizwa ne kwingila nanji mu April? (Monai buku wa Abateyanishiwa, mapeja 97-9) Mu jino jishinda ukemwena mwine jibumba ja Yehoba byo jikamukwasha kwingijila Yehoba.
13 Kya kine, bamo bafunda Baibolo banunguluka bingi bukiji kukila bakwabo. Onkao mambo, kwesakana na mukambizho uji mu Mwingilo Wetu wa Bufumu, wa June, 2000, peja 4, mapalagalafu 5 ne 6 bamo bakifunda buku wa bubiji na bantu bamwesheshe lusekelo mu bukine pa kimye kitanshi pano bino bakeba bukwasho bukwabo pa kuba’mba bapwañanenga na kipwilo. Tuketekela’mba bano bantu bakishinka bakekala baana ba bwanga ba kine ba kwa Kilishitu, “nangwa mu bicheche nangwa mu byavula.” (Byu. 26:29) Umvwe mwamona’mba umo muntu mwafunda nanji pa bañondo ‘bavula,’ nanchi kino kimye kya Kivuluko kechi kyakonsha kwikala kimye kyawama koaji kutatula kumwesha lusanchilo lwa kine mu nkuulo ya kwa Kilishitu nenyi?
14 Bya Kwibakwasha Kuba’mba Bengilenga: Tufunda byavula pa byo twakonsha kukwasha bafwainwa kutatula kusapwila pa kumona Yesu byoafunjishe bakwabo. Kechi watainengatu jibumba ja bantu ne kubula batumwa banji’mba tatulai kwamba ne. Patanshi wibabujile buneme bwa mwingilo wa busapwishi ne kwibatundaika kukosela mu lulombelo. Kepo ebapele bintu bisatu: wa kwingila nanji, nyaunda mwakwingijila, ne byo bakamba. (Mat. 9:35-38; 10:5-7; Mako 6:7; Luka 9:2, 6) Ne anweba mwakonsha kuba byonkabyo. Umvwe mubena kukwasha mwanenu, ubena kufunda Baibolo nangwa muntu ubabulenga kutuma sawakya wa mwingilo ku nyuma kwe, kyawama kweseka na ngovu kulondela bishinka byalondelapo.
15 Lumbululai Buneme bwa Mwingilo: Bulai muntu buneme bwa mwingilo wa busapwishi. Ikalai basangalala pa mambo a uno mwingilo. Shimikizhai bya kumwenako bibena kumwesha kipwilo byo kibena kwingila mu uno mwingilo. Mweshai mupashi wajingapo na Yesu uji pa Mateo 9:36-38. Koseshai ubena kutengelwa kwikala musapwishi nangwa wakoka kulomba kuba’mba engilengako mwingilo ne kwingijiwa bulongo kwa mwingilo wa ntanda yonse.
16 Tundaikai Muntu Kulanguluka pa Bimye Byavula bya Kusapwila: Tongolai jishinda ja kupwila pamo na jibumba ja lufunjisho lwa buku ne kuya mu busapwishi bwa ku nzubo ne nzubo. Ambaipo pa bya kwisamba na balongo betu bakumubiji ne bakwetu nangwa byo twakonsha kwamba ku bakwetu bo twingila nabo ku nkito nangwa bakwetu baana ba sukulu pa bimye bya pachaile. Kimye kyo muji pa lwendo mu motoka, mwakonsha kutatula mwisambo ne kumwesha lusekelo ku bakwenu bo mwapatama nabo. Inge twitendekelako atweba bene, kino kipana jishuko ja kusapwila. Mashuko avula bingi akubujilamo bakwetu luketekelo lwetu “pa juba, pa juba.”—Sala. 96:2, 3.
