Kutaya ne
Nanchi Mubena Kwingijisha Ano Mabuloshuwa Nyi?
Mwijitana Jishinda Jaya Kubumi Bwamyakanyi?
Wanembwa mu jishinda ja kuzakwilamo michima ya bantu ba bupopweshi
Bya kumusha: “Byo kuji bupopweshi bwavula bingi lelo jino, nanchi mwakilangulukapo kala pa byo mwakonsha kuyuka bupopweshi bwaitabilwa kwi Lesa nyi? Panyuma ya kuba wakumbula, zhikulai pa jipa 19. Isambai jifuka 4 ne kwipuzha mwina nzubo inge waswa kuba’mba bupopweshi bwa kine bwafwainwa kulengela bantu kwitemwa abo bene na bene ne kutemwa bakwabo. Tangai Yoano 13:35 ne kumushila buloshuwa.”
Mwakonsha kweseka kwamba bino: Inge mwina nzubo waswa kumushila buloshuwa, ambai amba: “Lubaji 7 lwa uno buloshuwa lwalumbulula bishiino bitanu na kimo biyukanyikisha bupopweshi bwa kine. Nkomvwa bingi bulongo kubwela ne kwisamba nenu pa bino.”
Mipashi ya Bafu ya Konsha Kukukwashanyi Nangwa ku Kukozya? Nanchi Kine Koiji Nyi?
Wanembwa mu jishinda ja kuzakwilamo michima ya boba bakomena mu bantu baji na bisho bya kuchina bingi bafu. Kabiji wakonsha ne kukwasha pa kwisamba na boba baitabila kuba’mba muntu inge wafwa utwajijila na kumanama ne kupya mu mujilo wa helo
Bya kumusha: “Mu mabuku avula muji mashimikila a bantu bamba’mba besambapo kala na mipashi ya bantu bafwa. Abya twafwainwa kwisamba na bafu nyi?” (Tangai Musapwishi 9:5. Apa bino muleke akumbule) Zhikula pa jipa 4 ne kwisamba mafuka atanshi 4. Uno buloshuwa waamba byavula pa uno mutwe wanema.”
Mwakonsha kweseka kwamba bino: Umvwe mwina nzubo waswa kumushila buloshuwa, ambai amba: “Pano nga mawi a bantu bo bebepekezha kwisamba nabo afuma pi?” Mubulai kuba’mba mukabwelako na kwisamba mafuka atanshi atanu na asatu mu kitango kiji pa jipa 13.
Ilyo Umuntu Watemwa Afwa
Wanembwa mu jishinda ja kuzakwilamo michima ya bantu baji na bulanda nangwa boba baji na bakilongo nangwa balunda nabo babena kukeba lutekenesho
Bya kumusha: “Lufu lwa wa mu kisemi ke kintu kishinkisha bingi bantu bulaka. Bavula bakankalwa kuyuka bya kutekenesha bisemi byafwisha. Nga anweba mwalangulukapo amba ka? Lekai akumbule. Apa bino muzhikule pa jipa 31 ne kumumwesha kipikichala kya lusanguko. Twajijilai kwamba’mba: Baibolo witulaya kuba’mba katatakatu Lesa akafumyepo buyanji bwa bantu. [Tangai Byubilo 24:15] Apa bino muzhikule pa jipa 30, mutange mafuka 2 ne 3, ne kumushila buloshuwa.”
Mwakonsha kweseka kwamba bino: Inge muntu waswa kumushila buloshuwa, ambai amba: “Uno buloshuwa waamba pa bintu bikwabo byawama byavula byaamba pa bintu bikeba kuba Lesa kulutwe. Nkomvwa bingi bulongo kubwela ne kwisamba nenu pa bino.”
Mwakonsha Kwikala Balunda na Lesa
Wanembwa mu jishinda ja kuzakwilamo michima ya bantu babula kufunda nangwa kuyukisha kutanga
Bya kumusha: “Nanchi mulanguluka amba kyakonsheka atweba kwikala balunda ne Lesa nyi? [Lekai akumbule. Apa bino mutange Yakoba 2:23.] Uno buloshuwa bamunengezha kuba’mba etukwashe kwikala balunda na Lesa byonka byajinga Abalahama.”
Mwakonsha kweseka kuba bino: Pa kimye kitanshi nangwa pa kubwelako, mweshai bya kutendeka lufunjisho lwa Baibolo kupichila mu kwisambila pamo Lufunjisho 1 lonse nangwa kichika.