Kunengezha Kukwasha Bingi pa Kubwelako
1. Mu ñanyi jishinda mwingilo wa bwina Kilishitu mo akonsheshe kufika konse konse?
1 Yesu wafunjishe bingi bulongo baana banji ba bwanga kwikala basapwishi bayuka kusapwila “mambo awama a Bufumu.” (Mat. 4:23; 9:35) Wibafunjishe kimye kyo basapwijilenga mu Pelisitina. Nangwa byonkabyo, saka akyangye kubwela mwiulu, Yesu waambile’mba mwingilo wa bwina Kilishitu ukafika konse konse ne kulengela ‘mikoka yonse ya bantu kwaluka ke baana ba bwanga.’—Mat. 28:19, 20.
2. Mwavwangiwa ka mu kukokela mukambizho wa Yesu wa ‘kulenga baana ba bwanga’?
2 Uno mwingilo ukebewa kubwelako ku bantu bamwesha lusekelo mu mambo awama a Bufumu bwa Lesa ne kwibafunjisha kulama byonse Kilishitu byo akambizhe. Twafwainwa kwinengezha bulongo, pa kuba’mba tukwashe bantu kimye kyo twabwelako.
3. Nangwatu pa kimye kitanshi kyo mwisamba na muntu, mwakonsha kuba byepi pa kuba’mba mukabweleko?
3 Nengezhezhai Jimo: Basapwishi bamo bepuzha bwipuzho panyumatu ya kwisamba na muntu kimye kitanshi kabiji ne kumulaya’mba bakabwelako na kumukumbula. Bekitana kuba’mba kwingijisha byambo biji mu buku wa Baibolo Ufunjisha pa kubwelako kwibakwasha bingi kutendekelamo mafunjisho a Baibolo.
4. Mambo ka o twafwainwa kubula kupembelelanga magazini a bukumo saka tukyangye kubwelako?
4 Kwikalatu na magazini acheche a pa ñondo pa ñondo kechi kulumbulula’mba pano twakonsha kupembelela kufikilatu ne po tukatambwila akwabo a ñondo walondelapo kuba’mba tukabweleko ne. Kyakonsha kuwama bingi kubayisha lusekelo lwa muntu kupichila mu kwisambanga nanji byambo biji mu magazini o aji nao.
5. Mfweto ka ya kwikela na nkebelo pa kubwelako ku bantu?
5 Ikalai na Nkebelo: Saka mukyangye kubwelako ne, ikalaiko na maminiti acheche kuba’mba mupituluke mu byambo byo mwanembele ne kumona byo musakuya na kwamba. Kya kumwenako, isambai pa kishinka kiji mu buku ye mwamushijile. Nangwa mushilai buku mukwabo waesakana na byo mwisambilepo. Umvwe kimye kitanshi mwamushijile bwipuzho, nkebelo yenu ke ya kumona’mba mwakumbula bobo bwipuzho. Monai kuba’mba mwatanga kinembelo kufuma mu Baibolo kibena kukosesha kyokyo kishinka kyo mubena kwisambapo.
6. Ñanyi nkebelo yetu ya kubwelelako ku bantu?
6 Nkebelo Yetu: Nkebelo yetu ya kubwelako ke kutendeka lufunjisho lwa Baibolo. Pa kubwelako, mulongo umo wakebele kutendeka lufunjisho lwa Baibolo na mwanamulume umo, bino uno mwanamulume wakaine. Uno mulongo wabweleleko ne kumutwajila magazini a bukumo ne kumubula’mba, “Kwiya kwetu pano, ke kwa kuba’mba tukumbule bwipuzho bumo bwa mu Baibolo bwipuzha bantu bavula lelo jino.” Panyuma ya kuteleka ku byaambile uno mwanamulume, mulongo watangile kinembelo ne jifuka jakwatankana na buku ufunjiwamo mafunjisho a Baibolo. Kino kyamukwashishe kutendeka lufunjisho lwa Baibolo lwa kimye kyonse.
7 Kikebewa kwibikako pa kuba’mba twikalengako na kimye kya kunengezha kubwelako ku bantu. Lusekelo lwetu lukabayilako, kabiji twakonsha ne kwikala na jishuko ja kukwasha ‘baji na michima ya kishinka’ kuya mu jishinda ja ku bumi.—Byubilo 13:48.
7. Nga kwinengezha bulongo kwimukwasha byepi kutendeka lufunjisho lwa Baibolo?