Bya Kutendeka Mafunjisho a Baibolo ku bo Tushila Magazini
1. Kikonkwanyi ka kyo tuji nakyo pa kusha magazini?
1 Javula tushila bantu Kyamba kya Usopa ne Awake! mu mwingilo pa Kibelushi. Nangwa byonkabyo, kuba bino ke kwalatu kitendekesho kya kufikizha kikonkwanyi kyetu kya kufunjisha bukine bantu ba michima ya bukishinka. Panshi po paji mashinda abena kumwesha bya kusha buku wa Baibolo ufunjisha pa kubwelako ne kutendeka lufunjisho lwa Baibolo. Monai kuba’mba ano mashinda ayilamo na bantu bo mukambangako kabiji ne kwiamba mu byambo byenu. Mwakonsha ne kwingijisha jishinda jikwabo jo mwamona’mba jafwainwa kwingila bulongo.
2. Twakonsha kwingijisha byepi mapeja a kutendekelapo aji mu buku wa Baibolo Ufunjisha kutendekelamo lufunjisho lwa Baibolo?
2 Ingijishai Mapeja a Kutendekelapo: Umvwe mwabwelako, mwakonsha kwamba’mba: “Magazini o nemushijile abena kwamba pa biji mu Baibolo. Akimonai kutanga Baibolo kyo kwanemena.” Tangai Isaya 48:17, 18; Yoano 17:3; nangwa kinembelo kikwabo kyafwainwa. Panyuma ya kumumwesha ne kumupa mwina nzubo buku wa Baibolo Ufunjisha, mwakonsha kutwajijila kwamba’mba:
◼ “Baibolo witupa luketekelo lwa kine lwa mu kimye kya kulutwe.” Mumweshai mwina nzubo mapeja 4-5 ne kumushikisha’mba, “Pa iye milaye iji papo, yepi yo mwakonsha kukebesha’mba ikafikizhiwe?” Mweshai mwina nzubo kitango kyaamba pa mulaye wa mu Binembelo ye asala, kabiji ne kwisamba nanji palagalafu imo nangwa abiji umvwe ubena kukeba.
◼ Nangwa mwakonsha kwamba’mba, “Baibolo ukumbula mepuzho anema bingi a mu bwikalo.” Mumweshai mwina nzubo peja 6 ne kumushikisha umvwe wakilangulukapo kala pa bwipuzho buji bonse buji panshi ya uno peja. Zhikulai pa kitango paji mukumbu wa bobo bwipuzho, kabiji ne kwisambako pacheche palagalafu imo nangwa abiji.
◼ Nangwa mwakonsha kumumweshapo mitwe imo iji pa mutanchi wa bijimo ne kumushikisha ye akonsha kutemwapo. Zhikulai pa kyokyo kitango kabiji ne kumumweshako pacheche bya kufunda lufunjisho lwa Baibolo.
3. Twakonsha kutendeka byepi lufunjisho lwa Baibolo inge twashile magazini aamba pa (a) byubilo bya ino ntanda bibena kutaminakotu? (b) kisemi? (c) kuketekelwa kwa Baibolo?
3 Shai Mwaipuzha Bwipuzho pa Lwendo Lutanshi: Jishinda jikwabo ke kwala kitendekesho pa lonka lwendo lutanshi pa kukatendekela kimye kyo mukabwelako. Panyuma ya kuba mwina nzubo watambula magazini, mwipuzhai bwipuzho ne kumulaya’mba mukeya kukumbula kimye kyo mukabwelako. Monai kuba’mba mwabwelako, kabiji ne kufikizha mulaye. (Mat. 5:37) Umvwe mwabwelako, muvululaimo mwina nzubo bwipuzho, tangai ne kwisambako pacheche mukumbu uji mu buku wa Baibolo Ufunjisha. Mupai buku kuba’mba alondelengamo. Monai bya kumwenako bicheche byalondelapo:
◼ Umvwe magazini ye mwashile waamba pa byubilo bya ino ntanda bibena kutaminakotu, mwakonsha kwamba’mba, “Kimye kikwabo tukesamba pa mukumbu wa mu Baibolo wa buno bwipuzho bwa kuba’mba, Lupimpu ka Lesa lo akaleta panopantanda?” Umvwe mwabwelako isambai biji pa mapeja 4-5. Nangwa mwakonsha kushikisha bwipuzho bwa kuba’mba, “Nanchi Lesa ukeba’mba kwikalenga bya malwa nyi?” Pa kubwelako, mweshai mwina nzubo mapalagalafu 7-8 aji mu kitango 1.
◼ Umvwe magazini ye mwashile waamba pa kisemi, saka mukyangye kuya mwakonsha kushikisha’mba, “Ba mu kisemi bakonsha kuba byepi kuba’mba kisemi kikale kya lusekelo?” Umvwe mwabwelako, isambai palagalafu 4 mu kitango 14.
◼ Umvwe magazini ye mwamushijile waamba pa kuketekelwa kwa Baibolo, mwakonsha kumushikisha buno bwipuzho bwa kukeya kukumbula pa mwisambo ukalondelapo amba, “Nanchi Baibolo waluñama na byaamba sayansi nyi?” Pa kubwelako, isambai palagalafu 8 mu kitango 2.
4. Twakonsha kuba byepi umvwe mwina nzubo wakana buku wa Baibolo Ufunjisha?
4 Pa kupwisha mwisambo uji yense, shai mwaipuzhapo bwipuzho bwa kukeya kukumbula pa kimye kya kukeyako jikwabo. Umvwe mwaikajika lufunjisho lwa kimye kyonse, fundainga bitango mo byalondankena kutatwilatu ku ntendekelo shoo ne ku mpelo. Ibyepi umvwe kya kuba mwina nzubo wakana kutambula buku wa Baibolo Ufunjisha? Mwakonsha kumutwajilangatu magazini ne kwisambanga nanji misambo ya mu Binembelo. Byo mubena kukomesha lusekelo lwanji, mu kuya kwa kimye wakonsha kuswa lufunjisho lwa Baibolo.
5. Mambo ka o twafwainwa kwibikishako kufunjishanga bantu kukila kupelelatu mu kwibashila magazini?
5 Kyamba kya Usopa ne Awake! wakonsha kulengela muntu kwikala na kizaku kya kukeba kufunda Baibolo kine byo afunjisha. Onkao mambo, monai kuba’mba mwatendeka mafunjisho a Baibolo na boba batambwila magazini. Umvwe twauba bino, tukalondela mukambizho wa Yesu wa ‘kulenga baana ba bwanga . . . , ne kwibafunjisha.’—Mat. 28:19, 20.