Kwingijisha Buloshuwa wa Mambo Awama pa Kufunjisha
1. Buloshuwa wa Mambo Awama bamunengezha byepi?
1 Byonka byo twisambile mu Mwingilo Wetu wa Bufumu wa July, kingijisho kimo kyo tubika mu kyola kyetu kya mu mwingilo ke buloshuwa wa Mambo Awama Afuma kwi Lesa! Binembelo bijimo kechi bakopolola byambo bijipo ne, pa kuba’mba bena mazubo baketangilenga bene mu Baibolo. Nangwa kya kuba mabuku etu avula o twingijisha pa kufunda Baibolo anembwa mu jishinda ja kuba’mba ubena kutanga wakonsha kwifunjisha mwine, bino uno buloshuwa bamunengezha kwisamba na mufunjishi pa kuba’mba muntu afunde. Onkao mambo, umvwe twashila muntu uno buloshuwa, twafwainwa kumumwesha bya kufunda pa kuba’mba amone buwame buji mu kufunda mambo awama aji mu Baibolo.—Mat. 13:44.
2. Twakonsha kwingisha byepi buloshuwa wa Mambo Awama pa kimye kitanshi kyo twafwakesha muntu?
2 Pa Kimye Kitanshi kyo Mwafwakesha Muntu: Mwakonsha kwamba’mba: “Tubena kwisamba na bantu pa bintu byatama bibena kumweka mu ntanda. Nanchi mulanguluka’mba bino bintu byatama bikapwa nyi? [Lekai akumbule.] Mu Baibolo muji mambo awama akonsha kwitulengela kwikala na luketekelo. Baibolo wakumbula ano mepuzho.” Pai mwina nzubo buloshuwa ne kumwambila kusalapo bwipuzho bumo pa mepuzho aji pa nkupiko ya kunyuma. Mweshai bya kufunda kwingijisha jifuka jitanshi jiji mu lolo lufunjisho. Jishinda jikwabo ke kwipuzha mwina nzubo bwipuzho bumo buji pa lufunjisho lo mwasala, ne kumumwesha buloshuwa byo akonsha kumukwasha kutaana mukumbu wa mu Baibolo. Inge pa jw.org, paji vidyo waamba pa lolo lufunjisho, basapwishi bamo batambisha uno vidyo kimye kyo babena kufunda na muntu.
3. Lumbululai bya kufunjisha muntu Baibolo kwingijisha buloshuwa wa Mambo Awama.
3 Byo Twakonsha Kufunjisha Muntu: (1) Tangai bwipuzho buji mu byambo bifita pa kuba’mba mwina nzubo atemuchima pa kishinka kijimo (2) Tangai jifuka. (3) Tangai binembelo byasendalala, ne kwingijisha bulongo mepuzho pa kukwasha mwina nzubo kumona binembelo byo byakumbula bobo bwipuzho. (4) Inge abo bwipuzho buji na mafuka abiji, bwezhaipo kuba byo twaambapo mu lubaji 2 ne 3. Inge vidyo wakwatankana na bwipuzho kabiji mukyangye kutambisha uno vidyo ku mwina nzubo, mwafwainwa kumutambisha kimye kikwabo mu lonkalo lufunjisho. (5) Apa bino mwaipuzha mwina nzubo kukumbula bwipuzho pa kuba’mba mushiinwe’mba waumvwa.
4. Ki ka kiketukwasha kuyuka bya kwingijisha bulongo kino kingijisho?
4 Yukai bya kwingijisha kino kingijisho. Mwingijishainga kimye kyonse. Saka mukyangye kuya na kufunjisha muntu, patanshi langulukai pa muntu ye mufunjisha ne jishinda jawama ja kwisambilamo nanji kwingijisha binembelo biji mu lufunjisho. (Maana 15:28; Byu. 17:2, 3) Inge mwapijilwa kwingijisha uno buloshuwa ne kuyuka bya kumwingijisha, mukataana kuba’mba ke kingijisho kyawama bingi kwingijisha pa kufunjisha bantu bukine!