Kubwelako, Kuleta Mafunjisho a Baibolo
1. Mambo ka mwingilo wa kubwelako kyoanemena?
1 Yesu kechi wakambizhe baana banji ba bwanga kusapwilatu konka ne, bino wibakambizhe ne kulenga ‘baana ba bwanga ... , ne kwibafunjisha.’ (Mat. 28:19, 20) Musapwishi utayatu mbila, pakuba mufunjishi uba byavula. Ufunjisha, ulondolola, kabiji umwesha bishinka. Kubwelako ku bantu bamwesha lusekelo lwa kukeba kufunda na mulanguluko wa kutendeka lufunjisho lwa Baibolo jo Jishinda jimo jotufunjishishamo bantu.
2. Bañanyi botwakonsha kubwelako?
2 Bañanyi bomwakonsha kubwelako? Mwakonsha kubwela ku bantu batambwile buku nangwa bamwesheshetu lusekelo lucheche mu mambo awama. Umvwe mu busapwishi mwatana muntu uji na lusekelo, nembai keyala yanji nangwa nambala ya foni pa kuba’mba mukamukwashe kunungulula kizaku kyanji. Ikalai na luketekelo lwa kuba’mba mukatatula mafunjisho a Baibolo. Twajijilai kukeba bantu bakonsha kwitaba kufunda lufunjisho lwa Baibolo, kabiji ketekelai kuba’mba mukebatana.—Mat. 10:11.
3, 4. Bika byavwangiwamo mu kubwela ku bantu?
3 Bamweshai byo Mwibatemwa: Lunengezho lwawama lwa kubwelako lutatwila pa jonka juba jitanshi ja kwamba na muntu. Basapwishi bayuka bulongo, bamona lusekelo lwamwesha mwina nzubo, ne kuyuka mwakutwajijila na misambo ikwabo. Bamo bashikisha jipuzho pa kupezhako kuba’mba bakekale na pa kutendekela kwisamba na mwina nzubo pa kubwelako jibiji. Kutemwa bantu ko kwakonsha kwitulengela kwibavuluka nangwa kyakuba twibasha, kabiji kwitulengela kubwelako kwi abo kwa kubula kutaya kimye ne. Umvwe kyakonsheka, esekai kubwelako kyonka kimye kyobakiji na kizaku kampe jonkajo juba nangwa inge papita moba abiji.
4 Umvwe mwabwelako, tendekai mwisambo wenu pa bintu byo mwisambilepo kimye kitanshi. Ibikilai kikonkwanyi kya kuba’mba juba jimo mwafwainwa kutangapo Kinembelo kya kukoseshañana nangwatu kimo, ne kuteleka. Yukai bulongo mwina nzubo byoaji. Kepo bimye bikwabo byo mukamufwakashishanga, isambainga nanji bukine bwa mu Byambo bya Lesa bwakonsha kumukwasha kwesakana na byoaji.
5. Ñanyi jishinda japeela jo mwafwainwa kwingijisha pa kuba’mba mutendeke lufunjisho lwa Baibolo?
5 Ikalai na Mulanguluko wa Kutatula Mafunjisho a Baibolo: Samubwelako na kukatatula lufunjisho lwa Baibolo. Kino kyakonsha kubiwa byepi? Ambai kuba’mba mukeba kwisambapo nanji kishinka kimo kyawama. Kepo mwazhikula ne pa palagalafu imo yo mwalanguluka kuba’mba wakonsha kwiitemwa mu buku wa Kuyuka nangwa mu buloshuwa wa Nanchi Lesa Ukebaka? Tangai palagalafu, ipuzhai jipuzho, ne kwisamba pa kinembelo kimo nangwa bibiji byamweshiwa mu palagalafu. Mwakonsha kwisamba bino mu maminiti atanu nangwa jikumi ponka pa kibelo kyanji. Pa kupezhako shikishai jipuzho ne kunengezha lunengezho lwa kubwelako na kutwajijila mwisambo pa kimye kikwabo.
6. Twakonsha kumwesha byepi amba twaumvwisha buneme bwa kubwela ku bantu bamwesha lusekelo?
6 Kutundaika bantu bonse baji na lusekelo botutana, ke kintu kimo kyanema bingi mu mwingilo wetu. Onkao mambo, monaingapo kimye mu mingilo yenu ya mu mulungu kya kubwelelamo ku bantu bomwisambile nabo. Kuba kino kukawamisha mwingilo wenu kabiji kukemuletela lusekelo lukatampe.