Nanchi mu Bena Kutambula “Kajo pa Kimye Kyafwainwa” Nyi?

TUBENA kwikala mu moba akatazha bingi. (2 Timo. 3:1-5) Butemwe bwetu ne bukishinka bwetu pe Yehoba, bwesekwa pa juba pa juba. Yesu wayukijile jimo bikamweka kulutwe, kabiji waambijile bamulondejilenga amba bakatambulanga lutundaiko lwafwainwa lukebakwasha kuchinchika kufika ne ku mpelo. (Mat. 24:3, 13; 28:20) Pa kuba’mba ebakoseshenga, watongwele kalume wa kishinka kabiji wa maana kwibanengezhezhanga “kajo pa kimye kyafwainwa.”—Mat. 24:45, 46.

Kufumatu kimye kalume wa kishinka kyo atongwelwe mu 1919, mamilyonyi a “ba ku nzubo” kufuma mu milaka yonse babena kwibakonkanya mu jibumba ja Yehoba kabiji babena kutambula kajo ka ku mupashi. (Mat. 24:14; Lum. 22:17) Nangwa byonkabyo, kano kajo ka ku mupashi mu milaka imo kafwamo, kabiji kechi bantu bonse baji na biñambañamba byakonsha kwibalengela kwikala na mabuku etu ne. Mu milaka imo, kechi baji na mavidyo ne bibaba bimo bitanwa pa jw.org ne. Nanchi kino kilumbulula’mba, bamo babena kushalapo pa kajo ka ku mupashi kakonsha kwibalengela kutwajijila kukosesha bulunda bwabo ne Lesa nyi? Pa kuba’mba tukumbule buno bwipuzho, langulukai pa mikumbu ya mepuzho ana alondelapo.

1. Ñanyi kintu kyavwangwa mu kajo Yehoba ko etunengezhezha?

Satana byo aesekele Yesu kwalula mabwe ke bashinkwa, Yesu wamukumbwile’mba: “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.” (Mat. 4:3, 4) Byambo bya Yehoba byanembwa mu Baibolo. (2 Pe. 1:20, 21) Onkao mambo, Baibolo ke kintu kine kikatampe kyavwangwamo mu kajo ka ku mupashi.—2 Timo. 3:16, 17.

Jibumba ja Yehoba jatuntulula Baibolo wa Binembelo bya Ntanda Ipya yense nangwa lubaji lumo mu milaka 120, kabiji milaka ikwabo nayo ibena kunungwako pa mwaka pa mwaka. Kununga pa kuno kutuntululwa, kuji mabilyonyi a ma Baibolo avula anembwa yense nangwa lubaji lumo mu milaka yavula. Kuno kusampanya Baibolo kwayilamo bingi, mambo Yehoba ukeba’mba, “bantu bonse bapuluke ne kuyukisha bulongo bukine.” (1 Timo. 2:3, 4) Kabiji na mambo a kuba’mba, “kafwako kilengwa nangwa kimo kyafyama kwi [Yehoba] ne,” twafwainwa kushiinwa’mba ubena kuleta “baji na muchima wa kukeba kuyuka Lesa” mu jibumba janji ne kwibanengezhezha kajo ka ku mupashi.—Hebe. 4:13; Mat. 5:3, 6; Yoa. 6:44; 10:14.

2. Ñanyi mwingilo wingila mabuku etu?

Muntu pa kuba’mba ekale na lwitabilo lwakosa, wafwainwa kutanganga Baibolo ne kumvwisha byo abena kutanga ne kwibingijisha mu bwikalo bwanji. (Yako. 1:22-25) Ntungu mwina Etiopya wajingako mu myaka kitota kitanshi wanemekele bingi kuba bino. Uno ntungu watangilenga Mambo a Lesa, bino Filipa wajinga musapwishi wamwipwizhe’mba: “Nanchi mwayuka bintu byo mubena kutanga nyi?” Ntungu wakumbwile’mba: “Nakonsha kuyuka byepi kwa kubula muntu wa kundumbulwila?” (Byu. 8:26-31) Filipa wamukwashishe uno ntungu kumvwisha bukine buji mu Mambo a Lesa. Kino kyalengejile ntungu kwipana ne kubatizhiwa. (Byu. 8:32-38) Kyo kimotu, mabuku etu alumbulula Baibolo etukwasha kumvwisha bukine bo tufunda ne kwibwingijisha mu bwikalo bwetu.—Kolo. 1:9, 10.

Kupichila mu mabuku, bakalume ba Yehoba bebapa kajo kavula bingi ka kuja ne bya kutoma byavula. (Isa. 65:13) Kyamba kya usopa kiji mu milaka kukila pa 210, kilumbulula bungauzhi ne kwitukwasha kumvwisha bukine, ne kwitutundaika kwingijisha mafunde a mu Baibolo. Magazini wa Labainga! wanembwa mu milaka 100, witukwasha kuyuka maana a Yehoba kupichila mu bintu byo alenga kabiji witukwasha ne byo twafwainwa kwingijishanga lujimuno lwalumbuluka. (Mana. 3:21-23; Loma 1:20) Kalume wa kishinka witunengezhezha mabuku alumbulula Baibolo mu milaka kukila pa 680! Nanchi munengezhapo kimye moba onse kya kutangapo Baibolo nyi? Nanchi mutanga magazini ne mabuku alupulwa aji mu milaka yenu nyi?

