Kulondela Byaamba Binembelo pa Mambo a Bijilo Lubaji 4
Kutanwa ku Kijilo kya Bantu Babula Bakamonyi
1. Bintu ka byo twafwainwa kulangulukapo kimye kyo tubena kuya na kutanwa ku kijilo?
1 Kutanwa ku kijilo kya bantu babula bakamonyi, kikale kiji ku chechi nangwa pa muzhi ke kintu kyo twafwainwa kulangulukishapo bulongo byonka byo kyaambiwa mu Kyamba kya Usopa kya June 1, 2002, pa mutwe wa kuba’mba “Mepuzho Kufuma Kubatanga.” Kyawama kuvulukanga amba kijilo kyubiwa na bantu babula bakamonyi boba bintu byabula bya mu Binembelo. Javula bamba majashi atundaika mafunjisho a bubela a kuba’mba mweo kechi ufwa ne, kabiji ne kuba’mba muntu inge wafwa uya mwiulu. Mu mapunzha avula, bantu balaala pangye, kwimba nyimbo ya ku chechi, kulomba bashakulu, kupana bya bupe, kutoma binyu ne bishotu bikwabo byo boba mu mapunzha a mu mizhi.
2. Kyawamina ka kubujila jimo bantu bintu byo twaitabilamo pa mambo a lufu?
2 Javula, bantu baketekela balongo bayewo muntu wafwa kulondela bisho bya pa kijilo byo bamona amba byanema. Kyakumwenako, mulongo mu kipwilo umvwe kya kuba ye mubeji mu kisemi, uketekelwa kulondela bisho byabula bya mu binembelo umvwe banshiji babula bakamonyi bafwa. Kyakumwenako kikwabo, nyenga wafwisha mwata wanji bamuketekela kulondela bisho byabula bya mu binembelo. Bimye bya uno mutundu, kikebewa kwikala bajimuka pa kuba’mba tubule kulondela bisho byabula bya mu binembelo. Onkao mambo, twafwainwa kubujila jimo balongo betu babula bakamonyi bintu byo twaitabilamo kukila kupembelela kimye kya lufu. Umvwe bayukila jimo bintu byotwaitabilamo, kyakonsha kwitukwasha kuzhikijila bulunda bwetu ne Lesa kimye kyotubena kutalañana na makatazho ekalako pa kijilo.
3. Saka tukyangye kuya ku kijilo, mepuzho ka o twafwainwa kwishikisha?
3 Kyakonsha kwikala byepi umvwe mwina Kilishitu wakeba kuya ku kijilo kya mukwabo wabula kwitabila mobengijila ku nkito, mulongo wanji nangwa wa kinkalankulo? Kyakonsha kuwama kwishikisha mepuzho alondelapo: ‘Nanchi kutanwa pa bantu babena kuba bintu byabula bya mu Binembelo kwakonsha kundengela kulondela byo babena kuba nyi? Nanchi kutanwako kwakonsha kundengela kutuntwisha balongo ne banyenga mu kipwilo nyi? (Mat. 18:6) Nanchi kutanwako kwakonsha kulengela kupusenamo na bantu babula kuyuka bintu byo naitabilamo nyi?’ Kechi tuchina kwituseka ku bantu ne, pano jiwi jetu ja mu muchima jo jafwainwa kwitukatazha. Kutanwa ku bijilo bya uno mutundu, kwakonsha kukatazha jiwi jetu ja mu muchima nangwa bantutu bakwabo.—Esakanyaiko 1 Kolinda 8:12, 13.
4. Kimye ka kyawama kuya ku kijilo na kutekenesha bafwisha?
4 Kyakonsha kwikala byepi umvwe muntu wavuluka amba kutanwa ku kijilo kusa kumulengela kuba bintu byabula bya bwina Kilishitu nangwa kutuntwisha bakwabo ne kumuletela lukatazho na bantu babula bakamonyi? Bino ke bishinka byawama byakonsha kulengela mwina Kilishitu kubula kutanwako ku kijilo. Umvwe muntu wafuukulapo kubula kutanwako ku kijilo, kafwako muntu nangwa umo wa mu kipwilo wakonsha kumukatazha nangwa kumuzhingijila. Bamo bafuukulapo kuya pa nzubo ya majila saka bakyangye kuzhika nangwa panyuma ya kuzhika. Pa kikye kimye kisemi kyafwisha kampepo bulanda bwakepako kabiji bafwainwa ne kutako maana kimye kyo mubena kwibabula byaamba Baibolo. Umvwe mwapana bupe panyuma ya kuba bantu bapalañana kala pa kijilo, buno bupe bwakonsha kukwashatu kisemi kyafwisha. Kuyuka kimye kyo mwafwainwa kupainamo bukwasho ne kuya na kwibatekenesha, kwakonsha kwituzhikijila ku mupashi kabiji buno bupe bukebakwasha.
