Tunemeke Yehoba mu Bwikalo Bwetu—Lubaji 3

¹ Pa kuba’mba tutwajijile kwikala babula bubipisho twafwainwa kuchinuzhuka byubilo bibena kutundaikwa na buno bwikalo bwa kwa Satana. Byo twipana atweba bene kwi Yehoba kwikala bakalume ba kumutota, bilengwa bisunga buzhile ne bololoke bwanji, abya kitufwainwa kimye kimo kwikala na bubipisho nangwa biko bimwesha bantu babula kulonda buzhile bwa Lesa nyi? Twayai twisambe pa masongola.

² Masongola, Mali a Muketo ne Bisho bya Lusemo: Kijitu bulongo ku bansemi kunengezhezha baana babo bulongo mobakelaminanga kulutwe na lwendo. Mu mapunzha amo, bansemi bo bakebela mwaanabo wa mulume mwanamukazhi walumbuluka ye akonsha kusongola. Mu bisho bikwabo, mwaana wa mulume ye ubula bansemi yanji wamukazhi ye akeba kusongola. Ku bena Kilishitu, kino kechi kyafwainwa kuleta lukatazho ne, umvwe bansemi bonse ne mwaanabo wa mulume baji mu bukine. Bansemi ba bwina Kilishitu bakeba mwaanabo kusongolatu “monka mwi Nkambo.” Onkao mambo, posotu mwanamukazhi uji mu kipwilo kya bwina Kilishitu ye bafwainwa kukebela mwaanabo kusongola. (1 Ko. 7:39) Umvwe mwaana uji mu bukine, bino bansemi yanji kechi baji mu bukine ne, kino kyakonsha kuletela mwaanabo lukatazho mambo bakonsha kukeba mwanamukazhi wabula mu bukine kuba’mba mwaanabo asongole, bino aye mwine saka akeba kusongola mwanamukazhi wipana kabiji wabatizwa. Pa kino, mwaana wafwainwa kulumbulwila bansemi yanji bulongo pa mambo a bulunda bwa katataka boaji nabo ne Yehoba Lesa, kuba’mba usakatu kusongola mwanamukazhi wa mu lwitabilo, wipana kabiji wabatizwa. Kino kituleta ne ku mambo a mali a muketo.

³ Bya bupe bya kupana ku bansemi ya musongwa byanembwa mu Baibolo. Nangwa kiji byonkabyo, bamwisho ya wamukazhi ne balongo banji kechi bafwainwa kukeba mali a muketo akilamo kuvula nangwa bipe byavula byonka byo kyubiwa mu mishobo imo ne. Nsemi wamulume mwina Kilishitu wapewa lūsa kwi Lesa lwa kukomesha baana banji, kabiji ye wafwainwa kwikala na ngovu ya kunengezha masongola a mwaananji wamukazhi. (Efi. 5:1) Kechi wafwainwa kuswisha balongo banji kumwangata bumutwe bwanji pa ba mu nzubo yanji ne kumunyanchijila kya kuba kebamunengezhezhe masongola a baana banji ne. Umvwe mulongo wanji umo wakoselepo kukwasha uno nsongwakazhi kuba’mba afunde, kabiji bashanji uno mwaana babena kukeba kusanchila uno mulongo wabo kupichila mu kumupapo mali a muketo na mambo a bukwasho boaubile, akyo kiji kobaji. Pano bino kino kechi kyo kyafwainwa kulenga’mba batunge mali a muketo avula ne. Nsemi wa mulume yense mwina Kilishitu wafwainwa kumona’mba mwaananji wa mukazhi wakosa ku mupashi kupichila mu kusongolwa mu bukine. (Fili. 1:10) Bansemi ba maana bakebako nsongwalume watemwa Yehoba, wabambakana kabiji wikala mwayila bukine kimye kyonse mu bwikalo bwanji kuba’mba asongole mwaanabo. Mulongo wakosa kabiji wafikapo wakonsha kwikala mulume wawama nangwa kyakuba kechi uji na mali avula o akonsha kupana muketo ne. —Monai mutwe wa kuba’mba, “Ukulipilisha Impango Ishalinga” mu Kyamba kya Usopa kya Kibemba kya September 15, 1998.

