Nanchi Twakonsha Kulenga April 2000 Kwikala Ñondo Wawamisha Ñyi?
1 Mabanga a juba ja pa Kisatu, pa April 19, jikela juba jikatampe ja mwingilo wetu wa mwaka. Pa joja juba, juba byo jikayanga na kuzhika, kila-kipwilo ne mabumba a Bakamonyi ba kwa Yehoba kuzhokoloka ntanda yonse ya panshi bakekala na Kivuluko kya kuvuluka lufu lwa kwa Kilishitu. Konse ko twikala, kuvuluka juba ja kitapisho kya kwa Yesu Kilishitu kikekala kintu kyanema bingi mu mwaka. Juba ja kino Kivuluko jamweshiwa mu ñondo wa April pa Kalenda wa Nte sha kwa Yehova uwa mu 2000.
2 Ñondo yense wa April witupa jishuko jikatampe ja kumwesha lusanchilo lwetu lwa muchima yense pa butemwe Yehoba bo amweseshe kupichila mu kitapisho kya Mwananji. Mu ñanyi jishinda? Mutumwa Paulo wanembele’mba: “Butemwe bwa Kilishitu bo bwitwingijisha; mambo twalanguluka namba, umo byo afwijile bonse, nanchi bonse bafwile; kabiji wibafwijile bonse, amba, bekala na bumi kechi bakikale na kwiitokesha michima yabo abo bene ne, poso kutokesha muchima wa yewa wibafwijile ne kusanguka.” (2 Ko. 5:14, 15) Ee, byo tuji basapwishi ba Bufumu twakonsha kumwesha’mba kechi twiitokesha michima yetu atweba bene ne poso kutokesha muchima wayewa witufwijile atweba bonse, kupichila mu kulenga uno ñondo wa April kwikala ñondo wawamisha!
3 Nembeshai Bupainiya bwa Kukwasha mu April: Mutumwa Paulo witwimikijile kya kumwenako kyawama byo aambile bino amba: “Amiwa kechi natako muchima ku mweo wami nobe kyo kintu kyanema kwi amiwa ne, poso mpwishe kikonkwanyi kyami, ne mwingilo ye natambwile kwi Nkambo Yesu, wa kusapwila mambo awama a bupe bwa Lesa.” (Byu. 20:24) Tuji na jishuko jimotu jakusapwila bulongo mambo a Yehoba Lesa. Pakuba’mba tube byobyo, tubena kukeba kulenga April kwikala ñondo wawamisha mu mwingilo wa bupainiya bwa kukwasha!
4 Byo aji na mpelo ya milungu itanu, April 2000 ukekala ñondo wawama ku bavula kwingilako bupainiya. Mu May 1997, byo twafikile pa mpendwa yetu ikatampe ya bapainiya bakukwasha, bapainiya 7,695, bevwangilemo baimenejileko 8 percenti ya mpendwa ya basapwishi bonse. Pa nyuma ya myaka ibiji, mpendwa yonse pamo ya basapwishi bapaine lipoti mu ñondo wa May 1999 yananukijileko kukila pa 5 percenti. Kino kibenakulumbulula kuba’mba twakonsha kukilapo pa mpendwa ya kala ya bapainiya bakukwasha. Kunungapotu mpendwa ya maola, akebewa nayo yakepeshiwako, kulengela bavula mu kipwilo kwingilako ino mbaji ya uno mwingilo. Musapwishi yense wa batizhiwa wafwainwa kulangulukapo bulongo na lulombelo inge kana wakonsha kwingilako bupainiya bwa kukwasha mu uno April nangwa ne.
5 Kwingijisha ñondo wa April pa Kalenda wa 2000, ilengelai jimo anweba bene mutanchi wa mu ñondo wiya. Fukulai moba o mukakonsha kwikalamo na lubaji mu mwingilo wa mu bujimi, ne kuvwanga pamo maola o mubena kwiumvwa kuba’mba o mukakonsha kupana ku uno mwingilo wa busapwishi mu ñondo yense. Nungaipo ne bimye byo mukengila mu kusapwila ku bantu bakwabo ponse pa biji mu busapwishi bwa kushukilwa ne bwa mu bujimi. Nanchi maola onse pamo afika kwipi na maola 50 akebewa ku bapainiya bakukwasha nyi? Umvwe mwatana kuba’mba maola abena kukebewa ashota, nanchi mwakonsha kwalulako kukwabo mu mutanchi wenu pa kuba’mba mutaneko kimye kya kwingilako bupainiya bwa kukwasha nyi? Mubena kukebewatu kwabanya jiola jimo ne maminiti 40 kila-juba pa kuba’mba mufikizhe maola 50 mu ñondo.
