Kwashai bantu kumvwa byamba Lesa
1. Ñanyi mabuloshuwa o balupwile pa Kushonkena kwa Nkambi kwa ‘Bufumu Bwa Lesa Bufike!’ kabiji mambo ka o awamina?
1 Kushonkena kwa nkambi kwajinga na mutwe wa kuba’mba ‘Bufumu Bwa Lesa Bufike!’ kwalupwilwe mabuloshuwa abiji, Umvwainga Byamba Lesa Mukekale Myaka ne mukwabo wapela wa kuba’mba: Umvwainga Byamba Lesa. Na mambo a kuba aji na byambo bicheche apela kutuntulula. Kimye buloshuwa wa Umvwainga Byamba Lesa Mukekale Myaka kyo alupwilwe mu kizungu, baswishishe kumutuntulula mu milaka ikwabo 431.
2. Bantu bamutunduka bakamwenamo mu ano mabuloshuwa?
2 Bantu bamutunduka bakamwenamo mu ano mabuloshuwa? Akimonai byakumwenako byalondelapo byubiwa mwaya ntanda:
• Musapwishi ubena kwisamba na mwina nzubo, kimye kitanshi nangwa pa kubwelako, watana kuba’mba mwina nzubo kechi wayuka kutanga nangwa kechi utanga bulongo ne.
• Musapwishi usapwila ku bantu bamba mulaka uji na mabuku acheche atuntululwa nangwa kafwako atuntululwa muyewo mulaka ne. Nangwa bantu bavula mu nyaunda kechi bayuka kutanga mulaka ye bamba ne.
• Musapwishi wingijisha mulaka wa kwamba na maboko pa kusapwila bantu bashinka matwi baji mu nyaunda yanji.
• Nsemi ukebesha kufunjisha mwananji wakyanyike waluba kutanga.
3. Ñanyi bintu biji mu buloshuwa wa Umvwainga Byamba Lesa?
3 Byo Bamunengezha: Buloshuwa wa Umvwainga Byamba Lesa uji na mikuku ya byambo bicheche ne Kinembelo kunshi ya jipa kyalumbulula bishinka. Mambo ka? Fwanyikizhai kuba amba muntu wimupa buloshuwa wa mu mulaka ye mwabula kuyuka kutanga, kampepo muji bintu byo mwabula kuyuka. Nanchi mwakonsha kumutemwa, nangwa muji byakumwenako byawama nyi? Ine. Po pamotu ne bantu babula kuyuka kutanga bachina mabuku muji byambo byavula. Onkao mambo, kibaba kiji kyonse bekinengezha bulongo kumwesha byo mwakonsha kwisamba kufuma pa kipikichala kimo kuya pa kikwabo.
4. Ñanyi bintu biji mu buloshuwa wa Umvwainga Byamba Lesa Mukekale Myaka?
4 Buloshuwa wa Umvwainga Byamba Lesa Mukekale Myaka uji na byakumwenako bintutu bimo biji ne mu Umvwainga Byamba Lesa. Bamunengezhezha bantu babula kuyuka kutanga nangwa boba bakifunda kutanga. Kimye musapwishi kyo abena kufunda na muntu mu buloshuwa wa Umvwainga Byamba Lesa wafwainwa kwikala ne na buloshuwa wa Umvwainga Byamba Lesa Mukekale Myaka. Peulu ya jipa jiji ku kipiko, paji bwipuzho bwa kumbulwa pa ano mapa abiji. Paji byakumwenako ne binembelo byo bamwesha. Pa mapa amo na kunshi paji tubitenguluzha twatokoloka muji bishinka bikwabo ne Binembelo byo mwakonsha kwisamba na muntu kwesakana na byoaji.
5. Kimye ka kyo twakonsha kusha ano mabuloshuwa, kabiji twakonsha kushila byepi bantu?
5 Bya Kwingijisha ano Mabuloshuwa: Mwakonsha kusha ano mabuloshuwa kimye kyonse kyo mubena kwingila busapwishi bwa ku nzubo ku nzubo nangwa kya kuba kechi mabuloshuwa a kushajika muyewo ñondo ne. Kimye kyo mwabwelako ku muntu wamwesheshe lusekelo mwakonsha kumubula amba mbena kukeba nkumweshepo kintu kimo, mupai buloshuwa.
6. Twakonsha kufunjisha byepi muntu Baibolo kwingijisha ano mabuloshuwa?
6 Byo kiji kuba’mba buloshuwa wa Umvwainga Byamba Lesa kechi uji na mepuzho ne, mwisambo kechi wafwainwa kwikala wa mepuzho ne mikumbu byonka byo mufunda na bantu mu buku wa Baibolo Ufunjisha ne. Bantu bavula bomvwa bulongo kwibashimikizha mashimikila. Bamo bengijisha byakumwenako kimye kyo babena kulumbulwila muntu mashimikila aji mu Baibolo. Balumbulula kyakumwenako byo kyakwatankana. Ambai na kizaku. Ipuzhai ye mufunjisha kwimubula byoamona ne kulanguluka. Tangai binembelo biji kunshi ya jipa, ne kwisambapo byo byalumbulula. Ipuzhai mepuzho kimye kyo mubena kwisamba ne kumona kuba’mba waumvwa byo mubena kumufunjisha. Umvwe mubena kufunda nanji mu buloshuwa wa Umvwainga Byamba Lesa Mukekale Myaka, pa kwisamba pa bipikichala, tangilainga pamo byambo ne binembelo byakwatankana.
7. Twakonsha kukwasha byepi ye tufunjisha Baibolo kununguluka?
7 Kwashai ye Mufunjisha Kununguluka: Twaketekela, kufunda na muntu wabujile kizaku kya kutanga kukamulengela kwikala na kizaku kya kukeba kumuyuka Yehoba. (Mat. 5:3; Yoa. 17:3) Onkao mambo, umvwe mubena kufunda mu buloshuwa wa Umvwainga Byamba Lesa, kimye kimo mwakonsha kumukwasha kuyuka kutanga, ne kutendeka kufunda nanji mu buloshuwa wa Umvwainga Byamba Lesa Mukekale Myaka. Umvwe mwapwisha kufunda nanji ano mabuloshuwa kechi kibena kulumbulula amba muntu wafwainwa kubatizhiwa ne. Mwafwainwa kutuntulukila mu buku wa Baibolo Ufunjisha nangwa buku mukwabo wafwainwa ku mukwasha kumvwisha Baibolo.
8. Mambo ka o mwaikela nalusekelo pa bingijisho byakatataka bya kwingijisha mu mwingilo?
8 Umvwe bantu bakeba kwikala myaka ne myaka bafwainwa kumvwanga kwi Nkambo mwina bintu byonse. (Isa. 55:3) Kabiji nkebelo ya Yehoba keya kuba’mba “bantu bonse” kuvwangakotu ne boba babula kuyuka kutanga, kumvwa kwi aye. (1 Timo. 2:3, 4) Tubena kumusanchila bingi pa kwitupa bingijisho byakatataka byo twakonsha kwingijisha pa kufunjisha bantu bya kumvwa kwi Lesa!