Tunemeke Yehoba mu Bwikalo Bwetu—Lubaji 1
1 Ku nyuma kwe tubafundwenga pa mambo a bwikalo bwa mu kisemi. Bishinka bimo byamonwa kuba’mba byafwainwa kubwezhiwapo pa kuba’mba bonse tumwenemo, kuvwangakotu ne bapya bavula bafunda bukine pa myaka icheche yapita.—2 Pe. 1:12.
2 Nanchi Masongola Twiamona Byepi? Masongola ke lunengezho lwanema lwitukokozhezha Yehoba, kabiji kyo kyafwainwa bana banji ba pano pa ntanda. Nangwa kikale byonkabyo, Baibolo kechi imwesha kuba’mba masongola ne kusema bana byo byanemesha ne. (Sapwi. 12:13; Mako 12:30) Yesu kechi wasongwele ne. Onkao mambo, waingijishenga kimye ne ngovu yanji mu butumwa. Yoano Mubatishi naye wajingatu katanda. Byo twayuka kino, nanchi kyawama kusula balongo ne banyenga yetu ba bwina Kilishitu bengijila Yehoba babula kwikala mu masongola nyi?
3 Mulanguluko wa kuba’mba kanatu muntu waikala mu masongola ne kusema bana, kechi mulanguluko wa mu byanembwa ne, ke mulanguluko wa bisho bya kisemwa. Mu bisho byavula masongola ne kusema bana byaketekelwa kuba’mba jo jonka jishinda jafwainwa mu bwikalo bwa muntu. Onkao mambo, aba babula kwikala mu masongola nangwa babula kusema bana bamonwa kuba’mba kechi batuntulu ne. Kwakubula nangwa kuzhinaukatu ne, kulanguluka bulongo pa byo twaitabila ko kwakonsha kukwasha balongo ne banyenga kuleka kukanjikizha ne kwendeleka bana babo nangwa bakyanyike baji mu kipwilo pa mambo a kubula kwikala mu masongola.
4 Pa Mateo 19:11, 12 Yesu watundaikile kwikala pa kubula masongola umvwe muntu wakonsha. Wamwesheshe kuba’mba nkebelo ya kino ke ya kukwasha mwina Kilishitu wa yewo mutundu kutesha muchima ku mwingilo wa kwa Lesa. Yesu wakambizhizhe kutesha muchima ku bya Bufumu. Kutangizhako mwingilo wa kwa Lesa ne Bufumu Bwanji mu kifulo kya kutangizhako masongola, kyakatezhe bingi mu moba a kwa Yesu ku bantu bavula byonkatu byo kiji ne lelo jino. Pa kuba’mba milanguluko ya kisemwa ishinjiwe, kyafwainwe kwingila na ngovu ne kutemwisha Yehoba. Kunungulula muchima wa Kilishitu mu bino, kwakonsha kukwasha mwina Kilishitu wifukwila kumwenamo mu kwikala kwanji kwa kubula masongola.
5 Lesa kechi wakanya masongola ne; ku babula kumona lusekelo mu kwikala bunke kwakubula mukwabo wa mu masongola nangwa ku bakonsha kubula kwilama ku bulalelale, bakonsha kutwela mu masongola. (1 Ko. 7:8, 9, 28, 32-34, 38) Nangwa kikale byonkabyo, Baibolo kechi itundaika masongola a mu bwanyike ne, bino itabizha muntu kutwela mu masongola pa nyuma ya kupita pa jifumbi ja bwanyike, saka akoma bulongo kya kuba’mba kilaka kya kukeba kwilaala kechi kyo kimutundaika kutwela mu masongola ne. Kabiji yambishatu patokatu too kuba’mba masongola onse aji ne na makatazho ao kabiji alengela mwina Kilishitu kubula kufika palepa mu mwingilo wa kwa Yehoba. Onkao mambo, bakeba kutwela mu masongola bakonsha kuketekela makatazho. Mutumwa Paulo waambile kuba’mba mu masongola muji byakatazha.—1 Ko. 7:28.
6 Bamo bakonsha kwifukwila kubula kwikala mu masongola pa kimye kyabaya, bakwabo nabo bakonsha kwikalatu byonkabyo kikupu. Pakachi ka bano bantu, paji balongo ne banyenga babena kwingila na ngovu mu bupainiya nangwa pa Betele. Kiji byepi ku bana betu? Nanchi kuba kituletela lusekelo umvwe bana betu basalapo kwikala kimye kyabaya kwa kubula kwikala mu masongola pa kuba’mba bengile na muchima yense mu mwingilo wa kwa Yehoba byonka byajinga Samwela, mwana Yefita wa mukazhi, Timoti ne balongo bashalapo bakishinka bashingwa ne nyi? Byonkabyo tukasekela kukilapo, umvwe ndangulukilo yetu yaitabanzhana na ya kwa Lesa.