Bantu ba Lesa Bafwainwa Kuyuka Kutanga Nekunemba
1 Kala keene bantu ba Lesa bavula bayukile kutanga nekunemba. Mosesa, Yoshua, Bamfumu babena Isalela, Yesu nebatumwa banji bayukile kutanga nekunemba. Lelo jino, bavula bayuka kuba’mba kutanga nekunemba kokushinkula jishinda jakwingila bulongo pakupopwela Lesa.—2 Moba. 34:14; Yosh. 1:8; Mpitu. 17:18, 19.
2 Kipwilo kyonse kyatundaikwa kwikala nakalasi yakufunjisha bantu kutanga nekunemba kwingijisha tubuku twakufundamo twanengezhiwa na kalume wakishinka ne wa maana. Kyafwainwa kuwama inge samusunga mazhina abobo batanwako kimye kyonse nejuba jobanembeshe. Ofweshi yamusampi nangwa mukulumpe wankambi wakonsha kwipuzha pamambo amakalasi aubiwapo kala pakipwilo kyenu.
3 Yehoba Lesa wapa bantu bulume bwakutanga nekunemba. Bino inge nekwibikako atweba bene ne, kechi twakonsha kuyuka kutanga nekunemba ne. Ñanyi mfweto ikatampe iji mukufunda kutanga nekunemba? Kumvwa Byambo bya Lesa nekukokela lufunjisho lwanji lwakuba’mba: “ukebilangulukenga mute ne bufuku.”—Yosh. 1:8.
(1) Tundaikai yemubena kufunjisha. Konkomwenai pamfweto iji mukufunda kutanga nekunemba. Kwashai yemubena kufunjisha kwibikila bikonkwanyi byakuyuka kutanga nekunemba.
(2) Tanchikai bimye byavula byakufunda mulungu nemulungu. Bapai mwingilo wakuya nakuba kunzubo palufunjisho lonse lobafunda.
(3) Lufunjisho lwakutanga lwafwainwa kwikala lwapela kabiji lwaipipa—Kange mulengele babena kufunda kumona’mba kyashupa kutangane.
(4) Bakoseshai nekwibatundaika pamambo akuya palutwe kobabena kumwesha.
(5) Kwashai muntu ubena kufunda kwingijisha byoabena kufunda juba nejuba.
(6) Funjishainga bintu byanema byakonsha kwibakwasha, mambo bakikulumpe baji bingi namingilo yakuba yavula!
(7) Shingikai yemubena kufunjisha—Kange mumulengeshenga bumvu nangwa kumusula ne.
(8) Mwafwainwa kuyuka lukatazho luji namuntu—Lukatazho lwameso nangwa kumvwa byakonsha kulengela wakikulumpe ubena kufunda kukankalwa kuya bukiji palutwe mukimye kitanshi.
(9) Ubena kufunda wafwainwa kufunda kutanga bisopelo bitanshi bya afabeti byanembwa kimo kimo saka akyangye kutendeka bisopelo byanembwa mubukyambo.
(10) Kuyuka kutanga kwapela bingi kukila kunemba. Kange mubanzhe mafunjisho apya akutanga umvwe ubena kufunda uji nalukatazho lwakunemba ne.
(11) Kufunda byakunemba nabopenyi nangwa pezulu kwakonsha kushupako. Kange mukoseletu pakuba’mba kanatu banembe byalumbulukane!