Nkalata Kufuma Ku Jibumba Jitangijila
Byotubena kutwela mumyaka yakutatwilako ya mukitota-myaka kyabu 21, tuji nalusekelo lwakwimunembela anweba, “batemwa balongo [bonse, NW]” kuzhokoloka ntanda yonse, nekwimutakaika pakwibikishako kwenu kwingila mwingilo. (1 Pe. 2:17) Pepi namyaka 2,000 yapitapo, Yesu waipwizhe’mba: “Mwana muntu byoakeya, ukatana lwitabilo panopantandanyi?” (Luka 18:8) Kwingila kwenu nangovu mumwingilo mwaka wapwa kwakumbula jipuzho jakwa Yesu amba, ee! Bamo mwianweba bemulengulwile nekwimunenauna pamambotu alwitabilo lwenu. Mumapunzha avula mupita mumakondo, mubyamalwa, mubikola, nenzala bino muchinchika. (Luka 21:10, 11) Namambo akukebesha kwenu kwingila mingilo yawama, Yesu ukatana “lwitabilo panopantanda.” Kwakubula nangwa kuzhinaukatune, mwiulu muji lusekelo namambo akino!
Twayuka namba kuchinchika kechi kwapelane. Langulukai meseko apichilemo balongo betu mukyalo kimo kumuzhika wa Asia. Malwañano akulwisha Bakamonyi bakwa Yehoba muyoya mpunzha ekalakotu kimye kyonse. Katatakatu papo, bakapokola baangele bingi kuchibikizha kupwila kwawama kwajingako kwapwijile bantu 700. Bashinkile mikwakwa kuchinya bantu bakwabo bafika 1,300 kuba’mba bakatanwako. Bantu bavula saka bavwala bintu byakwizhika pameso, bamo bakapokola, balukukile mpunzha pajinga kupwila, nekutatula kupuma bantu bavula bajingapo, kepo nekusoka bishimikwa byanengezhewe kupwilamo. Bimye bikwabo, bantu bamubupopweshi bungi bapuma balongo betu kyatama bingi namipinyi yobapopako misumali.
Bino bintu bikozha bingi kumuchima pano bino kechi twafwainwa kukumyane. Mutumwa Paulo watangijilwe namupashi wa Lesa kunemba’mba: “Bonse bakeba kwikala na munema wa kunemeka Lesa mwi Kilishitu Yesu, bakapatwanga.” (2 Timo. 3:12) Mukitota-myaka kitanshi, bena Kilishitu bachinchikile byobebashobawilenga nekwibapuma, kabiji bamo bebepailenga nekwibepaya. (Byu. 5:40; 12:2; 16:22-24; 19:9) Byobyokyajinga nemukitota-myaka kyabu 20, kabiji kwakubula nangwa kuzhinaukatune kikatwajijila nemukyabu 21. Nangwa byonkabyo, Yehoba witubula’mba: “Kafwako kyela nangwa kimo kyo bakabunda kya kukulwishako obewa kikengila bulongo ne.” (Isa. 54:17) Uno mulaye byoawamapo! Ee kine, twanema bingi kwi Yehoba kyakuba’mba kupichila mwi ngauzhi Zekaliya, waambile’mba: “Awa wimukozha anweba wauba nobe wamukozha Yehoba pa kantu ka pa jiso janji.” (Zeka. 2:8) Balwanyi babapopweshi ba Yehoba kechi bakakonshane. Bupopweshi bwakine bukashinda!
Kyakumwenako, mukyalo kyatongolwa peulupo, Bakamonyi bakwa Yehoba basangalele bingi pakumona basapwishi bavujilako jibiji mumwaka wamwingilo wa 2001. Ee, balongo betu bakoselamo nangwa kyakuba bapita mumakatazho, byonkatu byoboba nekonse. Mumwaka wapwa wamwingilo mwaya ntanda yonse, bantu 5,066 babatizwenga mulungu nemulungu kulumbulula kwipana kwabo kwi Yehoba. Lelo jino bano bakatataka bakebesha bingi pamo neatweba bonse, ‘kwikala balumbuluka ne bakosatu mu lwitabilo monse mwaswila muchima wa Lesa.’—Kolo. 4:12.
Kabiji langulukai bintu byamwekele mu Greece. Nangwa kyakuba papita myaka yavula Chechi ya Bangiliki ya Orthodox yoyamanyikañana. Bakamonyi bakwa Yehoba lelo jino baitabilwa kukafulumende amba “bupopweshi bwayukanyikwa.” Pepala waamba pakuno kuyukanyikwa watwajijila kwamba’mba kishimikwa kya Betele wa mu Greece “kyazhila kabiji kempunzha yazhila, yapanwa kupopwelamo Lesa.” Kabiji tuji bingi nalusekelo kwimubula’mba mwaka wamwingilo wapwa, bije byamambo byaitabizha mpopwelo yetu mu Bulgaria, Canada, Germany, Japan, Romania, Russia, nemu United States. Byotwasanchilapo Yehoba pakupana jishuko jakwingila mingilo mubino byalo!
Byotulanguluka mashinda Yehoba moakwashisha bantu banji muano moba apelako, twayuka namba yeyenka Mulunda netu yetwafwainwa kwikala nanji. Tusekela bingi mulumvwañano lwawama lotujinalo neaye, byotwayuka kuba’mba aye witutemwa, witufunjisha, nekwitolola. Kyakine, meseko alwitabilo lwetu akatwajijila kwitwishila. Bino umvwe twaikala nalwitabilo lwakosa mwi Yehoba uketukosesha. Yakoba wanembele’mba: “Balongo bami, byo muponena mu bya lweseko bya misango ne misango, kasa mulanguluka’mba, byonse byo bya lusekelo; byo mwayuka’mba kwesekwa kwa lwitabilo lwenu ko kulenga butekanye.” (Yako. 1:2, 3) Kunungapo, kuchinchika kwetu kumwesha kutemwa kotwamutemwa Yehoba, kabiji kino kituletela lusekelo lwakine kine! Balongo betu, yukai’mba, Yehoba uketukwasha atweba bonse pamuntu pamuntu. Umvwe twaikala bakishinka, uketutwezha muntanda ipya. Ukeba atweba tukatwelemo.
Onkao mambo, twimutundaika anweba balongo nebanyenga, banyike nebakulumpe, kuvulukanga mapesho awamisha aji kulutwe. Mwane byubilo byetu bikale byonka byajinga byakwa mutumwa Paulo, wanembele’mba: “Mambo nalanguluka namba, bya kumanama bya kino kimye kya pano, kechi kyafwainwa kwibyesakanya na lukumo lukamweshiwa mwi atweba ne.” (Loma 8:18) Ketekelai mwi Yehoba kimye kyomubena kupita mumakatazho apusana pusana. Koselaimo, kabiji kulefulwane. Kechi mukomvwe bulanda nangwatu pachechetune. Byambo bya Lesa bitulaya’mba: “Mololoke ukamwena bumi mu lwitabilo lwanji.”—Ha. 2:4.
Atweba balongo benu,
Jibumba Jitangijila ja Bakamonyi bakwa Yehoba