Kange Mukankazhamenga Ne!
1 Inge twinengezha kuya na kusapwila ku nzubo ne nzubo, kikatazha bingi pa kubatu’mba twimane ne kuya, kampe na mambo a kwimona’mba kechi twakonsha kwamba bukine ku “bantu bonse” ne. (1 Timo. 2:4) Pano bino, kechi twafwainwa kukankazhama kusapwila mambo awama ne. Mambo ka?
2 Byambo bya Yehoba: Yehoba ubula bantu byambo byanji kupichila mu Baibolo. Byo twibabula bantu bino byambo, twibasapwila byambo byanji kechi byetu ne. (Loma 10:13-15) Umvwe bantu bamo bakana mambo a Bufumu, ko kuba’mba bakana Yehoba. Nangwa byonkabyo, kechi kitufita kuwankuji ne. Twaketekela kuba namba bantu bakeba lupimpu mu bwikalo bwa pano pa ntanda kabiji baji na michima yapelelwa ku mupashi bakeomvwa ano mambo.—Ezi. 9:4; Mat. 5:3, 6.
3 Yehoba Ukoka Bantu: Muntu wakananga kala kumusapwila, luno wakonsha kuswa mambo a kuba kampe paji bimo byamweka byamulengela kuba’mba akoke muchima. Yehoba pano wakonsha kumubila bibusa ne ‘kumukoka.’ (Yoa. 6:44, 65) Inge kyaikala byo byo, twayai twipane kwi Yehoba kuba’mba etwingijishe ne kukokela buntangi bwa bamalaika bwa kwitutangijila kutana bantu ba yewo mutundu.—Lum. 14:6.
4 Lesa Witupa Mupashi Wanji: Mupashi wazhila witupa bulume bwa kwambila “mwi Nkambo na kuchinchika.” (Byu. 14:1-3) Kuvuluka’mba tuji na witukosesha uji na ngovu mu mwingilo wetu, kechi tukakankazhama kwamba bya bukine ku bakwetu botwikala nabo kipi kipi, botwingila nabo pa nkito, botufunda nabo ku sukulu, balongo nangwa bantu bafunda bingi ne banonshi ne.
5 Yesu Witufunjishe bya Kwingila: Yesu washikishenga mepuzho a kulengela muntu kulangulukapo, kwingijisha bimwesho bifika muntu pa muchima, ne kubalaula-balaula mu binembelo. Walumbulwilenga bukine mu jishinda japela jileta ne lusekelo ku nteleki. Mashinda aye uno mutundu o awama kwingijisha ne lelo jino. (1 Ko. 4:17) Mashinda o tusapwilamo akonsha kupusana-pusana, bino mambo a Bufumu o kechi apusana ne.
6 Tuji na jishuko ja kwitwingijisha kwi Yehoba kukwasha bantu mu jishinda jiikajila kabiji janema. Kange tukankazhame ne! Twayai twibikeko na ngovu ne kuswisha Yehoba ‘kwitushinkwila kibelo kya mambo’ pa kuba’mba tusapwilenga mambo awama ku bantu.—Kolo. 4:2-4.