Bwelaingako ku Bonse Bamwesha Lusekelo

¹ Atweba bavula lelo jino tuji mu bukine mambo muntu umo wamwene byo twatambwile bulongo mambo a Bufumu kabiji mu kutekanya wabweleleko jibiji—kampe wabweleleko pa bimye byavula—pa kuba’mba abayisheko alwa lusekelo. Ne atweba twafwainwa kuteshako muchima kubwelangako ku bonse bamwesha lusekelo. Ee, kubwelako kwavwangiwamo mu mwingilo wetu wa kulenga ‘baana ba bwanga.’—Mat. 28:19, 20.

² Monai Inge Uji na Lusekelo: Nangwa kya kuba muntu wakana kutambula buku, mwekanyikilo yanji ya kilungi, ñambilo yanji, jiwi janji nangwa byambo byo abena kwingijisha byakonsha kumwesha lusanchilo lwanji lwa mambo a Bufumu. Na mambo a bino twakonsha kubwelako. Mulongo umo wafwakashishe muntu umo pa milungu itanu kwa kubula kumushilapo buku nangwa umo ne. Byo abweleleko kimye kya butanu na kimo, uno muntu waswile kutambula buku, kabiji ponkapotu ne lufunjisho lwa Baibolo lwatendekele.

³ Umvwe mwatana muntu wamwesha lusekelo, ponkapotu bwelaiko bukiji bukiji, kampe panyuma ya kupitapo moba achechetu. Kange mupe “awa mubi” jishuko ja kusompola aa mambo o mwakushile mu muchima wa muntu ne. (Mat. 13:19) Monai kuba’mba mwafikizha mulaye wenu umvwe kya kuba mwisambile kubwelako pa jonkaja juba jo mwaumvwañene.—Mat. 5:37.

⁴ Mwingilo wa mu Mukwakwa: Abya mwesekesha na ngovu kubwelako mu kubayisha lusekelo ku bantu bo mutana kimye kya busapwishi bwa mu mukwakwa nangwa pa kusapwila busapwishi bwa kushukilwa nyi? Panyuma ya kupwisha mwisambo wenu, mwakonsha kwamba amba: “Uno mwisambo wawama bingi. Kwepi ko nakonsha kwimutana pa kuba’mba tukesambepo jikwabo?” Umvwe kyakonsheka, basapwishi bamo bakonsha kusalapo kupana nambala yabo ya foni ku muntu wamwesha lusekelo nangwa bakonsha kupimpuzhanya manambala a foni. Inge bantu sa bemumona jonse mu busapwishi bwa mu mukwakwa ku yoyo mpunzha, kechi bakonsha kuzhinauka kwimupa nambala ya foni nangwa keyala wabo ne. Nangwa kya kuba bakana kwimubula ko mwakonsha kwibatana, mwakonsha kweseka jikwabo kubayishako lusekelo lwabo kimye kikwabo kyo mukasambakana nabo mu mukwakwa.

⁵ Umvwe twamona bijimwa byo tutekezha byamena bulongo, kituletela bingi lusekelo. Mu jishinda jimotu, twakonsha kwikala bingi balusekelo kupichila mu kubwelako kabiji ne kukwasha bantu kukomenako ku mupashi. (1 Ko. 3:6) Ibikilai kikonkwanyi kya kubwelangako ku bonse bamwesha lusekelo.