Abya Njilo Yenu ya Kumupashi Yawama Nyi?

¹ Kuji ñambilo yakuba’mba ‘kajo kotuja kokalengela mubiji wetu kwikala bulongo nangwa ne.’ Kyakine, butuntulu bwa mubiji nebulume bwetu bwimana panjilo yetu. Byonka byaambile Yesu: “Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.” Byonkabyo, nenjilo yetu ya kumupashi yakonsha kwitulengela kwikala bulongo nangwa ne. (Mat. 4:4) Abya njilo yenu ya kumupashi yawama nyi? Mujatu byomukeba nyi? Nanchi mujatu lubilo? Nangwa mwikalako nakimye kyabaya kyakwiyowa kajo kawama ka kumupashi nyi?

² Langulukaipo Bulongo Pakajo Kenu: Yehoba unengezha “kajo pa kimye pafwainwa” ne ‘kijiilo kya byanuna,’ kupichila mwi ‘kalume wa kishinka ne wa maana.’ (Mat. 24:45; Isa. 25:6) Pakuba’mba tumone mfweto mubino byabupe, twafwainwa kwibikako kuja bulongo kumupashi.

³ Mwafwainwa kwishikisha anwe bene’mba: ‘Nanchi ntanga kinembelo kyajuba nekwambapo juba nejuba nyi? Nanchi moba onse ntanga Baibolo nekulanguluka-langulukapo nyi? Abya nnengezhezha jimo byakufunda pakupwila kupichila mukwibitangila jimo nyi? Nanchi natanga mabuku etu akatataka, kuvwangapo ne mabuku abiji a Ukusesema kwa kwa Esaya—Ulubuuto lwa Bantu Bonse?’

⁴ Yesu walaile’mba: [“Bata muchima ku mupashi bo batokwa mambo bufumu bwa mwiulu bo bwabo,” NW] ... Baumvwa nzala ne kilaka kya kusakisha bololoke bo batokwa: mambo bakekuta.” (Mat. 5:3, 6) Onkao mambo, jainga bulongo kumupashi kupichila mukuyuzha milanguluko nemuchima wenu namaana a Lesa.