5. Twakonsha kumwesha byepi amba twi bena Kilishitu bafikilamo kimye kyotubena kufuukulapo kuya na kutanwa ku kijilo?
5 Kechi Musule Lukatazho ne: Bamo bamona kimye kya kijilo kwikala kimye kyawama kya kusambakana na bantu bapusana pusana, kuja bya kuja ne kutoma malwa. Kutanwa ku kijilo bekimona kwikala kintu kyanema bingi. Onkao mambo, kubula kuya ku kijilo bekimona kwikala mambo akatampe ku kisemi kya wafwa. Bamo balanguluka amba kubula kutanwa ku bijilo kimye kyonse, kulengela bantu bavula kukabula kwiya pa kijilo kyabo. Na mambo a kino, kilengela bantu kutanwanga ku bijilo byonse bikala mu kimasamasa mobekala. Baya ku kijilo nangwa kya kuba bayukakotu yenka muntu wafwa kabiji kafwako ne bukwasho bo basa kukwasha kisemi kyashala ne. Kyatanyiwa kuba amba aba babula kutanwa ku kupwila moba onse na mambo a kutabankana na nkito ya ku mubiji, javula kechi bebakaina ku bakulumpe ba nkito kuya ku kijilo ne. Nanchi kutanwa ku bijilo mu jino jishinda kwayilamo na bikeba Lesa nyi?
6. Kutanwa ku bijilo bimo kwakonsha kubika byepi bulunda bwetu ne Lesa mu kizumba?
6 Byo tuji bapopweshi bakine ba Yehoba, twafwainwa kulangulukanga pa kyakonsha kubiwa ku bulunda bwetu ne Lesa umvwe ke tutanwe ku bijilo javula. Nanchi kijitu bulongo kwikala na kimye kyabaya kya kuyanga ku mazubo a majila kumpelo ya milungu ne kwikalatu na kimye kicheche kya kusapwila nangwa kya kwingijilamo mingilo ikwabo ya Lesa nyi? (Efi. 5:15, 16) Byo kiji kuba amba ku bijilo bya bantu babula kwikala bakamonyi kubiwa bintu byabula bya mu Binembelo nabiji kukizhamo kutoma malwa ne byubilo bincha, twafwainwa kwishikisha atwe bene amba, ‘Nanchi kijitu bulongo kuya ku kijilo kya uno mutundu bunke nangwa kutumako mwina kwami nangwa wakilongo umvwe kijilo kyaikela ku taunyi iji kwalepa nangwa kuya ku muzhi nyi?’ Atweba bonse twafwainwa kujimuka na bizumba bifumamo mu kutanwa javula ku bijilo kwikala bisho bibula kutokesha Yehoba ku muchima, byo kiji kuba’mba kuba bino kwakonsha kwitulengela kubula kukoma ku mupashi ne kubula kwikala na byubilo bya bwina Kilishitu.—Lum. 18:4.
7. Mambo ka o twafwainwa kwikela bajimuka kimye kyo tubena kufuukulapo kuya na kutanwa ku kijilo kya muntu wabula Kamonyi?
7 Kimye kimo, bena Kilishitu basula bintu bimo ne kwilengela kwivwanga mu byubilo byatama. Bamo baingilanga mingilo ya bukulumpe nangwa bunkwasho bwapwa, kabiji bakwabo nabo bebapanga mu kipwilo kya bwina Kilishitu. Baibolo wajimunañana kuba’mba “Wajimuka pa kumona bileta lufu bibenakwiya ufyama.” (Mana 22:3) Kuyuka jino jifunde ne kulanguluka pa bulunda bwetu ne Lesa ne bintu byatama byakonsha kufumamo umvwe twaya ku kijilo kya muntu wabula kamonyi kwitulengela kwikala bajimuka.
