Kuwamishako Busendwe Bwetu bwa Kusapwila—Kusha Buku wa Baibolo Ufunjisha

Ene Mambo o Kwanemena: Buku wa Baibolo Ufunjisha ke buku wanema ye tufunjishamo bantu Baibolo. Pano bino, saka tukyangye kutendeka kufunda na muntu, twafwainwa patanshi kumupa buku. Onkao mambo, twafwainwa kuyuka bulongo bya kusha buku wa Baibolo Ufunjisha mu mwingilo. (Maana 22:29) Kuji mashinda avula o twakonsha kwingijisha pa kushiila muntu, kabiji basapwishi bakonsha kwingijisha ebapelela.

Byo Mwafwainwa Kuba:

Ipuzhai bwipuzho bwakonsha kuzakula mwina nzubo ne kwibukumbula kwingijisha kitango kimo kiji mu buku. Mwakonsha ne kusalapo bwipuzho bumo pa aji ku ntendekelo ya kitango kiji kyonse. Umvwe mwina nzubo wakumbula, tangai kinembelo kyafwainwa ne kumumwesha jifuka jaamba pa yewo mutwe kampe ne kwisambako nanji pacheche.
Jishinda jikwabo ke kumwesha mwina nzubo biji pa mapa a kutendekelapo pa kuba’mba ekale na kizaku ne kumumwesha paji mukumbu wa mu Baibolo mu buku. Kampe mwakonsha kwamba pa bya malwa byamwekele katataka ne kumulumbulwila amba bavula bakebesha kuyuka mikumbu ya mepuzho aji pa jipa 3. Nangwa mwakonsha kwamba’mba tubena kufwakesha balunda netu kwibabuula bintu byawama biji kulutwe. Bamweshai bipikichala biji pa mapa 4-5 ne kwibashikisha amba, “Ñanyi milaye iji papo yo mwakonsha kutemwa kuba’mba ifike?” Jishinda jikwabo ke kwamba’mba mubena kufwakesha bantu kwibakwasha kutana mikumbu ya mepuzho anema a mu bwikalo bwetu. Panyuma ya bino, mweshai mwina nzubo mepuzho aji kunshi ya jipa 6, ne kwibashikisha bwipuzho bo bakonsha kutemwa kuyuka mukumbu.
Ingijishai jishinda ja kutendekelamo lufunjisho lwa Baibolo ponkapotu. Kampe mwakonsha kwamba’mba: “Tubena kumwesha bantu uno buku wa kwibakwasha kufunda Baibolo. Nanchi mwakimumonapo nyi? [Lekai akumbule.] Inge kyakonsheka, nakonsha kwimumwesha byo tufunda kwingijisha Baibolo wenu.”

Esekai Kuba Bino uno Ñondo:

Esekai kuba byo twisambapo pa kupopwela kwa kisemi.
Inge muji mu mwingilo na basapwishi bakwenu, babulaiko byo mubena kukeba kwamba. (Maana 27:17) Pimpulai byo mwanengezha kwamba inge kechi byakonsha kwingila bulongo ne.