Ikalai na Lupata mu Kuba Byawama!
1 Byo ketunangijile ku Kivuluko kya mu 2003, twafwainwa kwikala na “lupata mu kuba byawama.” (1 Pe. 3:13) Kintu kikatampe kyotwafwainwa kubila kino, ke na mambo a kitapisho kya bukuzhi bwa kwa Yesu Kilishitu. (Mat. 20:28; Yoa. 3:16) Mutumwa Petelo wanembele pa kino amba: ‘Mwakujilwe ku bwikalo bwenu buncha ... kechi na bintu bibola pamo ne siliva ne ngolode ne, poso na mashi anema, nobe a mwana mukooko wabula bulema nangwa kiko kicheche ne, o mashi a Kilishitu.’ (1 Pe. 1:18, 19) Kusanchila butemwe bukatampe bwamweshiwe, kwitutundaika kuba byawama ne kuyuka’mba Yesu ‘wipaine mwine pe atweba, kwitukuula ku bubi bonse, ne kwitokeshesha aye mwine bantu ba kwikala ke banji mwine, ba mukoyo mu kwingila mingilo yawama.’—Titu. 2:14; 2 Ko. 5:14, 15.
2 Umvwe twauba byawama ku meso a Lesa, bulunda bwetu ne aye buwama, kabiji wituzhikijila monka mu butemwe bwanji. Kabiji Petelo waambile’mba: “Aye wakosela kutemwa bumi, ne kumona moba awama, ... avundamine ku bubi ne kuba byawama, akebe mutende, ne kumulondalonda. Mambo meso a Nkambo aji pa baoloka, ne matwi anji aji konka ku milombelo yabo.” (1 Pe. 3:10-12) Mu bino bimye byakatazha, tuji bingi na lusekelo byo twayuka’mba Yehoba ukelwa kwitulama kabiji ‘witulama nobe kantu ka pa jiso [janji, NW].’—Mpitu. 32:10; 2 Moba. 16:9.
3 Nangwa kya kuba bena Kilishitu batanshi Petelo boanembejile byambo bapichilenga mu meseko, batundaikilwe kusapwila na mukoyo mambo awama kwa kubula kuleka ne. (1 Pe. 1:6; 4:12) Byo biji ne bantu ba Lesa lelo jino. Nangwa kya kuba tuji mu “bimye byakatazha,” kusanchila buwame bwa Yehoba kwitutundaika kwikala na lupata lwa kuba kyaswa muchima wa Lesa. (2 Timo. 3:1; Sala. 145:7) Twayai tumone mingilo imo yawama yotusakwingilanga byotubena kunangijila ku Kivuluko.
4 Itaiko Bakwenu ku Kivuluko: Jishinda jimo jotwakonsha kusanchilamo bupe bwa bukuzhi, ke kutanwa ku Kivuluko kya lufu lwa kwa Yesu kikekalako uno mwaka pa Kisatu April 16, panyuma ya kuzhika juba. (Luka 22:19, 20) Mwaka wapwa bantu batainweko mu bipwilo 94,600 mwaya ntanda yonse bajinga 15,597,746. Kibelengelo kya batainweko mwakawa kyakomenako na bantu kukila 220,000.
5 Banga bakatanwako uno mwaka? Kwingila kwetu na ngovu ko kukatundaika bantu kwiya na kupwila ne atweba. Nembai mutanchi wa bonse bomukeba kwitako. Pa mutanchi wenu mwakonsha kutendekelapo kisemi kyenu. Umvwe mwina kwenu kechi waitabila ne, mubulai kuba’mba mwasakisha bingi na muchima wenu yense kuba’mba mukaye nanji na kutanwako. Mwanamulume umo wabula kwitabila waambile’mba watainweko ku Kivuluko mwaka wapwa mambo wamwene kuba’mba kutanwako kwanji kwanema kabiji kukasangajika mukazhanji. Kepo palondela balongo benu, bakwenu mo mwikela kinkalankulo, mo mwingijila mingilo, nangwa bo mufunda nabo sukulu. Kulubako kwita bomufunjisha Baibolo ne.
