Kakitenguluzha Ka Mepuzho

◼ Ñanyi Mafunde a mu Baibolo Akonsha Kwitukwasha Kuyuka bya Kuba na Mafoni, Kimye kyo Tubena Kupwila ne Kimye kyo Tuji mu Mwingilo?

‘Bintu Byonse Biji na Kimye kya Byo.’ (Sapwi. 3:1): Mafoni alengela bantu kutuma byambo ne kwisamba na bakwabo kimye kiji kyonse. Nangwa byonkabyo, kuji bimye bimo bena Kilishitu byo bafwainwa kubula kulabikwa na mafoni. Kyakumwenako, kimye kya kupwila ke kimye kya kupopwela Yehoba, kutambula mikambizho ya ku mupashi ne kwikosesha atweba bonse. (Mpitu. 31:12; Sala. 22:22; Loma 1:11, 12) Nanchi kechi twafwainwa kuzhimya mafoni kimye kya kupwila, ne kwi ambula panyuma ya kupwisha ne nyi? Kuji bimye bimo byo twakonsha kubula kuzhimya mafoni, kikatakata umvwe tubena kuketekela kutambwila byambo bya bukiji bukiji, pano bino kechi twafwainwa kulubankanya bakwetu ne.

‘Ubai Bintu Byonse na Mambo a Mambo Awama.’ (1 Ko. 9:23): Kuji bimye bimo byo twafwainwa kwingijisha foni kimye kyo tuji mu mwingilo. Kyakumwenako, mulongo wakonsha kwingijisha foni kwisamba na basapwishi babena kwingijila mu nyaunda ikwabo. Basapwishi kimye kimo bengijisha mafoni kutumina bo besambile nabo nangwa bo bafunjisha Baibolo, kikatakata umvwe bekala kwalepa. Umvwe tuji na foni twafwainwa kumona kuba’mba kechi ibena kwitulubankanya kimye kyo tubena kwisamba na mwina nzubo ne. (2 Ko. 6:3) Kyakonsha kuwama kusapwilangako kimye kyo mubena kupembelela basapwishi bakwenu, kukila kutumangatu mafoni.

Langulukilaingako Bakwenu. (1 Ko. 10:24; Fili. 2:4): Kechi twafwainwa kukelwanga pa kusambakana kwa kuya mu mwingilo ne kutumanga mafoni nangwa kunemba tubyambo pa foni pa kuba’mba tuyuke kusa kuya na kwingijila jibumba jetu ne. Umvwe twakelwa, kilengela kulubankanya mutanchi. Bino kuji bintu bimo byakonsha kwitulengela kukelwa. Nangwa byonkabyo, umvwe ke tufike bukiji tumwesha amba twanemeka mutanchi wa Yehoba, balongo babena kutangijila ne basapwishi bakwetu.