Kununga pa kunengezha mabuku, jibumba ja Yehoba jinengezha majashi aimena pa Baibolo, o bamba pa kupwila kwa kipwilo, kubuñana ne pa kushonkena. Nanchi mwiyowa ano majashi, bifwanyikizho, byamwekele ne mwisambo wa mepuzho wikalako pa bino bimye nyi? Yehoba witunengezhezha kijiilo kya ku mupashi!—Isa. 25:6.

3. Umvwe kya kuba mufwao mabuku amo mu mulaka wenu, nanchi ko kuba’mba kechi mu bena kuja kajo ka ku mupashi konse nenyi?

Ine. Mambo byo byo kyajinga ne ku bakalume ba Yehoba bajingako kala, bamo kechi batambulanga kajo ka ku mupashi konse byonka byo kyajinga ku bakwabo ne. Mambo ka? Akilangulukai pa batumwa. Bamo batambwijile mikambizho yavula kukila baana ba bwanga bakwabo bajingako mu myaka kitota kitanshi. (Mako 4:10; 9:35-37) Nangwa byonkabyo, baana ba bwanga bakwabo kechi bafwilenga nzala ya ku mupashi ne, bino batambwilanga byakebewanga pa kimye kyafwainwa.—Efi. 4:20-24; 1 Pe. 1:8.

Kabiji kyanema bingi kuyuka amba kechi byonse byaambile Yesu ne byo aubile pano pa ntanda byanembwa mu mashimikila a Mambo a Awama ne. Mutumwa Yoano wanembele’mba: “Kuji bintu byavula bingi Yesu byo aubile, umvwe bino bintu byonse byanembelwe, kine pano pa ntanda inge pabula ne pa kwiabika aa mabuku.” (Yoa. 21:25) Nangwa kya kuba baana ba bwanga batanshi ba kwa Yesu bayukile byavula pa muntu walumbuluka kukila byo twayuka, kino kechi kilumbulula amba kafwako byo twayuka pe aye ne. Yehoba witunengezhezha byavula bya kwitukwasha kuyuka bulongo Yesu byo tuji baana banji ba bwanga balondela mu ngayo yanji.—1 Pe. 2:21.

Akilangulukai, pa nkalata yatumine batumwa ku bipwilo byajingako mu myaka kitota kitanshi. Pa makalata anembele Paulo, nkalata imo kechi yanembwa mu Baibolo ne. (Kolo. 4:16) Nanchi kajo ka ku mupashi kakepa na mambo a kuba’mba ino nkalata kechi yanembwa mu Baibolo nenyi? Ine. Yehoba wayuka bitufwainwa kabiji witupa byavula bya kwitukwasha kukosesha bulunda bwetu ne aye.—Mat. 6:8.

Lelo jino, bakalume ba Yehoba bamo baji na mabuku avula mu mulaka wabo kukila bakwabo. Nanchi mabuku akepa o banemba mu mulaka ye mwamba nyi? Inge byobyo kiji, yukai kuba’mba Yehoba wimuta bingi muchima. Fundainga mu mabuku ajipo mu mulaka wenu, kabiji tanwainga ku kupwila mu mulaka ye mumvwa bulongo. Kabiji ketekelai kuba’mba Yehoba ukakosesha bulunda bwenu ne aye.—Sala. 1:2; Hebe. 10:24, 25.

4. Inge mufwayo intaneti ya kwingijisha kutangilamo mabuku aji pa keyala wa jw.org, nanchi kino kilumbulula’mba bulunda bwenu na Lesa busakukoka nyi?

Pa Keyala wetu, patanwa magazini ne mabukutu akwabo alumbulula Baibolo. Kabiji pa yenka uno Keyala patanwa ne mabuku mwanembwa mashinda akonsha kukwasha baji mu masongola, banyike ne baana. Bisemi bimwenamo bingi kwisambila pamo ino mitwe pa Kupopwela kwa Kisemi. Kunungapo, pa Keyala wetu patanwa ne masawakya, nabiji a bapwisha sukulu wa Gileada ne kupwila kwa pa mwaka, ne bibena kumwekela balongo ne banyenga yetu mwaya ntanda nabiji bya malwa biponakotu bine ne kumanyikwa kwa bantu ba Yehoba. (1 Pe. 5:8, 9) Keyala wetu ke kingijisho kimo kyawama bingi kya kwingijisha pa kusapwila, kabiji uno keyala walengela mambo awama kufika ne mu byalo mo bakanya mwingilo wetu wa kusapwila.

Nangwa byonkabyo, mwakonsha kukosesha bulunda bwenu ne Lesa, nangwa kya kuba kechi muji na mabuku atanwa pa Keyala wetu ne. Kalume ubena kwingila bingi na ngovu kunengezhezha kajo ka ku mupashi ba mu nzubo. Onkao mambo, kechi mukambizho ku bena Kilishitu bonse kuba’mba bonse bekale na kiñambañamba kiji na intaneti pa kuba’mba bayenga pa keyala wetu wa jw.org ne. Bamo banengezha kukopolola mabuku atanwa pa Keyala wetu ne kupana ku bantu babula biñambañamba biji na Intaneti, bino bipwilo kechi bafwainwa wa kuba bino.

Tumusanchila bingi Yesu pa kutwajijila kufikizha mulaye wanji wa kwitunengezhezha kajo ka ku mupashi. Ano moba akatazha byo abena kufwenya ku mpelo, twafwainwa kuketekela mwi Yehoba kuba’mba ukatwajijila kwitunengezhezha kajo ka ku mupashi “pa kimye kyafwainwa.”