Sapwilainga ku “Bantu Bonse”
1. Mambo ka basapwishi babambakana o baikela nobe basendwe?
1 Sendwe wikala na bingijisho byavula bingi kabiji uyuka kimye ne byo afwainwa kwingijisha kingijisho kimo kimo. Mu jishinda jimotu, ne atweba tuji na bingijisho byapusana pusana byakonsha kwitukwasha kwingila bulongo mwingilo wetu wa kusapwila. Kyakumwenako, mabuloshuwa aji na mitwe yapusana pusana alupulwa a kwitukwasha kusapwila ku “bantu bonse.” (1 Ko. 9:22) Mu kya mukachi kya uno Mwingilo Wetu wa Bufumu mwanembwa mutanchi wa mabuloshuwa amo, kabiji kyalumbulula bo banembela ano mabuloshuwa ne mashinda a kwingijisha pa kwiasha.
2. Kimye ka kyo twafwainwa kwingijisha mabuloshuwa mu mwingilo?
2 Kimye kyo Twafwainwa Kwingijisha Mabuloshuwa: Sendwe wingijishatu kingijisho po amona amba kisakumukwasha. Po pamotu, ne atweba twakonshatu kusha buloshuwa inge twamona amba muntu usakumwenamo, kechi kumushatu mu bañondo batongolwa kushilamo yewo buloshuwa ne. Kyakumwenako, inge kya kuba tubena kusha buku wa Baibolo Ufunjisha kabiji inge tubena kusapwila mu mpunzha muji bantu babula kuyuka bwina Kilishitu kabiji babula kuta muchima ku Baibolo, kyakonsha kuwama kwibashila buloshuwa, apa bino kimye kikwabo twibashila buku wa Baibolo Ufunjisha inge kebakebe kufunda.
3. Mambo ka o twafwainwa kwingijishanga bulongo bingijisho byetu bya mu busapwishi?
3 Baibolo watakaika boba bengila bulongo mwingilo wabo. (Mana 22:29) Kishinka ke kya kuba’mba lelo jino kafwako mwingilo wanema kukila “mwingilo wa kusapwila mambo awama” ne. (Loma 15:16) Pa kuba’mba twikale “muntu wamwingilo wabula ne kya kubilako bumvu,” twafwainwa kwibikako kwingijishanga bulongo bingijisho byetu.—2 Timo. 2:15.