Monai Kuba’mba Mwabwelako!

¹ “Misambo byo yajikuwamapo! Nafwainwa kuvuluka kubwelako ku yewa muntu.” Nanchi mwa kyambapo kala byo byo, bino ko kyakayanga mwalubako ku mpunzha kwikala yewo muntu nyi? Umvwe ibyo, mwafwainwa kuyuka kuba’mba kunemba jizhina ja mpunzha kwikala yewo muntu jo jishindatu jikemulengela kumona kuba’mba mwabwelako.

² Nembai Byonse: Mwisambo ye mwakwisambapo na muntu usekela saka akiji mu milanguluko yenu, ikalai na kimye kya kunemba byambo byonse byafwainwa bya yewo mwisambo. Nembai jizhina ja yewo muntu ne byo mukakonsha kumuyuka. Nembai keyala yanji, bino kange musombetu ne, pitulukaimo ne kumona kuba’mba byo mwanemba byo ibyo. Nembai mutwe ye mubesambengapo, binembelo byonse byo mwajikutanga, ne buku ye mwajikumushila.

³ Umvwe mwajikumushila jipuzho jibena kukeba mukumbu kimye kyo mukabwelako, na jo jinembai. Nanchi mwajikumonapo bimo pa yewo muntu, kisemi kyanji, nangwa pa bupopweshi bwanji nyi? Umvwe ibyo mwajikwibimona, nabyo binembai. Pa kimye kyo mukabwelako, inge mwatongolapo kimo pa bino bintu byo mwamwene kikamwesha kuba’mba muji na lusekelo mu yewo muntu. Kyapelako, nembai juba ne kimye kitanshi kyo mwaji kwisamba na yewo muntu ne juba ne kimye kyo mwaji kumulaya kukabwelako. Kupichila mu kunemba byambo byaluñama, bikemuvululako kabiji kechi mukalubako mulaye wenu wa kubwelako ne.—1 Timo. 1:12.

⁴ Aku mupwishatu kunemba byambo byenu, bikai kyo kyo kipepala paji byambo byo mwanembapo pamo na bintu bikwabo byo mwingijisha mu mwingilo wa bujimi na biji kyola mo musendela mabuku, Baibolo, buku wa Ukupelulula, ne mabuku akwabo—pa kuba’mba mukabule kushupikwa na kwikikebakeba. Kyawama bingi kunemba mazubo pabula bantu pa kipepala kingi kya nzubo ne nzubo kyabula kyokyo kyo mwingijisha kunembapo bimpempu byenu kya kubwelako. Nangwa kyakuba mwanemba mutanchi waluñama wa bipempu bya kubwelako, kintu kikatampe ke kya kumona kuba’mba mwabwelako!

⁵ Langulukai pa Yewo Muntu: Kimye kyo mubena kukokozha kuya mu butumwa, pitulukai mu byambo byenu byo mwanembele bya kipempu kya kubwelako. Langulukai pa muntu pa muntu ne kumona byambo byawama byo mwafwainwa kwisambapo nanji pa lwendo lwa kibiji. Langulukai pa byo mwafwainwa kunungulula lusako lwa yewo muntu ku jisambijilo ja Baibolo ja pa nzubo. Byo muji musapwishi wa mambo awama, kunengezha kwa yewo mutundu kwakonsha kwimulengela kwikala na basambi bavula, ne kwimuletela lusekelo.—Mana. 21:5a.

⁶ Onkao mambo kimye kikwabo kyo mukatana muntu umvwa, kange mulanguluke kuba’mba mwikisungetu mu mutwe ne. Mu kifulo kya byobyo, nembai ne kupitulukamo mu byo mwanemba, kabiji twajijilai kulanguluka pe yewo muntu, ne kumona kuba’mba mwabwelako!