6 Inge mwapwisha kunemba mutanchi yense, monaipo kimye kya kuya na kwibabula bonse. Babulai juba ne mpunzha kukekela kivuluko. Juba ja April 16 byo jibena kufwenya pepi, bendelai nangwa kwibatumina foni. Twayai tukwashe bantu bavula kwiya na kutanwako ku jino juba janema.
7 Kwashai Boba Baiya ku Kivuluko: Juba ja Kivuluko jikala ja lusekelo bingi. Bonse twakasuluka kutambwila bantu botubula kupwila nabo. Fikai bukiji ne kubula kuba aku kivuluko kipwatu mwaya. Pelawizhai kuyuka benyi baji mu luonde. Batambulwilai bulongo na lusekelo.—Loma 12:13.
8 Abya pajipo bamo batanwako ku Kivuluko bo mwakonsha kukwasha kukomenako ku mupashi mu kwibafunjisha lufunjisho lwa Baibolo lwa pa nzubo nyi? Nembai mazhina ne makeyala a boba bo bakyangye kufwakashishapo kala kuba’mba mukebakwashe. Umvwe samwibakwasha mu butemwe, bamo bakonsha kuba sababena kukomenako baikala ke basapwishi babula kubatizwa Kivuluko kya mwaka wiya saka kikyangye kufika. Kimye kyomukafwakashishanga batainwe ku Kivuluko, babulai amba bakeye na kumvwa ne jashi jikekalako pa April 27.
9 Nanchi Mwakonsha Kwingilako Bupainiya bwa Kukwasha byo Ketunangijile ku Kivuluko Nyi? Pa mwaka pa mwaka, mukoyo wetu wa kwingijila Yehoba witutundaika kwingila na ngovu mu mwingilo wa mu bujimi mu bañondo ba kwingijilamo mingilo ya teokalasi. Kukwatankana kwa kipwilo mu kusapwila mambo awama na mukoyo mu kimye kyakunangijila ku Kivuluko kwakonsha kuleta mfweto yawama.
10 Kipwilo kimo kiji na basapwishi 107, bapainiya ba kimye kyonse 9, ne bakukwasha 53 kuvwangako ne bakulumpe mu kipwilo ne bankwasho, kyashimwine amba: “Ñondo wa April mwaka wapwa wawamine bingi.” Nanchi bakulumpe mu kipwilo batundaikile byepi bantu kwikala na kizaku kya kwingila bupainiya bwa kukwasha mu yewa ñondo? Batatwile kutundaika bavula kwingila mwingilo saka kukiji kimye. Kupwila kwa kwinengezha kuya mu mwingilo wa mu bujimi, kwaubiwenga pa bimye byapusana pusana juba jimo kuba’mba bonse mu kipwilo bengilengako. Batundaikile ne kusapwila pa foni kikatakata ku boba babula bulume bwa kwenda.
11 Nyenga wa myaka ya kusemwa 86 ukankalwa kwenda na mambo a misongo, wanembeshe bupainiya bwa kukwasha. Lukelo wasapwilanga maawala abiji pa foni sa aikala pa tebulu wa mukibamba mwa kutekela, kabiji wakokolokangako maawala acheche, apa bino wabwela mu kwingijilapo maawala akwabo. Muntu umo ye esambile nanji wafwishishe bamwata wanji ne baana banji babalume babiji mukachi ka myaka ibiji yapitapo, kabiji kechi wayukile kine kintu Lesa kyoalekejile buno bubi kubiwa ne. Wamulumbulwijile bulongo, ne lufunjisho lwa Baibolo lwatendekele. Kusapwila pa foni kimye kya mabanga ne bimyetu bikwabo, ke jishinda jimo jawama kwamba na bantu bekala mu bishimikwa ne pa mapunzha akatazha kumonañana nabo. Kabiji kikwashako basapwishi kwamba na bantu bafuma pa nzubo kimye kya mute.
12 Bakulumpe bapezhezheko kwamba’mba: “Twajinga na kimye kyawama bingi kabiji twasanta pa kwingilako uno mwingilo ne mapesho etupesha Yehoba pa muntu pa muntu.” Ne anweba kipwilo kyenu kyakonsha kupeshiwa mu uno mutundu, umvwe mwanengezha bulongo.
