Byo Twakonsha Kwingijisha Buloshuwa wa Mambo Awama Afuma Kwi Lesa!
Buloshuwa Bamunembela Kwitukwasha Kubwela ku Bantu ne Kutendeka Kufunda Nabo Baibolo
1. Ñanyi buloshuwa ye twatambwijile pa Kushonkena kwa Nkambi kwa ‘Lama Muchima Wobe!’ ye banembela kwitukwasha kubwela ku bantu ne kutatula kufunda nabo Baibolo?
1 Pa Kushonkena kwa Nkambi kwa ‘Lama Muchima Wobe!,’ twatambwijile buloshuwa wa katataka wa kwitukwasha kubwela ku bantu ne kutatula kufunda nabo Baibolo. Buloshuwa wa Mambo Awama Afuma Kwi Lesa! uji na mafunjisho apeela, ye wapingakena pa wa kuba’mba, Nanchi Lesa Ukebaka Kwiatweba? Uketukwasha kutatula kufunda na bantu Baibolo pa kimyetu kitanshi. Buloshuwa wa Nanchi Lesa Ukebaka Kwiatweba? waamba pa bintu mwina Kilishitu byo afwainwa kuba. Kino kyalengelanga ubena kufunda Baibolo kukankalwa kwibikwatankanya. Pano uno buloshuwa wa katataka waambatu pa mambo awama aji mu Baibolo kwapwa.—Byu. 15:35.
2. Mambo ka buloshuwa wa Mambo Awama Afuma Kwi Lesa! o bamunembejile?
2 Mambo ka o bamunembejile? Balongo ne banyenga ntanda yonse bakebanga jishinda japela kwingijisha pa kufika bantu pa muchima ne kutatula kufunda nabo bukine mu buku wa Baibolo Ufunjisha. Bantu bakankazhama kufunda mu buku wa Baibolo Ufunjisha kimye kimo bakaswanga kufunda mu uno buloshuwa. Kunungapo uno buloshuwa bamutuntulula mu milaka yavula.
3. Uno buloshuwa wapusana byepi na mabuku akwabo o tufundamo Baibolo?
3 Byo Bamunemba: Mabuku etu avula beanemba mu jishinda ja kuba muntu mwine wakonsha kutanga ne kumvwa kwakubula wa kumulumbulwila. Uno buloshuwa wapusanako. Bamunembela basapwishi kukwasha bantu kumvwisha Baibolo. Pa kushila muntu uno buloshuwa, kyawama kutanga jifuka jimo nangwa abiji ne kwisambapo. Mafunjisho aji mu uno buloshuwa kechi aji na mafuka avula ne, mwakonsha ne kwisamba na muntu uji pa mingilo. Nangwa kya kuba javula tutatwila mu lufunjisho 1, mwakonsha kutatula na lufunjisho lukwabo.
4. Uno buloshuwa uketukwasha byepi kufunjisha biji mu Baibolo?
4 Mu mabuku etu onse mikumbu itanwa mu mafuka. Bino mu uno buloshuwa mikumbu iji mu Baibolo. Bantu bakeba kufunda mu Baibolo kechi mu buku ne. Onkao mambo binembelo byavula bebitongolatu kechi banemba byambo bijipo ne. Mwakonsha kwibitanga mu Baibolo. Bomufunjisha bakayuka amba byo babena kufunda byafuma kwi Lesa.—Isa. 54:13.
5. Mambo ka o twafwainwa kwinengezha bulongo pa kuya na kufunjisha?
5 Binembelo byonse kechi bebilumbulula mu uno buloshuwa ne. Mambo ka? Mambo kino kikalengela ubena kufunda kwipuzha mepuzho ne kukwasha musapwishi kuyuka mwakufunjishisha bulongo. Onkao mambo, kyawama kunengezha bulongo lufunjisho. Kechi mwafwainwa kulolobwelangatu ne. Twatemwa bingi kulumbulula Binembelo. Pano bino javula tufika muntu ye tubena kufunjisha pa muchima umvwe twamuleka amba alumbulule Kinembelo. Twafwainwa kwipuzhanga mepuzho bulongo akonsha kumulengela kulumbulula mwatala kinembelo.—Byu. 17:2.