6 Pakuba maola akebewa ku bapainiya ba kimye kyonse byo akepeshiwako, nanchi mubalangulukengapo bya kutwela mu mwingilo wa kimye kyonse nyi? Mambo ka a kupembelela kimye kya kisalo? Pakuba mayoo byo apwa, April ke ñondo wawama kutatwilamo bupainiya! Umvwe mubena kuzhinauka mukonsha wenu wa kufikizha maola 70 akebewa, ku bapainiya ba kimye kyonse, mambo ka o mwabujila kubila bupainiya bwa kukwasha mu April ne kwibikila anwebene kikonkwanyi kya maola 70? Inge mwamona kuba’mba mwakonsha kufikizha ino mpendwa, mwakonsha kunembesha bupainiya bwa kimye kyonse bukiji bukiji.—Monai Abateyanishiwa, mapeja 113-14.
7 Ingilai pa Pelela Ngovu Yenu byo Muji Basapwishi ba Mambo Awama: Kwi atweba basapwishi ne bapainiya bonse pamo butemwa bwa kine bo tuji nabo, pe Lesa ne pa bakwetu bwitulengela kuba na muchima yense byonse byo twakonsha kuba mu mwingilo wa Yehoba kwesakana na bulume bwetu. (Lu. 10:27) Onkao mambo, tumwesha kuba’mba “twingijisha kyakosa kasa twakolomokatu, mambo luketekelo lwetu luji mwi Lesa mumi, ye Mupulushi wa bantu bonse, pakuba baitabila bo bene.” (1 Timo. 4:10) Kyo kyo tubena kupembelela kumona bavula kwingilako uno mwingilo mu April, kila-muntu kwingila mwingilo wa Bufumu papelela ngovu yanji.
8 Kange tulubeko lutundaiko lwa kwa Yesu lwa kwamba’mba: “Bujimi bwa kunowa bwabayisha kine, pakuba ba kunowabo bakepa. Byonkabyo lombai ku Mwina bujimi atume bantu ba kunowa mu bujimi bwanji.” Pa nyuma ya kwamba bino, ponkapotu Yesu waichile bana banji ba bwanga 12 ne kwibatuma na kusapwila. (Mat. 9:37, 38; 10:1, 5, 7) Pa kupitapo mwaka umo, pa nyuma ya kuba bana banji ba bwanga jikumi na babiji bafunda bulongo mwingilo wa busapwishi, Yesu “watongwele bakwabo makumi atanu na babiji, ne kwibatuma,” kabiji wibapele mikambizho intutu imo ya kuba’mba: “Kine bujimi bwa kunowa bo bwabayisha, ... byonkabyo lombai kwi Mwina bujimi, atume ba kunowa mu bujimi bwanji.” (Lu 10:1, 2) Buku wa mu Baibolo wa Byubilo bya Batumwa waamba pe Yehoba byo aasukile ino milombelo. Pa Pentekosta wa 33 C.E., mpendwa ya bana ba bwanga yananukijileko kufika ku 120. Mpendwa yalondanka ya bana ba bwanga yafikile ku 3,000 ne ku 5,000. (Byu. 1:15; 2:41; 4:4) Pa nyuma ya bino, “ne bana ba bwanga bayilenga na kuvujisha bingi.” (Byu. 6:7) Nangwatu luno, twafwainwa kutwajijila kulomba ku Mwina bujimi kutuminapo basapwishi bakwabo ba Bufumu! Kwesakana na milombelo yetu, musapwishi yense mu kipwilo wafwainwa kwinengezha kwikalamo na lubaji mu butumwa kila-ñondo.
