Jishinda ja Kukwashishamo Bena Kengi

Bena Kilishitu bakine bengila mwingilo wa kusampanya mambo awama ku bena kengi. (Fili. 2:17) Pa kuba’mba bengile uno mwingilo, kuji mabuloshuwa, matalakiti, ne mitwe iji mu milaka 20 biji pa Intaneti pa www. watchtower. org. Uno keyala wa pa intaneti kechi wakusampainyamo mabuku akatataka ku Bakamonyi ba kwa Yehoba ne. Nkebelo ine ke yakubujilamo bena kengi byambo bya kine pa mambo a bifunjisha Bakamonyi ba kwa Yehoba.

Katatakatu papo, twabikileko buku umo pa Keyala wetu wa pa Intaneti. Uno ke buloshuwa wa Nanchi Lesa Ukebaka Kwiatweba? mu milaka kukila pa 220. Kabiji kutendeka na magazini wa Kyamba kya Usopa kya January 1 ne Awake! wa January 8, 2004, patendeka kunembwa Keyala wetu kunyuma ya nkupo.

Mwakonsha kwingijisha byepi uno keyala? Apo kampe mwakonsha kusambakanapo muntu uji na lusekelo bino wamba mulaka ungi. Umvwe wingijisha Intaneti, mubulai Keyala wetu uji kunyuma ya nkupo ya Kyamba kya Usopa nangwa Awake! Umvwe waingijisha Keyala wetu wakonsha kwitangila mwine buloshuwa wa Nanchi Lesa Ukebaka mu mulaka wanji, kufikilatu ne kimye kyo mukamutwajila buku wa mu mulaka wanji. Nangwa mwakonsha kumubula kipwilo nangwa jibumba jamba yewo mulaka.