17 Kyafwainwa kuwama umvwe anweba bukiji-bukiji kemwingijile pamo na musapwishi watatula katataka mu mwingilo wa ku nzubo ne nzubo. Umvwe mwiimikila kikonkwanyi kya kwingila na ngovu mu April, shikishai mulongo utala pa nyaunda kuba’mba emupe nyaunda mwakwingijila inge poiji. Umvwe poiji, kino kikemukwasha kwingila na ngovu kuba’mba mwiipwishe yonse. Kya kumwenako, inge mwapwisha mwingilo nangwa kimye kyo mubena kuya na kupwila nangwa kyo mubena kuyatu ku mapunzha akwabo, mwakonsha kumona muntu pa nzubo po mwabujile kutana bantu kimye kyo mwapichilepo nangwatu kya kuba’mba bantu ba po po bamwesheshe lusekelo. Umvwe kyakonsheka, pitaipo kyonka kyo kimye mambo kyo kimye kyo musakwisamba nanji bulongo. Kino kikemulengela kwiumvwa’mba mubena kwingila ne kutana lusekelo mu mwingilo.
18 Nengezhai Byambo Bitundaika: Kyapela bingi ku muntu kukeba’mba asapwilenga buluwe bwa Bufumu, bino ushupikwa mwa kwibwambila, kikatakata inge kyo kimye kitanshi nangwa walekele kusapwila pa kimye kyabaya. Kyanema bingi kukwasha bapya ne bakoka kunengezha bya kusapwila. Kupwila kwa Mwingilo ne kupwila kwa kuya mu mwingilo wa mu bujimi kwakonsha kwitukwasha mashinda mwakwambila bulongo, pano bino nangwa kiji byonkabyo muntu mwine bunke bwanji wafwainwa kwinengezha bulongo.
19 Mwakonsha kukwasha byepi bapya kwinengezha saka bakyangye kuya mu mwingilo? Ubaipo kakimwesho kacheche kapela ka byo mwakonsha kutambika magazini, bukiji-bukiji! Babulai kuvuluka pa bimweka byo baumvwine pa waileshi byalengela bantu mu yoyo nyaunda kwikala na kijikila, apa bino mutanepo kishinka kimo kya kwatankana na kiji mu magazini o muji nao pa kyokyo kimye. Pitulukai pamo mu byo musakwamba ne kwibingijisha mu mwingilo pa kyonka kyo kimye.
20 Byo Twakonsha Kulengela Kibelengelo Kubailako: Mwaka wapwa kibelengelo kya batainwe ku Kivuluko mwaya ntanda yonse kyakijile 14.8 milyonyi. Kibelengelo kya basapwishi batumine sawakya wa mwingilo kyakijile 6 milyonyi. Kibena kulumbulula’mba bantu pepi na 8.8 milyonyi bajinga na lusekelo lwa kutanwa ku ino pologalamu iikajila ko baumvwine lufunjisho lukatampe lwa Baibolo saka lufunjishiwa. Bajinga ne na jishuko ja kwituyuka atweba bamo bamo, akyo kampe kibasangajikile pakatampe. Bavula betutakaika, kupana bukwasho ku mwingilo wetu wa ntanda yonse ne kwitwimenako ku bangi. Jino jibumba jikatampe jibena kumweshatu patoka kuba’mba kulutwe na lwendo kibelengelo kikabailako. Twakonsha kuba byepi pa kuba’mba twibakwashe kunugulukilako?
21 Bapya bavula batanwa ku Kivuluko mambo a kuba yetu twibechile. Kino kibena kulumbulula’mba yense waitwa ujipo na ye eyuka nanji mu luonde. Umvwe muntu ye twaichile waiya, yetu twafwainwa kumutambwila ne kumukwasha kuba’mba amwenemo bulongo mu kupwila. Na mambo a kuvula kwa bakashonkena mwa kupwila, mukwashai kumona pa kwikala. Mupaikoyi Baibolo ne kwimbila nanji pamo mu buku wenu wa nyimbo. Kumbulai mepuzho aji onse o akonsha kwipuzha. Umvwe mwamuta muchima, mwakonsha kumulengela kwikala na lusekelo lukatampe. Kya kine, atweba bonse tuji na uno mwingilo, umvwe twamona muntu ye tukyangye kumonapo kala, twafwainwa kumutambwila ne kwisamba nanji bukiji-bukiji pa kuba’mba tumuyuke.