13 Ingilai na Ngovu mu Mwingilo: Kutemwa Yehoba ne bakwetu ko kwitulengela kupulushako kimye pa ñondo pa ñondo kya kushilañana byambo byawama na bakwetu. (Mat. 22:37-39) Bakulumpe ba lufunjisho lwa Buku pa Kipwilo ne bankwasho babo bafwainwa kwesekesha kukwasha bonse mu jibumba jabo kwingila pa ñondo pa ñondo. Kunengezhezha jimo bya kwingilako na umo umo mu jibumba jo jishinda jawama kubilamo bino. Mukifulo kya kupembelela kutatula kumpelo ya ñondo, mwafwainwa kutendekelako jimo. Kino kikemukwasha kwikalako na kimye kya kukwashishañenamo mu butemwe.
14 Abya mu jibumba jenu ja lufunjisho lwa buku, mujipo basapwishi babula bulume bwa kwingila mwingilo na mambo a misongo nyi? Kya kine, umvwe bamo basungwa mu mazubo mobalamina balanda nangwa bekalatu ku mazubo na mambo a misongo, kechi basapwila pakatampe ne. Bino umvwe saka bengilako pacheche kumwesha kyeya kyabo nangwatu kimye kicheche, kino kyakonsha kutundaika babena kumona mingilo yabo yawama kwikala na kizaku kya kutemwa bukine. (Mat. 5:16) Bakulumpe ba lufunjisho lwa buku bakonsha kubuula bantu ba uno mutundu kuyuka’mba bafwainwa kutuma sawakya wa mwingilo wa mu bujimi wa maminiti 15. Umvwe bano basapwishi ba bukishinka kebatume sawakya wa kimye kyo baingila mu busapwishi kibatundaika ne kwibaletela lusekelo bingi. Kabiji kikwashako kwikala na sawakya wa kine wa mu mwingilo wingila bantu ba Lesa wa ntanda yonse.
15 Banyike Bapayankana mu Kuba Byawama! Byotusangalalapo pa kumona banyike ba bwina Kilishitu byo bengila na bulume bwabo bonse mu mwingilo wa Yehoba! (Mana. 20:29) Umvwe wimwanyike, abya wakonsha kumwesha byepi kizaku kya kwingijila Yehoba mu bano bañondo ba mwingilo?
16 Umvwe mu kipwilo kechi wi musapwishi wabula kubatizwa ne, abya wakonsha kukanamina uno mwingilo nyi? Ishikishe obewa mwine ano mepuzho: ‘Nanchi nayuka mafunjisho atanshi a mu Baibolo nyi? Nkeba kwingila mwingilo wa Bufumu nyi? Abya byubilo byami byawama nyi? Nanchi nakonsha kumwesha lwitabilo lwami mu kwisamba na bakwetu mambo awama nyi? Abya nasakisha amiwa mwine kwingila uno mwingilo nyi? Umvwe wa kumbula’mba ee, buula bansemi yobe’mba ukeba kwikala musapwishi. Bansemi yobe bakabuula mukulumpe umo wa mu kometi ya mwingilo.
17 Umvwe wi musapwishi wa mambo awama, nanchi wakonsha kwingilako mwingilo inge mwashinka sukulu nyi? Bakyanyike bavula bengilako bupainiya bwa kukwasha na mambo a lunengezho lwawama ne bukwasho bwibakwasha bansemi yabo ne bakwabo. Umvwe kino kechi kyakonsheka ne, ibikeko kwingila mu mwingilo wa mu bujimi. Ibikile kikonkwanyi. Kuvwanga pa kikonkwanyi kya kwingila mu busapwishi, ibikile kikonkwanyi kikwabo kya kuwamishishamo mwingilo wobe. Kampe wakonsha kwibikako amba utangenga kinembelo pa nzubo ne nzubo, kuyilako palutwe mu kubwela ku bowisambile nabo, kutendeka lufunjisho lwa Baibolo, nangwa busapwishi bwa pa foni ne mbajitu ikwabo ya kwingijilamo mwingilo. Nga mambo ka ne kwitako bakwenu mo mwikela kinkalankulo, bo mufunda nabo sukulu, nangwa balongo benu kwiya na kutanwa ku Kivuluko kya uno mwaka ne anweba ne? Kwingila na ngovu mu mingilo ya teokalasi mukafuma mfweto kabiji kikatundaika bingi ne bakwenu mu kipwilo.—1 Tesa. 5:11.
