Kabokoshi Kamepuzho
◼ Ñanyi kintu kyotwafwainwa kuvulukanga kimye kyotubena kwingijisha maselulafoni nema pager akwenda nao?
Bino biñambañamba byakonsha kwitukwasha kumvwañenamo nabakwetu konse kotwakonsha kutanyiwa. Nangwa kyakuba kino kyakonsha kwingila bulongo, twafwainwa kumona kuba’mba kechi tubena kwingijisha ano maselulafoni nema pager pabimye byabula kufwainwa nabiji kimye kyotuji mubusapwishi nangwa pakupwila kwabwina Kilishitu ne, kuchina twakavulañanya bakwetu. Pano twakonsha kuba byepi?
Akilangulukai byakonsha kumweka umvwe maselulafoni etu ajila nangwa ma pager apanga kyongo aku satuji mumwingilo wamubujimi nakusapwila. Mwinanzubo wakonsha kulanguluka’mbaka? Kikamwekana byepi kwiaye umvwe twaleka kwisamba nanji nekutatula kukumbula foni? Twayai tumone kuba’mba kechi twauba kintu nangwa kimo kyakwituntulako bakwetu kubula kuteleka mambo awama a Bufumu ne. (2 Ko. 6:3) Onkao mambo, umvwe twasenda selulafoni, nangwa pager, twafwainwa kwiishinka kuchina kwitulabika nangwa kulabika bakwetu kimye kyotubena kusapwila mumwingilo wamubujimi.
Pano ibyepi umvwe tubena kupembelela bakwetu babena kusapwila? Umvwe twapima kimye kyotusakwingila mumwingilo wamubujimi, nanchi kuba twatatu maana kuyenkao mwingilo nenyi? Pakuba’mba tunemeke mwingilo wetu wazhila, twasansapo ingilai mingilo yabula kunema yabusulu nangwa mingilo ikwabo kimye kikwabo. (Loma 12:7) Kino, kechi kibena kulumbulula’mba pano tuleke kwingijisha foni kuba’mba tusapwile nangwa kumvwañana juba jalufunjishone.
Kikatakata twafwainwa kujimuka kimye kyotubena kwingijisha maselulafoni aku satwendesha motoka, mambo mizhilo imo yaamba kuba’mba kuba kino kuleta mapuso. Twafwainwa kulondela mizhilo yonse yakanya kwingijisha maselulafoni kimye kyotubena kwendesha motoka.
Twiya kukupwila kwabwina Kilishitu, kupwila kwakijiiji, kwajuba jimo kwiikajila ne kwankambi nakupopwela Yehoba nekufunjishiwa kwiaye. Nanchi lusanchilo lwetu lwabino bimye byazhila kuba lwitutundaika kushinka maselulafoni nema pager kuba’mba bibule kwitulabika nangwa kulabika bakwetu nenyi? Umvwe pajipo bintu bimo bibena kukebewa kuba’mba twibyube bukiji-bukiji kwingijisha bino biñambañamba, twafwainwa kufuma pampunzha potubena Kupwila nekwimanako palepa byobya kuba’mba twisambilepo. Umvwe ine, kyawama nanchi kunengezha bintu byakyetu-kyetu nemingilotu ikwabo yabula yabupopweshi pakimye kikwabo mukifulo kyakubilanga mukimye kyomubena kupwila.—1 Ko. 10:24.
Twayai tumone kuba’mba byotubena kwingijisha maselulafoni nangwa bintu bikwabo bipanga kyongo, satuvuluka kimye kyonse kubila lusa bakwetu nekunemeka bintu byakumupashi.