22 Kutanwako ku Kivuluko kwakonsha kwalula ndangulukilo ya muntu. Kyalengela kuba’mba eye na kupwila ke kishinka kya kuba’mba ukyangye kutana byo akeba. Onkao mambo waiya na kumvwa byo tufunda kuba’mba ebilangulukepo bulongo. Kulumbululwa kwa lunengezho lwa nkuulo yawamisha kwakonsha kwikala jishinda ja kusolwelamo bukine bwa Lesa ku muntu wabula kuyuka butemwe bukatampe bwa Yehoba. Wakonsha kumona’mba twi bantu bapusanako—bakishinka, babibusa, baji na butemwe kabiji bamushingi. Mazubo etu mo tupwila kechi aji na biji machechi mo amwene bimpashañano ne byubilo bimo byabula kuyilamo ne. Bano bantu bapya bamona kuba’mba mu luonde muji bantu bapusana-pusana kabiji kechi kwikala kulomba mali ne. Kino kibatundaika kukeya ne jikwabo.
23 Pa nyuma ya Kivuluko, bamo bafwainwa kuvuluka kufwakashisha bonse bantu bapya batainweko ne kwibakwasha. Umvwe mwaichilepo bapya, muji na mwingilo wa kwibakwasha. Saka bakyangye kuya ne, monai kuba’mba mwibabula kupwila kukwabo kwikalako pa Nzubo ya Bufumu. Tongolai mutwe wa jashi ja mvula-bantu jikalondelapo. Babulai mpunzha ne kimye kya kupwila kwa Lufunjisho lwa Buku pa Kipwilo iji kwipi na kobekela. Kepo mwibape ne buku wa Insansa sha Lupwa, ne kwibabula’mba mutwe ye tukafunda mu mulungu wa April 30 ke wa kuba’mba, “Cingilileni Ulupwa Lwenu ku fya Kusonga Ifyonaula.” Balumbulwilai’mba pa mwaka pa mwaka kwikala kupwila kwa nkambi, kupwila bantu bavula na kwibakosesha ku mupashi.
24 Bafwakashishai ku nzubo yabo. Monai kuba’mba baji na buloshuwa wa Nanchi Lesa Ukebaka ne buku wa Kuyuka, mambo mo mo bakafunda mafunjisho anema a mu Baibolo. Umvwe bakyangye kutatula kufunda, bambilai’mba mukeba kutatula nabo lufunjisho lwa Baibolo. Babulai kuba’mba bafwainwa kutanga buloshuwa wa Inte sha kwa Yehova Ni Bani? Finshi Basuminamo?, ulumbulula bulongo bingila jibumba jetu. Umvwe muji na vidyo nabiji ya Our Whole Association of Brothers, bamweshai. Nengezhai kwibayukanyikisha ku balongo ba mu kipwilo. Saka mufwakashisha bapya mu bañondo balondelapo, kwibeta na kutanwa ku kipwilo kimye paina wingijila kijiiji kyo abena kufwakashisha kipwilo nangwa kimye kuji kupwila kwa kijiiji ne juba ja kupwila kwiikajila. Bobilai byavula pa kuba’mba bemwene abo bene kuba’mba nabo ‘batongwelwa bumi bwa myaka.’!—Byu. 13:48.
25 Bakulumpe mu Kipwilo byo Bakonsha Kuba: Pa kuba’mba mwingilo wiikajila akengijiwe bulongo mu April uno mwaka, bakulumpe mu kipwilo bafwainwa kwingila na ngovu. Umvwe yenu mutangijila lufunjisho lwa buku, tanchikai mashinda o mwakonsha kukwashishamo bonse ba mu jibumba jenu kwingilako uno mwingilo mukatampe. Abya mu jibumba jenu muji bakyanyike, bapya, babula kuyayaya mu mwingilo nangwa bakoka nyi? Pitulukaimo ne kumona kana bansemi, bapainiya, nangwa basapwishi bakwabo batatula kwibakwasha. Bakwashai mu jishinda jiji jonse jo mwakonsha kwibakwashishamo. Nyenga umo wabulanga kuyayaya mu mwingilo wa mu bujimi pa myaka ibiji waingijile maawala 50 mu April mwaka wapwa. Kika kyamulengejile kwingila na ngovu? Waambile’mba bakulumpe bamukwashishe kimye kyo bamufwakashishe pa lwendo lwabo lwa bukafunga.
