Kwashai Boba ‘Batongwelwa Bumi Bwa Myaka’
1. Bañanyi Yehoba bo abena kwikonkenya aye mwine mu ano moba etu a lelo?
1 Muntu yense ujipo na byubilo bimo bifuma mu muchima wanji wakifwanyikizho. (Mat. 12:35) Baibolo yaambapo pa muntu umo awo mu “muchima wanji mwajinga bulwi bonka.” (Sala. 55:21) Bakwabo ‘batemwa kuzhingila.’ (Mana. 29:22) Bino kobaji ne boba ‘batongwelwa bumi bwa myaka.’ (Byu. 13:48) Mu moba etu a lelo, Yehoba ubena kwikonkenya aye mwine bantu ba uno mutundu batongwelwa jimo. (Hagai 2:7) Abya twakonsha kwibakwasha byepi kwikala bapopweshi ba Yehoba?
2. Bika byavwangiwamo mu kwingila mwingilo wetu wa kulenga baana ba bwanga?
2 Bwelaiko Bukiji Bukiji: Kwikala na mulanguluko wawama pa kubwela ku bantu bamwesheshe lusekelo kyanema bingi pa kuba’mba twingile mwingilo wetu wa kulenga baana ba bwanga. (Mat. 28:19, 20) Nanchi tupelawizha kubwelako ku bantu bamwesheshe lusekelo nyi? Abya tubwelako ku baswa kutambula mabuku nangwa ku boba bamwesha lusekelo mu mambo awama nyi? Nanchi twibikako na mukoyo kwibakwasha kukoma ku mupashi nyi? Twafwainwa kwikala na kizaku kya kunungulula lusekelo lwa bantu botutana mambo bumi bwa bantu popo bwashakamina.
3. Kika kyo twafwainwa kuba panyuma ya kwisamba na muntu mu mwingilo?
3 Saka mukyangye kulubamo mwisambo ye mwaji kwisamba na muntu wamwesha lusekelo, nembai jizhina janji ne keyala. Nembai mutwe ye mwaji kwisambangapo, binembelo byo mwaji kutanga ne mabuku o mwaji kumushila. Panyuma ya bino, ibikilai kikonkwanyi kya kubwelako bukiji bukiji.
4. Twakonsha kubwelako byepi bulongo?
4 Byo Twakonsha Kubwelako: Umvwe mwabwelako, kiwama bingi kwikala bakasuluka ne kumumwesha lusekelo mwina nzubo. Mwisambo wenu wafwainwa kwikala wapela kabiji wa mu Binembelo. Nengezhai mwisambo wanengela wa mu Baibolo wa kwisambapo, kabiji pa kupezhako kwisamba, ipuzhai jipuzho jo mukakumbula umvwe mwabwelako jibiji. Kechi kyawama kwipachika pa bintu byabula bya mu Binembelo mwina nzubo byo akonsha kuleta ne. Kosaiko kwamba pa bintu byo ayuka ne aye mwine.—Kolo. 4:6.
5. Painiya umo wibikileko byepi, kabiji bika byafuminemo?
5 Kubwelako ku bantu bamwesheshe lusekelo kikebewa kwibikako bingi, pakuba mfweto ifumamo yabaya bingi. Painiya umo mu Japan wibikijile kikonkwanyi kya kubwelako pa ñondo pa ñondo ku bantu bavula bamwesheshe lusekelo. Watendekele kunemba mazhina a bantu boatananga mu mwingilo wa ku nzubo ne nzubo, kabiji pa kupitapo moba atanu na abiji, wabwelangako jibiji. Winengezhezhanga jimo bulongo byoakaya na kwamba, kabiji waambanga na kuchinchika mambo o asapwilanga. Pa bantu bo abweleleko, pajinga muntu ye atendekele kufunjisha lufunjisho lwa Baibolo awo waambile amba: “Anweba bantu jonse jo mwiya pano nemupanga. Pano lelo kyo kimye kitanshi kyo natelekako.” Kukosako kwa na butemwe kwa uno painiya, mwafumine bimo. Pa kupwa kwa ñondo ne ñondo wanembelenga masawakya a mafunjisho a Baibolo jikumi.
6. Mambo ka o twafwainwa kukoselako kubwela ku bantu bamwesheshe lusekelo?
6 Bwikalo bwa bantu bwendatu na kwalauka alauka pa juba pa juba. (1 Ko. 7:31) Kwikala kubwelako bimye byavula bingi pa kubatu amba utanepo jibiji muntu wamwesheshe lusekelo. Umvwe ketubweleko bukiji bukiji, twakonsha kukwasha boba batongwelwa jimo kuba’mba bendenga mu jishinda jitangijila ku bumi bwa myaka.—Mat. 7:13, 14.