Awake! Wiikajila ye Tukashanga mu November!

¹ Bantu bavula baji na mepuzho awama bingi pa mambo a buneme bwa Baibolo. Umvwe bantu bo bamunembele, wakonsha kutelwa byepi’mba Mambo a Lesa? Mambo ka o nafwainwa kuketekela Baibolo kuntangijila mu jishinda jo nafwainwa kuyamo? Mfweto ka yo nkamwenamo mu kwingijisha kimye ne bulume bwami kutanga ne kufunda Baibolo? Baibolo ka ye nakonsha kwingijisha? Ano o mepuzho amo akumbulwapo mu Awake! wiikajila wa November uji na mutwe wa kuba’mba, “Can You Trust the Bible?” (Nanchi Mwakonsha Kuketekela Baibolo nyi?)

² Tukasampanyanga uno Awake! wiikajila mu nyaunda yetu yonse. Umvwe kyakonsheka, mukengijilenga pamo na kipwilo mu mwingilo wa kusapwila ku nzubo ne nzubo pa Bibelushi byonse bya mu ñondo wa November. Shai uno Awake! ku balongo benu, bakwenu bakinkalankulo, bo mwingila nabo, bo mufunda nabo ne bantu bo mwalayile kubwelako. Sendai makope a uno Awake! pa kuya ku mashitolo ne pa kimye kyo muji pa lwendo. Ofweshi wa musampi watuma makope avula kuba’mba kipwilo kikekale na avula a kusha.

³ Tendekai Lufunjisho lwa Baibolo: Umvwe mwashila muntu magazini, mwakonsha kwala kitendekesho kya lufunjisho lwa Baibolo saka mukyangye kupwisha mwisambo wenu. Kya kumwenako, mwakonsha kwamba’mba, “Nkeya kimye kikwabo na kwimumwesha mukumbu wa mu Baibolo wa buno bwipuzho bwa kuba’mba, ‘Lesa wakebelenga’mba panopantanda pekale byepi?’” Apa bino mukabweleko na buku wa Baibolo Ufunjisha ne kumumwesha mwina nzubo mapeja 4-5, nangwa mukesambe nanji mapalagalafu 1-3 mu kitango 3. Jishinda jikwabo mwakonsha kwamba’mba, “Nkeya tukesambe pa bungauzhi bwa mu Baibolo bubena kufikizhiwa lelo jino.” Umvwe mwabwelako, mweshai mwina nzubo kitango 9 mu uno buku ne kwisamba nanji mapalagalafu 1-3. Nangwa mwakonsha kumwambila mwina nzubo amba: “Bantu bavula kibakatazha bingi kumvwisha bintu byo batanga mu Baibolo. Nkeya kimye kikwabo na kwimumwesha byo mwakonsha kumvwisha bulongo Baibolo wenu.” Pa kubwelako, mumweshai buku wa Baibolo Ufunjisha ne kumulumbulwila bya kufunda Baibolo.

⁴ Baibolo bunketu ye uji na “binembelo byazhila,” byakonsha kwitupa ‘maana a kumona lupulukilo.’ (2 Timo. 3:15) Onkao mambo, twayai atweba bonse tukekale na kizaku kya kwingilako pakatampe kusampanya uno Awake! wiikajila kukwasha bantu kwikala na luketekelo mu Baibolo.