6. Twakonsha kwingijisha byepi uno buloshuwa: (a) ku bantu bazhinauka Lesa ne Baibolo? (b) umvwe tubena kusapwila ku nzubo ku nzubo? (c) kutatwilamo mafunjisho a Baibolo kimye kitanshi? (d) umvwe twabwela ku bo twisambile nabo?
6 Twakonsha kumwingijisha uno buloshuwa byonka byo tuba na mabuku akwabo o twingijisha kufunjishishamo bantu Baibolo nangwa kya kuba kechi yewa kusha mu yewo ñondo ne. Bavula tukamwingijishanga kutatwilamo mafunjisho a Baibolo pa kimye kitanshi. Kabiji byonka byo twaumvwine pa kushonkena kwa nkambi, “uno buloshuwa wakonsha kulengela mwingilo wa kubwelako kuwama” umvwe twamwingijisha ku bantu basaka kufunda bukine.—Monai tubitenguluzha tuji pa mapa 5-7.
7. Mwakonsha kufunjisha byepi muntu kwingijisha buloshuwa?
7 Byo Twakonsha Kufunjisha Muntu: Tatwilaipo kutanga bwipuzho buji mu byambo bifita. Tangai jifuka ne kinembelo nangwa binembelo byo baamba’mba “tangai”. Ipuzhai mepuzho akonsha kukwasha mwina nzubo kuyuka mwatala binembelo. Saka mukyangye kutanga mafuka akwabo, mwipuzhai jibiji bwipuzho buji mu byambo bifita pa kuba’mba muyuke inge waumvwa. Kyakonsha kuwama umvwe po po mwatatula kufunjisha muntu kwisambangatu nanji bwipuzho bumo buji mu byambo bifita. Umvwe twafunda naji moba avulako twakonsha kutatula kupwishanga lufunjisho lonse.
8. Twakonsha kwamba’mba ka pa kutongola kinembelo kyo tubena kukeba kutanga kabiji mambo ka?
8 Binembelo byonse po banemba’mba “tangai” byo byakumbula bwipuzho buji mu byambo bifita. Pa kulumbulula binembelo kechi mwafwainwa kwamba’mba mutumwa “Paulo wanembele amba,” nangwa amba, “Monai bungauzhi bwa Yelemiya.” Kino kyakonsha kulengela mwina nzubo kulanguluka amba mubena kutanga byambo bya bantu. Kyawama kwamba’mba, “Mambo a Lesa aamba’mba” nangwa amba, “Umvwai Baibolo byo aamba.”
9. Nanchi twafwainwa kutanga binembelo byonse umvwe tubena kufunda na muntu nyi?
9 Nanchi twakonsha kutanga binembelo byonse nyi, inyi twakonsha kutangatu byo baamba’mba “tangai”? Mwakonsha kutanga umvwe kyakonsheka. Binembelo byonse byo batongola kechi bebitongolatu kyatu ne. Mu Binembelo byonse muji bishinka byo mwakonsha kwisambapo. Bino kimye kimo ye mubena kufunda nanji kuba waikala na kimye kya kutanga binembelo byonse ne. Kimo kimye kechi watemwa kufunda ne, nangwa kechi utanga bulongo ne. Bino byakonsha kulengela kutangatu binembelo byo baamba’mba “tangai.”
10. Ñanyi kimye kyo twakonsha kutatula kufunda na muntu mu buku wa Baibolo Ufunjisha?
