Byo Twakonsha Kwingijisha Buloshuwa wa Bañanyi Babena Kuba Kyaswa Muchima wa Yehoba Lelo Jino?
Buloshuwa wa Katataka Bamunengezha Kukwasha bo Tufunjisha Baibolo Kuyuka Jibumba ja Yehoba
1. Ñanyi bintu bisatu byalengejile kunemba buloshuwa wa Bañanyi Babena Kuba Kyaswa Muchima wa Yehoba Lelo Jino?
1 Mwakingijishapo kala uno buloshuwa wa katataka wa kuba’mba Bañanyi Babena Kuba Kyaswa Muchima wa Yehoba Lelo Jino? Uno buloshuwa wa kukwashishamo (1) bo tufunjisha Baibolo kwituyuka bulongo, (2) kuyuka mingilo yetu ne (3) jibumba jetu byo jingila. Lufunjisho lumo lumo mu buloshuwa wa Kuba Kyaswa Muchima wa Yehoba kechi luji na byambo bwavujisha ne. Mwakonsha kutanga lufunjisho lumo mu maminiti atanu nangwa jikumi ne kwambapo panyuma ya lufunjisho.
2. Lumbululai byo banemba uno buloshuwa ne bintu bijimo.
2 Byo Bamunemba: Uno buloshuwa bamwabanya mu bipungu bisatu, byaamba biji jibumba ja Yehoba byonka byo twaambapo mu jifuka jitanshi. Mitwe yonse yanembwa mu bwipuzho kabiji tumitwe twatuchetuche tuji mu byambo bifita twakumbula bwipuzho. Mu uno buloshuwa muji bipikichala byafuma mu byalo kukila pa 50 bibena kumwesha mwingilo wetu mwaya ntanda. Mu uno buloshuwa yense muji tubitenguluzha twa kuba’mba, “Yukilaipo Bishinka Bikwabo”, muji bishinka byo mwakonsha kwisambapo na ye mufunjisha.
3. Twakonsha kwingijisha byepi buloshuwa wa Kyaswa Muchima wa Yehoba?
3 Bya Kumwingijisha: Mwakonsha kutanga mutwe uji mu bubwipuzho. Apa bino mwatanga lufunjisho lonse. Kimye kyo mubena kutanga mwakonsha kwambapo ne pa tumitwe tucheche tuji mu byambo bifita. Pa kupwisha lufunjisho pitulukai mu mepuzho aji kunshi ya jipa. Umvwe mwasaka mwakonsha kutanga lufunjisho lonse bino mwisambapo nangwa mwakonsha kwisamba panyuma ya kutanga jifuka jimo jimo. Mwafwainwa kusala binembelo bya kutanga. Kechi mwakonsha kulubako kwamba pa bipikichala ne kupituluka mu kakitenguluzha ka kuba’mba “Yukilaipo Bishinka Bikwabo” ne. Mwafwainwa kwisamba bishinka monka mo byalondankena. Nangwa byonkabyo, umvwe mwamona lufunjisho lwakonsha kumufika pa muchima kechi mwakonsha kukankazhama kufunda nanji lolo lufunjisho ne. Kyakumwenako, umvwe mukekala na kubuñana nangwa kushonkena mwafwainwa kufunda nanji lufunjisho 11.
4. Mambo ka o mwatemenwa pa kwikala na buloshuwa wa katataka?
4 Pa kufunda na muntu Baibolo, tumukwasha kuyuka Shetu wa mwiulu. Bino twafwainwa kumukwasha kuyuka ne Jibumba ja Yehoba. (Mana 6:20) Twatemwa bingi kwikala na buloshuwa wakatataka uketukwasha kwingila bulongo.