Nanchi Munemeka Mabuku Etu Nyi?

¹ Mabwe a daimani ne mabwe akwabo a buneme anema kechi na mambo a buwame bwaotu ne, bino ne na mambo a kubaya mutengo ne kushupa kwiapoya. Kuyuka Yehoba ne Yesu Kilishitu kuji na munema wakilapo kuwama, kabiji mabuku etu o mabukutu bunke pano pa ntanda alondolola bunonshi bwa ku mupashi mu kuzhika na mana a kwakamwa Lesa. (Lo. 11:33; Fili. 3:8) Nanchi twafwainwa kumwesha byepi lusanchilo lwa kine ku mabuku etu?

² Bantu bamo ne bisemi babika jonse mali a bupe pa mbaji a kutwala ku Nzubo ya Bufumu ne kubika mu kabokoshi kanembwapo’mba “Bupe bwa Kukwasha Mwingilo wa Sosaiti wa Ntanda Yonse—Mateo 24:14.” Bamo bapana bupe bwavujilako ku mwingilo wa pano pa ntanda kyonse kimye kyo batambula mabuku nangwa magazini ne kimye kyo babika mali o batambula mu butumwa mu kabokoshi.

³ Jishinda jikwabo ja kumwesha lusanchilo ke ja kusalulula bantu bakushila mabuku botutana mu bujimi. Kechi twakonsha kulanguluka bya kupa lukeke jibwe ja daimani jabaya mutengo joabula kuyuka munema ne. Byonkabyo ne atweba kechi twafwainwa kupana mabuku etu a munema ku bantu babula kunemeka bya ku mupashi ne. (Esekanyaiko Bahebelu 12:16.) Kwipana kwetu atweba bene ne mabuku etu kwafwainwa kulamwa na mana a kuyuka. Nanchi mwina nzubo ubena kukeba kwisamba nyi, inyi ne? Nanchi ubena kuta muchima ku byo tubena kwamba, kukumbula mepuzho o tubena kumwipuzha, ne kulondela byo tubena kutanga Baibolo nyi? Umvwe wamwesha lusekelo lwa yewo mutundu twakonsha kumushila buku wafwainwa. Kimye kya kutangijila masambijilo mu mabuku etu, tukwasha bantu kuyuka bifunjisha Baibolo kabiji kino kibapa jishuko ja kwikelamo na bulunda ne Yehoba. Mfweto ya kine ifuma mu mabuku etu ipiminwa ku byo tubena kwiengijisha.

⁴ Mabuku ashala pa shelufu mu Nzubo ya Bufumu nangwa mu nzubo yetu kechi aingila nkebelo yao ne, kabiji buneme bwawo kechi bubena kuyukwa ne. Nangwatu magazini akala mabuloshuwa, mabuku ne matalakiti afwainwa kwingijishiwa bulongo.

⁵ Kimye kyonse sa mulangulukapo pa mpendwa ya mabuku o mubena kukeba kwingijisha mu mwingilo. Kulangulukilako bakwabo kukebewa bingi. Nangwa kyakuba kwikala na mabuku avula kyawama, kikatakata umvwe mubena kuba bupainiya, bino kechi kyawama kwikala na mulumba wa mabuku ne, mambo mwakonsha kutambula akwabo ku Nzubo ya Bufumu kupwila saka ku kyangye kutendeka nangwa pa nyuma ya kupwila. Ikalai na mabuku o mubena kukeba kutendeka nao mu ñondo kabiji ne kutambwilapo akwabo inge o muji nao ke apwe.

⁶ Vulukai kuba’mba, umvwe mwabula kulondolola bulongo jishinda jipya ja kutambikilamo mabuku mu mwingilo wa mu bujimi, kikaleta lukatazho kulutwe ku bamo pa kulungika ñambilo nangwa mashinda o batana kuba’mba apela kwingijisha. Bamo babena kubula bantu mulanguluko wakuba’mba kino kimye mabuku otubena kutambika ke atutu kabiji kino kyaleta lukatazho lwa kulungika mulanguluko wa yewo mutundu. Pakebewa mali pa kupota mapepala, pa kupulinta ne kutuma mabuku kuzhokoloka ntanda yonse, kubikapo ne mwingilo wa kutuntulwila mabuku mu milaka pepi na 350. Onkao mambo, basapwishi bafwainwa kubula mwina nzubo’mba mabuku abena kushiwa kwakubula kulipilisha bino tutambula bupe inge umo wapana .

⁷ Mabuku etu akilapo kunema inge ashala ku bantu basanchila Kyambo kya kwa Lesa kya bukine. Onkao mambo lekai atweba bonse twikale ba mana kabiji bajimuka mu kwingijisha byo twapewa, kumwesha kuba’mba tunemeka bingi mabuku etu.