10 Kutatula Kufunda mu Buku wa Baibolo Ufunjisha: Umvwe tubena kufunda na muntu mu buloshuwa wa katataka kabiji twamona amba tufunda kimye kyonse, twakonsha kutatula kufunda nanji mu buku wa Baibolo Ufunjisha nangwa kutwajijila kufunda nanji mu buloshuwa wa Mambo Awama poso ne byo twamupwisha. Basapwishi bakonsha kuyuka kimye kyo bakonsha kutendeka kufunjisha muntu mu buku wa Baibolo Ufunjisha. Pa kutatula mu buku wa Baibolo Ufunjisha nanchi twakonsha kutatwila mu kitango kitanshi nyi? Kafwako muzhilo ne. Bantu baenda kupusana pusana. Pano bino, bantu bavula bo tufunjisha bomvwa bingi bulongo kufunda jibiji mitwe yo bafundapo kala pa kuba’mba bomvwishe mu buku wa Baibolo Ufunjisha.
11. Mambo ka o twafwainwa ku mwingijishanga bulongo uno buloshuwa wa katataka?
11 Tuji na mwingilo wa kushimuna Mambo awama a Bufumu mu ntanda mwavula bantu babula kukeba kufunda mambo awamisha, a kuba’mba Bufumu bwa Lesa bo bubena kulama kabiji katatakatu bukalete ntanda ipya muji bololoke. (Mat. 24:14; 2 Pe. 3:13) Kwakubula nangwa kuzhinaukatu ne bonse batambwila ano mambo baitabila bino byambo bya kuba’mba: “Byo auba buya maulu a muluwe ubena kwiya pa mitumba na kuleta mambo awama, ne kutaya mbila ya mambo a mutende, yenka uleta mambo awama a lusekelo ne kusapwila bya lupulukilo, kasa amwambila Ziona amba: ‘Lesa wobe ye mfumu mwine.’” (Isa. 52:7) Twafwainwa kwingijishanga uno buloshuwa wa katataka kukwasha bantu baji mu nyaunda yetu, kufunda mambo awama afuma kwi Lesa.
[Kitenguluzha pa peja 5]
Bantu Bazhinauka Lesa ne Baibolo:
● Mu mapunzha amo basapwishi umvwe ke bambe pe “Lesa” ne pa “Baibolo” bantu bavula bakana. Kyawama kwisamba nabo pa bintu byakonsha kupwisha makatazho o bapitamo nabiji kafulumende wawama, bintu byakonsha kwibakwasha mu kisemi ne bintu byalaya Lesa. Kampepo twakonsha kutatula kufunda nabo mu buloshuwa wa Mambo Awama panyuma ya kwisamba nabo bintu bimwesha amba Lesa koaji ne ene mambo o twakonsha kuketekela mu Baibolo.
[Kitenguluzha pa peja 6]
Kusapwila ku Nzubo ku Nzubo:
● “Tubena kwisamba pa byo twakonsha kuyuka bintu Lesa byo aketubila kulutwe. Nanchi mulanguluka’mba Lesa ukafumyapo byatama pano pa ntanda nyi? [Lekai akumbule.] Uno buloshuwa waambapo Baibolo byo akonsha kwitukwasha kuyuka mukumbu wa buno bwipuzho. [Mupai buloshuwa kabiji tangaipo jifuka jimo mu lufunjisho 1 ne kinembelo kya Yelemiya 29:11.] Kwesekana na byo twisamba, nanchi mulanguluka’mba Lesa ukeba amba twikalenga bulongo nyi? [Lekai akumbule.] Nemushila uno buloshuwa. Juba jikwabo tukesamba jifuka jalondelapo ne kumona Baibolo byo akumbula bwipuzho bwa kuba’mba, ‘Lesa ukoba byepi pa kufumyapo makatazho pano pa ntanda?’” Umvwe mwina nzubo kechi wapayankana ne, mwakonsha kutanga jifuka ja bubiji ne kwisamba nanji Binembelo bisatu bijimo. Ne kumvwañana nanji juba jo mukabwelako ne kwisamba bwipuzho bukwabo.