26 Bakulumpe mu kipwilo ne bankwasho bafwainwa kwingijila pamo ne kumona kuba’mba bya kwingijisha mu ñondo wiya nabiji magazini, mabuku ne nyaunda mwakwingijila, byanengezhewa kala. Abya mwakonsha kunengezha kupwila kukwabo kwa kuya mu mwingilo wa mu bujimi nyi? Umvwe ibyo, bijikai kuno kutanchika. Kukila pa byonse, mu milombelo yenu ya pa mvula-bantu ne ya kyenu kyenu, lombai Yehoba kuba’mba apeshe ñondo wakwingijilamo na ngovu mwingilo wetu wa Bufumu.—Loma 15:30, 31; 2 Tesa. 3:1.
27 Mu April mwaka wapwa, bakulumpe mu kipwilo kimo ku Luanshya, batundaikile kwingila na ngovu. Bakoseshenga basapwishi kulangulukapo na lulombelo, umvwe bakonsha kunembesha mwingilo wa bupainiya bwa kukwasha. Pa bimye byonse, bakulumpe ne bankwasho mu kipwilo batundaikilenga April kwikala ñondo wa mwingilo wawamisha. Kino kyalengejile, basapwishi bavula, kuvwangakotu ne bakulumpe ne bankwasho bonse ne bakazhi babo mu kipwilo kwingilako mwingilo wa bupainiya bwa kukwasha! Bakulumpe mu kipwilo basatu ne nkwasho umo bajinga bapainiya ba kimye kyonse.
28 Lusekelo lwa Kwingila na Muchima Yense: Ñanyi mapesho afuma mu ‘kwingila na ngovu ne kwibikako atweba bene’ mu mwingilo? (1 Timo 4:10) Pa mambo a kwingila na ngovu ko baingijile mu April mwaka wapwa, kipwilo kyatongolwa peulu pe kyanembele’mba: “Balongo ne banyenga javula bamba pa byo betemwa bene na bene mambo batatwijile kwingijila pamo na ngovu mwingilo wabo wa mu bujimi.”
29 Mulongo umo wakyanyike kilema wakebeshe bingi kwingila na ngovu mu April mwaka wapwa. Kupichila mu kunengezha bulongo ne bukwasho kufuma ku bainanji, balongo ne banyenga ba ku mupashi, wajinga na lusekelo lwa kwingila na ngovu mu yewo ñondo byo aingijileko bupainiya bwa kukwasha. Aye mwine wamwenejilemo byepi mu kwingila kwanji? Waamba kuba’mba: “Monka nsemenwa, popo neumvwinepo namba ne mwanamulume.”
30 Kechi tuzhinauka kuba’mba Yehoba upesha pakatampe bonse banemeka jishuko jabo ja kwamba pa mambo a bumfumu bwanji ne. (Sala. 145:11, 12) Byo tubena kuvuluka Lufu lwa Nkambo, tuyuka kuba’mba mapesho a kupopwela Lesa akavula bingi ne ku kimye kya kulutwe. Mutumwa Paulo wakebeshenga bingi bupe bwa bumi bwa myaka ne myaka. Bino wayukile’mba buno bupe kechi bwakupembelela saka waikalatu nzoo ne. Wanembele’mba: “Kyo kyo ñiñijila na ngovu ne kwibikako ami mwine monka mwayila kwingila kwanji, ko engila mwi amiwa na bulume.” (Kolo. 1:29, NW) Yehoba kupichila mwi Yesu, wakoseshe Paulo kwingila mwingilo wa kupulusha bantu, kabiji wakonsha kwitukosesha ne atweba lelo jino. Nanchi ne anweba byo byo mukoba mu ñondo wiya wa April nyi?
[Kitenguluzha pa peja 3]
Ñanyi ye Mwakonsha Kukosesha Kusapwila mu April?
Mwanenu?
Ye mufunjisha Baibolo?
Musapwishi wakoka?