8. Makatazho ka bamo obekala nao na mambo a kwivwanga mu tubungwe tunengezha bya bijilo?
8 Kimye kimo kyalo kitelwa kuba’mba ‘muzhi mukatampe,’ bisho bisampana bukiji bukiji kufuma ku mpunzha imo kuya ku ikwabo. Mu byalo bimo balongo bamo batwela mu tubungwe tobalenga amba twa kuzhika bantu. Tuno tubungwe twalengwa na mukoka umo nangwa mushobo. Kwikala kusonkesha mali a kukwasha boba baji mu kabungwe inge kwaikala kijilo. Umvwe mukwabo uji mu kabungwe waikala na kijilo, bafwainwa kutanwako ne kumukwasha. Nanchi kijitu bulongo kwikala mukano kabungwe nyi? Pa muzhi umo, nyenga watwelele mu kano kabungwe kwa kubula bansemi yanji kuyuka ne. Kimye kyoafwile, bakwabo ba mu kabungwe baishile bavula pa kijilo ne kutatula kwimba ñoma, nyimbo ne kuzha. Nangwa kya kuba balongo banji baesekele kwibakanya, bakankelwe, kino kyaletele bumvu ku bainanji ne ku balongo ba bwina Kilishitu batainweko. Kuyuka kuba’mba kupwanañana na bantu babula kwakamwa Lesa kwakonsha konauna bulunda bwetu ne Lesa kwitukwasha kuyuka bantu bo twafwainwa kupwanañana nabo.—1 Ko. 15:33.
Byamba Binembelo bya Kine
9. Mambo ka okyanemena kwikala bajimuka na bisho byubiwa pa bijilo?
9 Pa 1 Kolinda 10:21, pa amba’mba: “Kechi mwakonsha kuja ku “tebulu wa Yehoba” ne ku tebulu wa bandemona pamo ne.” Bantu ba Lesa balondela luno lujimuno. Twakonsha kuba byepi umvwe mwina Kilishitu bamukanjikizha kwivwanga mu bisho bya pa kijilo ku balongo banji babula kwitabila nangwa bakinkalankulo? Umvwe muntu wivwanga mu kupopwela bankishi, ko kuba’mba wasenduka mu lwitabilo, bakulumpe bafwainwa kulondela byaamba Binembelo pa kuba’mba kipwilo kikale kya butoto.—Mpitu. 18:9-13; Yele. 7:16-19.
10, 11. Ki ka kyafwainwa kwitukwasha kwikala na mweno yawama pa lufu ne bisho byubiwa pa kijilo?
10 Kutwajijila Kwikala na Mweno Yawama pa Lufu: Ki ka kiketukwasha kwikala na mweno yawama pa lufu ne bisho byubiwa pa bijilo byo twaambapo? Twafwainwa kutemwa Yehoba na muchima wetu yense kupichila mu ‘kushikwa bubi.’ (Sala. 97:10) Twafwainwa kuchinuzhuka bisho bya pa kijilo byaitabilamo bantu kuba’mba bantu bafwa bakwasha bantu bomi. Kutemwa bakwetu kwakonsha kwitulengela kubula kuba bintu byakonsha kutuntwisha bakwetu bena Kilishitu nangwa kukatazha jiwi jabo ja mu muchima.—1 Ko. 10:32, 33.
11 Kuyuka biji muntu wafwa kwitukwasha kuchinuzhuka ndangulukilo ya bantu baji mu mfishi ya ku mupashi. Onkao mambo, tuchinuzhuka kulondela byubilo byuba bantu bya kunemeka muntu wafwa nangwa byubilo bya kwimwesha kuba’mba tuji na byuuma. Kechi twafwainwa kuswisha mutanchi wa kijilo kwitulengela kubula kwingila mingilo ya ku mupashi ne. Onkao mambo umvwe muntu wabula kuya ku kijilo kechi twafwainwa kumuzhingijila ne, nangwa umvwe babula kwitubikapo pa mutanchi wa kijilo. Bena Kilishitu bakine balanguluka ne kuba bintu mu jishinda japusana mambo balondela bukine buji mu Baibolo. (Efi. 5:8) Tulondela Binembelo pa kujila ne kuzhika mulunda netu wafwa, mu jishinda ja mushingi ne kwesekana na bukine buji mu Baibolo.—1 Tesa. 4:13; 5:5, 8, 11.