18 Kwashai Bakatataka Kuyilangako Palutwe: Mu Zambia, mwaka wa mwingilo wapwa, mafunjisho a Baibolo atangijilwe pa ñondo pa ñondo ajinga 164,613. Mu kupita kwa kimye, bano bafuunda Baibolo bakayilangako palutwe ne kwipana, apa bino ne kubatizwa. Bino saka bakyangye kwipana ne kubatizwa, twafwainwa patanshi kwibakwasha kwikala basapwishi ba mambo awama. Kino ke kintu kyanema bingi mu kufunjisha bakatataka kwikala baana ba bwanga ba kwa Yesu Kilishitu. (Mat. 9:9; Luka 6:40) Abya mujipo na ye mufunjisha Baibolo wafikilamo kwikala mwana wa bwanga nyi?
19 Umvwe mwakankalwa kuyuka bibena kuyilako palutwe ye mufunjisha Baibolo, ambilai mukulumpe wa lufunjisho lwa buku nangwa utangijila mwingilo wa mu bujimi emukwasheko. Kampepo mwakonsha kumwita amba ashinkwepo kimye kyomubena kufunjisha lufunjisho. Abe balongo bafikena kuyuka muntu ubena kufunda Baibolo umvwe ubena kuyilako palutwe nangwa ne. Bakonsha kuletapo milanguluko imo yakonsha kukwasha ye mufunjisha Baibolo kutwajijila kuyilako palutwe ku mupashi.
20 Umvwe ye mufunjisha Baibolo wimubula kuba’mba ubena kukeba kwikala musapwishi wabula kubatizwa ne anweba mwamweshatu amba wakonsha, ambai na mukulumpe utangijila mu kipwilo. Ukanengezha kuba’mba bakulumpe mu kipwilo babiji bakekale pamo ne anweba ne ye mufunjisha Baibolo ne kumona inge wafikilamo kwikala musapwishi wabula kubatizwa, kwingijisha byambo biji mu buku wa Abateyanishiwa, mapeja 98-9. (Monai Kyamba kya Usopa, kya Kibemba kya November 15, 1988, peja 17.) Umvwe ye mufunjisha Baibolo waitabizhiwa kwikala musapwishi, tendekaiko ku mufunjisha bya kwingila mwingilo. Umvwe watuma sawakya wa mwingilo wa mu bujimi, kyafwainwa kubuula kipwilo kuba’mba awo ufuunda Baibolo pano ke musapwishi wabula kubatizwa. Twaketekela namba basapwishi bakatataka bavula, banyike ne bakulumpe, bakonsha kuyilako palutwe ku mupashi mu bano ba ñondo ba mwingilo.
21 Kwinengezhezha Jimo Kwitukwasha Kwingila Bulongo: Kulangulukila jimo bya kuba kuketukwasha kwingila bulongo mwingilo byo ketunangijile ku Kivuluko. (Mana. 21:5) Bakulumpe mu kipwilo baji na bintu byavula byo bafwainwa kutako muchima.
22 Pa kuba’mba bakwashe kipwilo kwingila javula mu mwingilo, bakulumpe mu kipwilo bafwainwa kunengezha kupwila kwa kuya mu mwingilo mukachi ka mulungu yense, pa kibelushi ne pa mulungu. Mukulumpe utangijila mwingilo wa mu bujimi wafwainwa kutangijila luno lunengezho. Nanchi kupwila kukwabo kwa kuya mu busapwishi kimye kya lukelo, mute nangwa mabanga kwakonsha kubiwa nyi? Kipwilo kyafwainwa kuyuka luno lunengezho. Kyakonsha kuwama kulamika mutanchi watanchikwa pa kipabi kya mabulañano.