9 Mwane akitalaipo bulongo pa ñondo wa April pa Kalenda wa 2000. Pakuba moba abiji atanshi a ñondo byo aji Kibelushi ne Mulungu, nanchi kuba mwalangulukapo bya kuya mu busapwishi ku yoyo mpelo ya mulungu, kuba’mba mutatwileko jimo mu ñondo nenyi? Nanchi mwakonsha kutundaika “Juba ja Magazini” jonse mu ñondo yense pamo na jibumba ja Jisambijilo ja Buku jo mupwila na jo pamo nyi? Ibyepi kwingilako jiola jimo nangwa avula mu butumwa juba jonse ja pa Mulungu? Nanchi mwakonsha kukokozha kuya mu busapwishi pa bimye bya mabanga nyi? Kabiji kechi mulubeko kwingijisha mashuko a kushukilwa kusapwila pa nkito, pa sukulu nangwa kimye kyo mwingila mingilo ya kila-juba ne. Mweshai moba o mukengijisha mu butumwa, kabiji ingijishai uno kalenda kunemba maola o mwaingila pa ñondo.
10 April ukekala ñondo wawama kuboba bonse bafikapo kabiji baswishiwa na bakulumpe kutendeka kwingila nobe basapwishi babula kubatizhiwa. Umvwe mubena kufunjisha muntu umo Baibolo, nanchi awo muntu wanunguluka kala kufika pa kipimo kya kusolomoka wakutangijila ne kwipuzha inge kana wakonsha kwikala musapwishi wa mambo awama nyi? Umvwe muji na bana babula kubatizhiwa, nanchi mwakisambapo kala na bakulumpe pa kununguluka kwabo kwa ku mupashi nyi? Nanchi kuba kino kechi kya ikala kimye kyawama ku bana benu kutatula kusapwila nenyi? —Monai Abateyanishiwa, mapeja 97-100.
11 Mu kwesekaeseka kwetu kwa kulenga April 2000 kwikala ñondo wawamisha, atweba bonse twafwainwa kwikalamo na lubaji mu butumwa ne kutuma lipoti wetu wa mwingilo pa kupwa kwa ñondo. (Esekanyaiko Mako 6:30.) Basapwishi bapya babula kubatizhiwa bakekalamo na lubaji mu mwingilo wa mu bujimi kimye kitanshi bafwainwa kutundaikwa kutuma lipoti wabo bukiji bukiji. Kupichila mu kwingilako lubaji lwetu, twakonsha kutundaika lipoti wa April ne kutotaika Yehoba kupichila mu ngovu yetu ya busapwishi.
12 Iyai na Bantu Bakwabo ku Kivuluko: Nanchi kechi kiketusangajika pa kumona mpendwa ipya ya bantu bavula kutanwa ku Kivuluko kya lufu lwa kwa Kilishitu mu uno mwaka wa 2000 nenyi? Ee! Kikalumbulula kuba’mba ne boba bantu babula kutanwako javula bakeya na kumwesha lusanchilo lwabo pa byubilo bya butemwe bukatampe bwamweseshe Yehoba ne Yesu Kilishitu kwi atweba! (Yoa. 3:16; 15:13) Kokozhai monse mo mwakonsha kubila kuba’mba kukabule nangwa kimo kikakonsha kwimukanya anweba ne kisemi kyenu kubula kutanwa ku Kivuluko.
13 Kabiji kino kyo kimye kya kutatula kwita bantu bakwabo kwiya ku Kivuluko. Tanchikai mutanchi wa bantu bonse bo mukeba kuba’mba bakatanweko. Vwangaipo ne bantu bomwafundanga kala nabo Baibolo, bo mukifunda nabo pa kino kimye, ne bonse bomutana mu lupempu lwa kubwelako. Pa mutanchi wenu bikaipo mazhina a bakwenu ba pa nkito, pa sukuulu, ne bakwenu mo mwikela kubikapo ne bobo bonse bo muba nabo busulu. Kange mulubeko kwita bakwenu bakwabo ne balongo benu ne. Pa nyuma ya kunemba mutanchi wa mazhina, tendekaiko anweba bene na mukoyo kwibeta umo umo. Mwibabule juba ne mpunzha kukekela kino Kivuluko. Inge kwashala moba acheche kufika pa April 19, mwafwainwa kwibavululako bonse baji pa mutanchi wenu kwingijisha lamya nangwa kwibendelatu. Babulai kuba’mba mukeya na kwibapitula ne kuya nabo ku Kivuluko mabanga a joja juba.