12. Bintu ka byakonsha kufuma mu “kukokela Lesa”?
12 Kechi Tuchina Bantu Bomi Ne: Kechi tukeba kutuntwisha uji yense ne. Byambo byawama byaambile Yesu byalengejile bantu babula kumvwisha bukine kuzhingila, kyo kimotu neatweba bafwainwa kwituzhingijila. (Yoa. 6:60, 66) Kukana kwivwanga mu bisho bya bupopweshi bwabubela kwakonsha kulengela kwitwendeleka, kwitutuka, kwitumanyika ne kwitushikwatu ku bantu babula bakamonyi. (1 Pe. 4:4) Bakamonyi ba Yehoba bamo bebangata bipe, kwibalengulula na mambo a kulondela bintu byaoloka. (Yoa. 15:19) Bakwabo bebatuñanya byatama ne kwibambila amba beimena bunke ne kubula kunemeka bantu bafwa. Kwitumanyika kwa uno mutundu kechi kwawama ne, bino tuketekela kwitumanyika mambo a kuba’mba twapusana na bantu ba mu ino ntanda. (2 Timo. 3:12) Onkao mambo, mu kifulo kya kuchina bantu, tukeba kutangijilwanga na Yehoba mambo kechi tukeba kumufichisha ku muchima ne.—Mana 29:25; Byu. 5:29.
13, 14. Bisho bya pa bijilo byakonsha kulengela byepi Satana kwitoongola?
13 Lekai abo Bene Bemwene Lupusano: Bamo baamba’mba “bakamonyi ba kwa Yehoba kechi bayuka kuzhika bantu ne.” Nanchi bino byambo bituzhingijisha nyi? Nanchi kimye kimo tulanguluka kuba’mba kechi twayuka kuzhika batemwe betu nenyi? Vulukai kuba’mba kimye Yesu kyo bamwesekele kwi Satana kuba’mba umvwe mwana Lesa eele panshi kufuma peulu ya nzubo ya Lesa, Yesu wakaine. Kechi wamujimbaikile kuba byatama mukukebatu kusekesha bantu ne. (Mat. 4:5-7) Twafwainwa kukana meseko a kulondela bisho bya pa bijilo bya bantu babula bakamonyi na mambotu a kukeba kumwesha bantu kuba’mba twayuka kuzhika bantu bafwa. Kino kyakonsha kubiwa byepi?
14 Kamonyi wa kwa Yehoba kechi wakonsha kwivwanga mu bisho bya pa kijilo byuba bantu babula Bakamonyi ne. Umvwe kechi twajimuka ne, twakonsha kwikala na ndangulukilo yatama yalengejile bakalume ba Lesa bakala kwikala mu lukatazho. Twafwainwa kuvuluka kuba’mba bena Isalela balengele mwana ñombe wa ngolode ne ku mupopwela, kabiji bekitelele amba ‘kijiilo kwi Yehoba.’ (Lupu. 32:5) Bebepelenga abo bene kuba’mba Lesa usa kutambwila mpopwelo ya kine ne ya bubela. Byobebepelengapo! Kuvwanga mpopwelo kwazhingijishe Yehoba ne kyafuminemo bena Isalela 3,000 bafwile.—Lupu. 32:28.
15. Twakonsha kunemeka byepi Yehoba ne kukwasha bantu kuyuka bupopweshi bwa kine?
15 Bantu ba Lesa kechi bakonsha ‘kuwamisha’ bisho nabiji kulala pangye ne byubilo byatama bitundaika mpopwelo ya bubela kupichila mu kwibifumya mu bisho bimo biji mu bupopweshi bwa bubela ne kwibileta mu bupopweshi bwa kine ne. Nangwa kuba bino kwakonsha “kumvwisha bulongo” bantu babula kwitabila, kyakonsha kulengela abano bantu bonka bamo kulanguluka amba Bakamonyi ba kwa Yehoba balenga bisho byabo bya pa kijilo. (Nga. 6:12; Mpitu. 12:30) Mu kupusanako, twayuka bino bisho byo biji, kechi binemeka Lesa ne, kabiji kechi byendela mumo na mpopwelo ya kine ne. (1 Ko. 10:20) Umvwe twatwajijila kuba bino tukalengela bantu ‘kuyuka mo bapusena baoloka ne babi, ne aye umwingijila Lesa, ne yewa ubula kumwingijila.’—Mala. 3:18.
16. Ñanyi byambo bya lutekenesho byo tuji nabyo?
16 Katatakatu lufu kechi lukekalako jibiji ne. Mabingo, bulanda ne bijikila bikapwijijila kimye Yehoba kyoakasangula bafwa. (Lum. 21:4) Luketekelo lo tuji nalo lwa kumonañana na batemwe betu bafwile lwaimena pa kutwajijila kwikala bakishinka lonka luno. Byotubena kupembelela kufika kwa uno mulaye, twayai tutwajijile kwikala bakishinka kwi Yehoba pa kuba’mba tukatanwe babula biko, bulema ne kubula kwivwanga mu bintu bya ino ntanda ibi ne bisho byayo bibula kunemeka Lesa!—2 Pe. 3:14.