● “Bantu bavula batemwa kulomba kikatakata umvwe baji mu lukatazho. Nanchi mulomba nyi? [Lekai akumbule.] Nanchi mulanguluka’mba Lesa umvwa milombelo yonse nyi? [Lekai akumbule.] Uno buloshuwa walumbulula Baibolo byo akumbula buno bwipuzho. [Mupai buloshuwa kabiji tangai jifuka jimo mu lufunjisho 12 ne kwisamba binembelo byo bamba’mba “tangai.”] Nanchi mwakonsha kutemwa kuyuka amba Lesa umvwa milombelo yetu nyi? Pa kuba’mba Lesa akumbule milombelo yetu, twafwainwa kumuyuka bulongo. [Yai pa lufunjisho 2 ne kutanga tumitwe twatucheche.] Mbena kwimushila uno buloshuwa, juba jikwabo jo nkeya tukamona Baibolo byo akumbula ano mepuzho.”
● “Tubena kwisamba na bantu pa bintu byatama bibena kumweka mu ntanda. Nanchi mulanguluka’mba bino bintu byatama bikapwa nyi? [Lekai akumbule.] Bantu bavula kechi bayuka’mba Baibolo walaya kufumyapo bintu byatama pano ntanda ne. Baibolo wakumbula ano mepuzho.” Mupai buloshuwa ne kumwambila kusalapo mutwe ye atemwapo pa mitwe iji pa jipa japelako. Zhikulai pa mutwe ye asala ne kwisamba nanji bwipuzho butanshi. Umvwañanai kimye kyo mukabwelako na kwisamba bwipuzho bwa londelapo.
[Kitenguluzha pa peja 7]
Kutatula Kufunda na Muntu Baibolo Kimye Kitanshi:
● “Mbena kukeba kwimubulako jishinda ja katataka jo tubena kwingijisha pa kufunda Baibolo. Mu uno buloshuwa muji mitwe 15 yalumbulula byo mwakonsha kutana mikumbu ku mepuzho anema kwingijisha Baibolo. [Mu mweshai buloshuwa.] Nanchi mumvwa byo mutanga mu Baibolo nyi? [Lekai akumbule.] Uno buloshuwa walumbulula jishinda japela kumvwa byo mutanga mu Baibolo. [Isambai nanji lufunjisho 3 bwipuzho 3 ne kutanga Lumwekesho 21:4, 5. Umvwe kimye kokiji isambai jifuka jalondelapo ne kutanga binembelo byo baamba’mba “tangai.”] Mbena kwimushila uno buloshuwa. Mwakonsha kwikalangako na kimye kya kufunda Baibolo. Umvwe mwamona amba jino jishinda jawama mwakonsha kutwajijila. Juba jikwabo tukatatwila mu lufunjisho lutanshi. Luno lufunjisho lujitu na mepuzho asatu kwapwa.”
[Kitenguluzha pa peja 7]
Kutatula Kufunda na muntu Kimye kyo Mwabwelako:
● Pa kubwela ku bantu basaka kufunda bukine, twafwainwa kwamba’mba: “Kyawama bingi pa kwimutanapo. Ne muletela uno buloshuwa walumbulula Baibolo byo akumbula mepuzho epuzha bantu. [Mupai buloshuwa ne kumwambila amone pa jipa japelako.] Ñanyi mutwe ye mwatemwa? [Lekai akumbule. Zhikulai pa mutwe ye asala.] Uno buloshuwa wamwesha Baibolo byo akumbula buno bwipuzho.” Isambai nanji jifuka jimo nangwa abiji ne Binembelo byo baamba’mba “tangai.” Jino jishinda japeela kutatula kufunda na bantu. Mushilai buloshuwa ne kwisamba nanji kimye kyo mukabwelako. Lufunjisho umvwe lwapwa mwipuzhai kusala lufunjisho lo mwakonsha kwisambapo nangwa kutatwila pa lufunjisho 1.