23 Bakulumpe mu kipwilo bafwainwa kumona kuba’mba lunengezho lwa Kivuluko lwaubiwa juba ja April 16 saka jikyangye kufika. Kino kyavwangamo kumvwañena jimo na bipwilo bikwabo bikapwila mu yoyo Nzubo ya Bufumu, kusajila jimo ba asha, bakupishamo bimpashañano, ne kunengezhezha jimo bimpashañano. Kipwilo kyafwainwa kuyukila jimo kimye ne mpunzha kukekela Kivuluko kabiji ne lupimpu lonse lwafwainwa kwikalapo mu lunengezho lwa kupwila kwenu kwa kipwilo kwa mu yeo mulungu. Kunengezhezha jimo bino bintu kukalengela kivuluko ‘kubiwa na mushingi ne mo byalondakena.’—1 Ko. 14:40.
24 Mitwe ya bisemi yakonsha kwingijishapo kimye kimo kya lufunjisho lwa kisemi kwisamba na kisemi byo kyakonsha kwingilako mwingilo byo ketunangijile ku Kivuluko. Nanchi kisemi kyenu kyonse kyakonsha kwingilako bupainiya bwa kukwasha nyi? Inyi kyakonsha kutundaikapo umo nangwa bavula ba mu kisemi kwingilako? Umvwe kino kechi kyakonsheka ne, ibikilai bikonkwanyi bya kwingila mu mwingilo pamo ne kisemi kyenu. Nanchi mu kisemi kyenu mujipo mwanyike wakonsha kwitabizhiwa kwikala musapwishi wabula kubatizwa nyi? Kisemi kyenu kikakonsha kwitako bantu banga ku Kivuluko kya uno mwaka? Kunengezha bulongo kukemuletela mfweto yavula bingi ne lusekelo mu kisemi kyenu.
25 Ingijishai Kimye Kyashalako: Kimye mutumwa Petelo kyoanembejile bena Kilishitu ba mu myaka kitota kitanshi, wibavulwileko’mba mpelo ya bwikalo bwa Bayudea yajinga ke pepi. (1 Pe. 4:7) Lelo jino, biyukilo byonse bibena kumweka bibena kumwesha kuba’mba mpelo ya buno bwikalo yafwenya kala ke pepi. Pa juba pa juba, mu bwikalo bwetu twafwainwa kumweshanga amba twayuka kino kishinka. Byotuji bakalume ba mukoyo ba Yehoba, twafwainwa kupayankana mu mwingilo wa kusapwila mambo awama.—Titu. 2:13, 14.
26 Pano kino kyo kimye kya kwingila na mukoyo! Languluka langulukainga pa bintu Yehoba byoemubila anweba, byoaubila kisemi kyenu, ne kipwilo. Nangwa kyakuba kechi twakonsha kumubwezhezha Yehoba bintu byawama byoetubila ne, bino twakonsha kumupopwela na muchima wetu yense. (Sala. 116:12-14) Yehoba uketupesha mu kwingila na ngovu kwetu. (Mana. 10:22) Twayai atweba bonse twikale ba “lupata mu kuba byawama” mu kino kimye kya kwingijilamo mingilo yavula, pakuba “amba aye Lesa atumbijikilwe mu byonse monka mwi Yesu Kilishitu.”—1 Pe. 3:13; 4:11.
[Kitenguluzha pa peja 3]
Batainwe ku Kivuluko Mwaya Ntanda Yonse
1999 14,088,751
2000 14,872,086
2001 15,374,986
2002 15,597,746
[Kitenguluzha pa peja 4]
Ba Ñanyi bo Muketako ku Kivuluko?
□ Kisemi kyenu ne balongo benu
□ Ba mu kinkalankulo ne bakwenu
□ Bakwenu momwingijila ne bomufunda nabo sukulu
□ Bomwafwakashishe ne bomufunjisha Baibolo
[Kitenguluzha pa peja 5]
Mukakwashe Bakeya ku Kivuluko
□ Mukebatambwile na lusekelo
□ Mukebafwakeshe
□ Mukatendeke kwibafunjisha Baibolo
□ Mukebabule bakeye na kutanwa ku jashi jiikajila jikekalako
[Kitenguluzha pa peja 6]
Ñanyi mingilo yo Mukeba kukengilako mu Kimye kya Kunangijila ku Kivuluko?
□ Sendai ye mwaichile kwiya ku Kivuluko
□ Ikalai basapwishi ba mambo awama
□ Ingilaingako mu mwingilo
□ Komenaiko mu mashinda a kwingijilamo mwingilo
□ Ingilaiko bupainiya bwa kukwasha