⁴ Masongola kechi ekalakotu ponkapotu ne, poso bano bantu babiji babena kutwela mu masongola banembesha kabiji bonse babiji basaina lulayañano pa meso a bakamonyi ne pa meso a muntu ubena kuchipisha luchipo lwa masongola. Onkao mambo, wamulume kechi uji na lūsa lwa kutendeka kulaala na mwanamukazhi yeaipanguzha ne, poso masongola abo anembeshiwa bulongo kwesakana na mwayila muzhilo. Umvwe wamulume ke alaale na mwanamukazhi ye aipanguzha ko kuba’mba wauba bulalelale, kabiji wakonsha kupangiwa mu kipwilo kya bwina Kilishitu. (1 Ko. 6:9, 10) Bansemi, uno mwanamulume ne mwanamukazhi ye aipanguzha, kechi bakeba kintu kya uno mutundu kubiwa ne.

⁵ Bansemi ba bwina Kilishitu, baana babalume ne babakazhi baitabila bakonsha kwikala na kijikila kya kulanguluka pa masongola abo byo akekala. Binembelo bitukambizha’mba: “Nangwa muja, nangwa mutoma, nangwa muba kya byepi nangwa kya byepi, byonse kasa mwibyubila lukumo lwa Lesa.” (1 Ko. 10:31) Nanchi ano masongola akaleta lukumo kwi Yehoba ne kulenga ‘lufunjisho lwa Kilishitu kumweka bulongo’ nyi, inyi akaleta bumvu pe Yehoba ne pa kipwilo kya bwina Kilishitu ne kutuntwisha bakwenu? Ibyepi umvwe pa ano masongola pa ikala kiwowo, kutoma kasa pembwa nyimbo ne mazha atama akonsha kuleta byubilo bya bunya? —Monai mutwe wa kuba’mba, “Amenga ya Nsansa Ayacindika Yehova” mu Kyamba kya Usopa kya Kibemba kya May 1, 2000.

⁶ Bena Kilishitu inge batwela mu masongola bafwainwa kutwajijila kwenda mu bukine bukasulula bantu ku mizhilo ya kishakulu ibula kutokesha Lesa pa muchima. Bena Kilishitu bakine bamwesha butemwe ne buwame ku bantu bakwabo kikatakata balongo babo. (Efi. 4:32; Kolo. 3:12; 1 Ko. 13:4) Nanchi kuba ketupusane na byubilo bya bwina Kilishitu umvwe ke tulonde bizhila bya kishakulu bya kuzhijika mulokazhi kubula kumona bako banji babalume? Twakosha kwitemwa byepi atweba bene na bene umvwe ke tulonde mizhilo ya kishakulu ya kubula kumonañana na balongo betu bamo, kwamba nabo, kwendela nabo pamo, ne kwikala nabo mwanzo umo nangwa kupita mu jishinda jo bapitamo?

⁷ Masongola aketabizhiwa kwi Lesa umvwe bamulume ne mukazhi kechi bakilaajilepo saka bakyangye kwisongola ne. (Hebe. 13:4) Byo kyafwainwa kuwamapo ku bamulume ne mukazhi umvwe beketekela ne kukomesha baana babo saka bakokela mikambizho ya Yehoba, kabiji bonse pamo sa batwajijila kupopwela Lesa mu bukishinka kwakubula kwitamisha na bya pano pa ntanda. Mwakonsha kwikala na masongola atokwa umvwe mwasankilapo mizhilo ya kishakulu ya bula ya bwina Kilishitu inonka bantu buzha.