14 Kwesakana na monka mwayila mikambizho ya kala ya Sosaiti, jibumba ja bakulumpe bakeseka na ngovu kutundaika basapwishi bonse bakoka baji mu nyaunda yabo kwiya na kutanwako ku Kivuluko. (Mat. 18:12-14) Bakulumpe ba mu kipwilo bakapitulukamo mu nkalata ya Sosaiti ya February 2, 1999. Kanemba wa kipwilo ukanemba mutanchi wa basapwishi bonse bakoka, kabiji ne utangijila mwingilo wa mu bujimi ukatuma bakulumpe kupempula bano bantu ne kwibechila ku Kivuluko. Kampe inge bapempulwa na lupempu lwa bukafunga bukiji bukiji mu kimye kyafwainwa, bano bantu bakoka bakonsha kukwashiwa kwikala na kizaku jibiji kya mu butumwa bwa mu bujimi, nangwatu mu mukachi ka April. Kikebatundaika bingi pa kwibeta kuba’mba bengijile pamo na musapwishi wapijilwa mu mwingilo wa mu bujimi.
15 Tundaikai kwingilako mu April! Kikakebewa kukwatankana ku lubaji lwa bakulumpe, bankwasho, ne mitwe ya bisemi kulenga April 2000 kwikala ñondo wawamisha. Bakulumpe bakateshako bingi muchima mu kutangijila ne mu kumona kuba’mba byonse byakokozhewa bulongo. (Hebe. 13:7) Lunengezho lwa kupwila pamo ne kuya mu mwingilo wa mu bujimi mu moba a mukachi ka milungu ne kumpelo ya milungu kubikapotu ne maholide lwafwainwa kunengezhiwa. Kupwila kukwabo kwa kuya mu busapwishi bwa mu bimye bya mabanga ne mabanga bufuku kwafwainwa kunengezhiwa. Mutanchi wakumaina wa byonse bya nengezhiwa mu April wafwainwa kubikwa pa notisi bodi. Mutanchi wa mwingilo ukatangijilwa na muntu watongolwa kutangijila pa jojo juba. Mpunzha ya kwingijilamo kila-jibumba yafwainwa kumwenwa jimo.
16 Mu kimye kya April magazini ya Ulupungu lwa kwa Kalinda ne Loleni! ikatambikwanga. Pakuba’mba tutendeke masambijilo a Baibolo, bulosha wa Nanchi Ukebaka wafwainwa kutambikwa ku bonse bamwesha lusekelo. Onkao mambo, magazini ne mabulosha avula afwainwa kunengezhiwilwa jimo.
17 Pakupwa kwa ñondo, bonse batangijila masambijilo a buku ne bankwasho babo bakakonsha kutundaika yense wa mu jibumba jabo kutuma lipoti bukiji bukiji pa kupwa kwa ñondo. Kampe kino kyafwainwa kubiwa nangwa biji pa Mulungu, April 30. Inge kanemba wabungizha pamo malipoti onse ne kutana’mba basapwishi bamo kechi banemba lipoti ne, ukebavuluko juba ja pa May 6 saka jikyangye kufikane, mambo jo juba jo atuma lipoti wa kipwilo ku Sosaiti. Ukakeba kwita bonse batangijila masambijilo a buku kuba’mba bamukwashe kumonañana na basapwishi pa muntu pa muntu.
18 Kimye kya Kivuluko ke kimye kimo kyanema bingi pa mwaka ku bantu ba Lesa. Kyafwainwa kwikala kimye kya mingilo kwi atweba mu mwingilo wa Yehoba. Kikekala kimye kya mingilo inge bonse twaikalamo na lubaji kwesakana na papelela ngovu yetu byo tuji basapwishi ba mambo awama, kabiji inge bonse bakanembesha bupainiya bwa kukwasha bauba byonkabyo, kabiji inge twatako muchima kusenda bantu bakwabo ku Kivuluko kya kuvuluka lufu lwa kwa Kilishitu. Twayai tulombe na mukoyo kuba’mba Yehoba etupeeshe byo tubena kwesekesha kulenga April 2000 kwikala ñondo wakilapo kuwama, ku lutakaiko ne lukumo lwa Lesa!—Hebe. 13:15
[Kitenguluzha pa peja 3]
Bapainiya Bakukwasha
Mpendwa Yetu Ikatampe: 7,695
(May 1997)
[Kitenguluzha pa peja 4]
Basapwishi Bonse Pamo
Mpendwa Yetu Ikatampe: 107,233
(August 1999)
[Kitenguluzha pa peja 5]
Batainwe ku Kivuluko Bajinga
Mpendwa Yetu Ikatampe: 428,697
(1997)